കൊച്ചി : വിദേശത്തുനിന്ന് വിലകൂടിയ ഐഫോൺ നാട്ടിലെത്തിച്ച കോഴിക്കോട് സ്വദേശിക്ക് കസ്റ്റംസിന്റെ കുരുക്ക്. അബുദാബിയിൽ നിന്ന് കൊച്ചിയിലെത്തിച്ച ഐഫോൺ 16 പ്രോയ്ക്ക് കസ്റ്റംസ് ഡ്യൂട്ടി അടയ്ക്കാൻ വിസമ്മതിച്ചതോടെയാണ് ഫോൺ കണ്ടുകെട്ടാനുള്ള നടപടികളിലേക്ക് അധികൃതർ നീങ്ങുന്നത്.
കോഴിക്കോട് സ്വദേശി അജാസ് മുഹമ്മദ് ജംഷീറിനാണ് കൊച്ചി എയർപോർട്ട് കസ്റ്റംസ് കാരണം കാണിക്കൽ നോട്ടീസ് നൽകിയത്. 30 ദിവസത്തിനകം വിശദീകരണം നൽകുകയോ നിശ്ചയിച്ച കസ്റ്റംസ് ഡ്യൂട്ടി അടയ്ക്കുകയോ വേണമെന്നാണ് നിർദേശം. അല്ലാത്തപക്ഷം ഫോൺ ഔദ്യോഗികമായി കണ്ടുകെട്ടും.
ഏകദേശം ഒന്നരലക്ഷം രൂപ വിലവരുന്ന ഐഫോൺ 16 പ്രോയ്ക്ക് 25,331 രൂപയാണ് കസ്റ്റംസ് ഡ്യൂട്ടിയായി നിശ്ചയിച്ചത്. തുക അടയ്ക്കാൻ തയ്യാറാകാതിരുന്നതോടെ ഫോൺ കസ്റ്റംസ് പിടിച്ചെടുക്കുകയായിരുന്നു.
കഴിഞ്ഞ മാസം 23-ന് അബുദാബിയിൽ നിന്ന് കൊച്ചിയിലെത്തിയ അജാസിന്റെ കൈവശം രണ്ട് ഫോണുകളുണ്ടായിരുന്നു. ഇതിലൊന്ന് സ്ഥിരമായി ഉപയോഗിക്കുന്നതാണെന്ന് പരിശോധനയിൽ വ്യക്തമായി. രണ്ടാമത്തെ ഫോണും സ്വന്തം ആവശ്യത്തിനുള്ളതാണെന്നായിരുന്നു അജാസിന്റെ വിശദീകരണം. എന്നാൽ പരിശോധനയിൽ രണ്ടാമത്തെ ഫോൺ ഉപയോഗിക്കാത്ത പുതിയ ഉപകരണമാണെന്ന് കണ്ടെത്തിയെന്നാണ് കസ്റ്റംസിന്റെ വാദം.
കസ്റ്റംസ് ഡ്യൂട്ടിക്ക് പുറമേ നിയമലംഘനവുമായി ബന്ധപ്പെട്ട പിഴയും അടയ്ക്കേണ്ടിവരുമെന്ന് നോട്ടീസിൽ വ്യക്തമാക്കിയിട്ടുണ്ട്. നേരത്തെ വിമാനത്താവളത്തിൽ കുത്തിയിരുന്ന് പ്രതിഷേധിച്ച അജാസിനെ സിഐഎസ്എഫ് ഇടപെട്ടാണ് മാറ്റിയത്. ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസ്സപ്പെടുത്തിയെന്ന പരാതിയിൽ നെടുമ്പാശ്ശേരി പൊലീസും കേസെടുത്തിരുന്നു.
പ്രവാസികൾ ശ്രദ്ധിക്കേണ്ടത് പുതിയ ബാഗേജ് നിയമങ്ങൾ!
2026 ഫെബ്രുവരി 2 മുതൽ പ്രാബല്യത്തിൽ വന്ന പുതിയ ബാഗേജ് നിയമങ്ങൾ വിദേശത്തുനിന്ന് സാധനങ്ങൾ കൊണ്ടുവരുന്നവർക്ക് ഏറെ പ്രധാനപ്പെട്ടതാണ്.
