breaking news New

മെസിയെ കേരളത്തിലെത്തിക്കുമെന്ന പേരിൽ നടന്നത് കേരളത്തെ കബളിപ്പിച്ച തട്ടിപ്പ് : ദുരൂഹ ഇടപാടുകൾ നടന്നെന്ന് രമേശ് ചെന്നിത്തല

തിരുവനന്തപുരം: ഫുട്ബോൾ ഇതിഹാസം ലയണൽ മെസിയെ കേരളത്തിലെത്തിക്കുമെന്ന പേരിൽ നടന്ന തട്ടിപ്പ് കേരളത്തെ മുഴുവൻ കബളിപ്പിച്ച സംഭവമാണെന്ന് ആഭ്യന്തര മന്ത്രി രമേശ് ചെന്നിത്തല. ഇടപാടുകളിൽ ദുരൂഹതയുണ്ടെന്നും സംഭവത്തിൽ നിഷ്പക്ഷമായ അന്വേഷണം നടക്കണമെന്നും അദ്ദേഹം ആവശ്യപ്പെട്ടു.

മുൻ കായികമന്ത്രി വി. അബ്ദുറഹ്മാനെ കേസിൽ പ്രതിചേർത്ത നടപടിക്ക് ഗവർണറുടെ അനുമതി ലഭിച്ചിരുന്നുവെന്നും ചെന്നിത്തല വ്യക്തമാക്കി. ആരെയും സംരക്ഷിക്കാതെ അന്വേഷണസംഘം വസ്തുതകൾ പുറത്തുകൊണ്ടുവരണമെന്നും അദ്ദേഹം പറഞ്ഞു.

അതേസമയം, അധ്യാപക സംഘടനകൾ സെക്രട്ടേറിയറ്റ് വളയൽ സമരം നടത്തുന്നതിനെയും ചെന്നിത്തല വിമർശിച്ചു. കഴിഞ്ഞ 11 വർഷക്കാലം നടപ്പാക്കാൻ കഴിയാത്ത കാര്യങ്ങൾ ആറുമാസം കൊണ്ട് സർക്കാർ ചെയ്യണമെന്ന് ആവശ്യപ്പെടുന്നത് ശരിയല്ലെന്നാണ് അദ്ദേഹത്തിന്റെ നിലപാട്.

സമരം ഉദ്ഘാടനം ചെയ്യാൻ മുൻ മുഖ്യമന്ത്രി തന്നെ എത്തുന്നത് പരിഹാസ്യമാണ്. പത്ത് വർഷത്തോളം സമരം ചെയ്യാൻ കഴിയാതിരുന്നതിന്റെ ദുഃഖമാണ് ഇപ്പോഴത്തെ നീക്കത്തിന് പിന്നിലെന്നും ഇക്കാര്യം ജനങ്ങൾ തിരിച്ചറിയണമെന്നും അദ്ദേഹം കൂട്ടിച്ചേർത്തു.

അതിനിടെ, മെസിയെ കേരളത്തിലെത്തിക്കുമെന്ന പേരിൽ നടന്ന തട്ടിപ്പുമായി ബന്ധപ്പെട്ട കേസിൽ മുൻ കായികമന്ത്രി വി. അബ്ദുറഹ്മാൻ, മുൻ പ്രൈവറ്റ് സെക്രട്ടറി സി. സത്യപാലൻ, മുൻ സ്പോർട്സ് കൗൺസിൽ പ്രസിഡന്റ് യു. ഷറഫലി എന്നിവരെ പ്രതിചേർത്തുകൊണ്ടുള്ള ഉത്തരവ് പുറത്തിറങ്ങിയിരുന്നു.

കേസിന്റെ തുടർനടപടികളുടെ ഭാഗമായി തിങ്കളാഴ്ച കളമശ്ശേരി കോടതിയിൽ പ്രത്യേക അന്വേഷണസംഘം (SIT) റിപ്പോർട്ട് സമർപ്പിക്കും. റിപ്പോർട്ടോടെ കേസിൽ കൂടുതൽ നിർണായക വിവരങ്ങൾ പുറത്തുവരുമെന്നാണ് പ്രതീക്ഷ.

CENTRAL MEDIA NEWS DESK | 🌐 www.cmediaonline.in


സി മീഡിയ ന്യൂസിൽ നിന്നും ഉള്ള വാർത്തകൾ തുടർന്നും ലഭിക്കുവാൻ, സി മീഡിയ ഓൺലൈൻ ന്യൂസ് & ഇൻഫോ വാട്സ്ആപ്പ് ഗ്രൂപ്പിൽ അംഗമാകുവാൻ ഈ ലിങ്കിൽ ക്ലിക്ക് ചെയ്യുക… 👇

https://chat.whatsapp.com/BhxxZeoiXdI3KXQy5t182Y?s=cl&p=a&mlu=4