സംഭവത്തെ തുടർന്ന് കന്യാകുമാരി ജില്ലാ ഭരണകൂടം അന്വേഷണത്തിന് ഉത്തരവിടുകയും സ്‌കൂൾ പ്രിൻസിപ്പൽ പ്രമീള ഇവാഞ്ചലിനെ നാഗർകോവിലിലെ വടശ്ശേരി ഗവൺമെന്റ് ഹയർ സെക്കൻഡറി സ്‌കൂളിലേക്ക് സ്ഥലം മാറ്റുകയും ചെയ്തു.

എൻ.ഇ.ഇ.ടി, ജെ.ഇ.ഇ തുടങ്ങിയ മത്സരപരീക്ഷകൾക്കായുള്ള പ്രത്യേക പരിശീലന ക്ലാസുകൾക്ക് ശേഷമാണ് സംഭവം നടന്നതെന്നാണ് റിപ്പോർട്ടുകൾ. ആഗസ്റ്റ് 1 ശനിയാഴ്ച നടന്ന പ്രത്യേക ക്ലാസ് അവസാനിച്ചതിന് ശേഷം ക്ലാസ് മുറിയിൽ തുടർന്ന വിദ്യാർത്ഥികളാണ് മദ്യക്കുപ്പികളും ഭക്ഷണ പാക്കറ്റുകളുമായി ഇരുന്നത്. പുറത്തുനിന്ന് കൊണ്ടുവന്ന മദ്യത്തെക്കുറിച്ച് ഇവർ സംസാരിക്കുന്നത് ഒപ്പമുണ്ടായിരുന്ന മറ്റൊരു വിദ്യാർത്ഥി മൊബൈലിൽ പകർത്തി സമൂഹമാധ്യമങ്ങളിൽ പങ്കുവെക്കുകയായിരുന്നു.

വീഡിയോ ദൃശ്യങ്ങൾ വ്യാപകമായി പ്രചരിച്ചതോടെ കന്യാകുമാരി ജില്ലാ കളക്ടർ ഉടൻ അന്വേഷണത്തിന് ഉത്തരവിട്ടു. വീഡിയോ പകർത്തിയ സമയം, അതിലുള്ളത് സ്‌കൂളിലെ വിദ്യാർത്ഥികൾ തന്നെയോ, മദ്യം എങ്ങനെ ക്യാമ്പസിനുള്ളിലെത്തി, പരിശീലന സമയത്ത് കൃത്യമായ മേൽനോട്ടം ഉണ്ടായിരുന്നോ തുടങ്ങിയ കാര്യങ്ങളിൽ അന്വേഷണം നടക്കുകയാണ്. റിപ്പോർട്ട് ലഭിച്ച ശേഷം കുറ്റക്കാർക്കെതിരെ കൂടുതൽ കർശന നടപടികൾ സ്വീകരിക്കുമെന്ന് അധികൃതർ അറിയിച്ചു.