വിമാനമാർഗമോ കപ്പൽമാർഗമോ ഇന്ത്യയിലെത്തുന്ന അർഹരായ യാത്രക്കാർക്ക് 75,000 രൂപ വരെയുള്ള സാധനങ്ങൾക്ക് പൊതുവായ കസ്റ്റംസ് നികുതിയിളവുണ്ട്. നേരത്തെയുണ്ടായിരുന്ന 50,000 രൂപയുടെ പരിധിയാണ് ഉയർത്തിയത്. എന്നാൽ ഈ ഇളവ് മൊബൈൽ ഫോണുകൾക്ക് മാത്രമായി ലഭിക്കുന്നതല്ല. കൊണ്ടുവരുന്ന യോഗ്യമായ സാധനങ്ങളുടെ ആകെ മൂല്യത്തിനാണ് പരിധി ബാധകമാകുന്നത്.
വിദേശത്തുനിന്ന് പുതുതായി വാങ്ങിയ ഫോൺ സ്വന്തം ഉപയോഗത്തിനാണെന്ന് പറഞ്ഞതുകൊണ്ടുമാത്രം നികുതിയിളവ് ലഭിക്കില്ല. ഫോണിന്റെ വില, ഉപയോഗനില, മറ്റ് സാധനങ്ങൾ എന്നിവയുൾപ്പെടെയുള്ള കാര്യങ്ങൾ കസ്റ്റംസ് പരിശോധിക്കും. ഫോൺ ബോക്സ് ഒഴിവാക്കിയാൽ നികുതി ഒഴിവാകുമെന്ന ധാരണയും ശരിയല്ല.
അതേസമയം, ഒരാൾക്ക് ഒരു മൊബൈൽ ഫോൺ മാത്രമേ കൊണ്ടുവരാനാകൂ എന്ന പ്രത്യേക നിയന്ത്രണം പുതിയ നിയമത്തിലില്ല. എന്നാൽ നികുതിയിളവിന്റെ പൊതുവായ പരിധിയും മറ്റ് വ്യവസ്ഥകളും പാലിക്കേണ്ടതുണ്ട്.
ലാപ്ടോപ്പിനും സ്വർണത്തിനും പ്രത്യേക ഇളവ്
18 വയസ്സ് പൂർത്തിയായ ഓരോ യാത്രക്കാരനും ഒരു പുതിയ ലാപ്ടോപ് നികുതിയില്ലാതെ കൊണ്ടുവരാം. 75,000 രൂപയുടെ പൊതുവായ നികുതിയിളവിൽനിന്ന് വ്യത്യസ്തമായ പ്രത്യേക ആനുകൂല്യമാണിത്.
സ്വർണാഭരണങ്ങളുടെ കാര്യത്തിലും പ്രവാസികൾക്ക് ഇളവുകളുണ്ട്. ഒരു വർഷത്തിലധികമായി വിദേശത്ത് താമസിച്ച ഇന്ത്യൻ വംശജർക്ക് നാട്ടിലേക്ക് മടങ്ങുമ്പോൾ സ്ത്രീകൾക്ക് 40 ഗ്രാം വരെയും മറ്റുള്ളവർക്ക് 20 ഗ്രാം വരെയും സ്വർണാഭരണങ്ങൾ നികുതിയില്ലാതെ കൊണ്ടുവരാം. എന്നാൽ സ്വർണക്കട്ടികൾക്കും നാണയങ്ങൾക്കും ഈ ഇളവ് ബാധകമല്ല.
വിദേശത്തുനിന്ന് ഐഫോണും മറ്റ് വിലകൂടിയ ഇലക്ട്രോണിക് ഉപകരണങ്ങളും നാട്ടിലെത്തിക്കുന്ന പ്രവാസികൾക്ക് പുതിയ ബാഗേജ് നിയമങ്ങളെക്കുറിച്ചുള്ള വ്യക്തമായ അറിവ് അനിവാര്യമാണ്. ചെറിയ അശ്രദ്ധ പോലും വിമാനത്താവളത്തിൽ വലിയ സാമ്പത്തിക ബാധ്യതയ്ക്ക് കാരണമാകാം.
CENTRAL MEDIA NEWS DESK | 🌐 www.cmediaonline.in
വിദേശത്തുനിന്ന് ഐഫോൺ കൊണ്ടുവന്നാൽ കുടുങ്ങുമോ ? ഒന്നരലക്ഷത്തിന്റെ ഫോണിന് 25,331 രൂപ നികുതി ; പ്രവാസികൾ അറിയേണ്ട പുതിയ ബാഗേജ് നിയമങ്ങളും ചർച്ചയിൽ
Advertisement
Advertisement
Advertisement