ഒരു ദിവസത്തിന്റെ തുടക്കത്തിൽ ശരീരത്തിനും മനസ്സിനും ഉന്മേഷം നൽകാൻ പ്രഭാതസ്നാനത്തോളം മികച്ച മറ്റൊന്നില്ലെന്നാണ് നമ്മുടെ വിശ്വാസം. എന്നാൽ നമ്മുടെ അയൽക്കാരായ ജപ്പാൻ, കൊറിയ, ചൈന തുടങ്ങിയ രാജ്യങ്ങളിലെ കാഴ്ചകൾ നേരെ തിരിച്ചാണ്. പകൽ മുഴുവൻ നീളുന്ന ജോലിത്തിരക്കുകൾക്ക് ശേഷം രാത്രി ഉറങ്ങാൻ കിടക്കുന്നതിന് മുൻപാണ് അവർ കുളിക്കാൻ സമയം കണ്ടെത്തുന്നത്. ഇത് വെറുമൊരു ശീലമല്ല, മറിച്ച് അവരുടെ ആരോഗ്യത്തിന്റെയും സൗന്ദര്യത്തിന്റെയും രഹസ്യം കൂടിയാണെന്ന് പറഞ്ഞാൽ നിങ്ങൾ വിശ്വസിക്കുമോ?

കിഴക്കനേഷ്യൻ രാജ്യങ്ങളിലെ വർക്ക് കൾച്ചറും പാരമ്പര്യവും പരിശോധിച്ചാൽ രാത്രിയിലെ കുളിക്ക് വലിയ പ്രാധാന്യമാണ് അവർ നൽകുന്നത്. ജപ്പാനിലും കൊറിയയിലും രാത്രിയിലെ കുളി ശരീരത്തെ റിലാക്സ് ചെയ്യിക്കാനും പേശികളിലെ വലിമുറുക്കം കുറയ്ക്കാനും സഹായിക്കുന്ന ഒന്നായാണ് കണക്കാക്കപ്പെടുന്നത്. ചൈനീസ് സംസ്കാരമാകട്ടെ, രാത്രിയിലെ കുളിയെ ശുചിത്വത്തിന്റെ ഏറ്റവും പ്രധാന ഘട്ടമായി കാണുന്നു. പകൽ മുഴുവൻ ശരീരത്തിൽ അടിഞ്ഞുകൂടിയ വിയർപ്പും ബാക്ടീരിയകളും അന്തരീക്ഷത്തിലെ വിഷാംശങ്ങളും നീക്കം ചെയ്യുന്നതിലൂടെ ചർമ്മത്തിന്റെ ആരോഗ്യം മെച്ചപ്പെടുമെന്ന് അവർ വിശ്വസിക്കുന്നു. പ്രത്യേകിച്ച് ഈർപ്പമുള്ള കാലാവസ്ഥകളിൽ അഴുക്കും ബാക്ടീരിയകളും ശരീരത്തിൽ തങ്ങുന്നത് ഒഴിവാക്കാൻ രാത്രിയിലെ കുളി അനിവാര്യമാണ്.

ശാസ്ത്രീയമായ പഠനങ്ങളും രാത്രിയിലെ കുളിയുടെ ഗുണങ്ങളെ ശരിവെക്കുന്നുണ്ട്. ഉറങ്ങാൻ പോകുന്നതിന് ഏകദേശം ഒന്നര മണിക്കൂർ മുൻപ് ഇളംചൂടുവെള്ളത്തിൽ കുളിക്കുന്നത് ശരീരത്തിന്റെ താപനില ക്രമീകരിക്കാനും മനസ്സിനെ ശാന്തമാക്കാനും സഹായിക്കും. ഇത് ആഴത്തിലുള്ള ഉറക്കം ഉറപ്പാക്കുകയും അടുത്ത ദിവസം രാവിലെ കൂടുതൽ ഊർജ്ജസ്വലതയോടെ എഴുന്നേൽക്കാൻ സഹായിക്കുകയും ചെയ്യുന്നു. ഉറക്കമില്ലായ്മ കൊണ്ട് ബുദ്ധിമുട്ടുന്നവർക്കും മാനസിക സമ്മർദ്ദം അനുഭവിക്കുന്നവർക്കും രാത്രിയിലെ കുളി ഒരു മാന്ത്രിക ഔഷധം പോലെ പ്രവർത്തിക്കുമെന്നാണ് വിദഗ്ധർ പറയുന്നത്.

എങ്കിലും രാവിലെ കുളിക്കുന്നതുകൊണ്ട് ഗുണമില്ലെന്നല്ല ഇതിനർത്ഥം. രാവിലെ കുളിക്കുന്നത് ദിവസം മുഴുവൻ ഉന്മേഷം നൽകുകയും തലച്ചോറിന്റെ പ്രവർത്തനം മെച്ചപ്പെടുത്തുകയും ചെയ്യുന്നു. രാത്രിയിൽ അമിതമായി വിയർക്കുന്ന ശീലമുള്ളവർ തീർച്ചയായും രാവിലെ കുളിക്കണം. ചുരുക്കത്തിൽ, ഓരോരുത്തരുടെയും ജീവിതശൈലിയും കാലാവസ്ഥയും അനുസരിച്ച് കുളിക്കേണ്ട സമയം തിരഞ്ഞെടുക്കാമെങ്കിലും, ശരീരത്തെ പൂർണ്ണമായും ശുദ്ധീകരിക്കാനും മികച്ച ഉറക്കം ലഭിക്കാനും രാത്രിയിലെ കുളി തന്നെയാണ് ഏറ്റവും മികച്ചത്. ഈ ലളിതമായ മാറ്റം നിങ്ങളുടെ ആരോഗ്യത്തിൽ വലിയ മാറ്റങ്ങൾ കൊണ്ടുവരുമെന്ന് തീർച്ച.