breaking news New

കേരളത്തിൽ പുതിയ ത്രീ സ്റ്റാർ ബാറുകൾക്ക് ലൈസൻസ് ഇല്ല ! നഗരങ്ങളിൽ രാത്രി 12 വരെ മാത്രം പ്രവർത്തനം ; കരട് മദ്യനയത്തിൽ വൻ നിയന്ത്രണ നിർദേശങ്ങൾ

തിരുവനന്തപുരം: സംസ്ഥാനത്തെ മദ്യവിൽപ്പനയിലും ബാർ ലൈസൻസ് വ്യവസ്ഥകളിലും നിർണായക മാറ്റങ്ങൾക്ക് വഴിയൊരുക്കുന്ന കരട് മദ്യനയവുമായി സർക്കാർ.

പുതിയ ത്രീ സ്റ്റാർ ഹോട്ടലുകൾക്ക് ബാർ ലൈസൻസ് അനുവദിക്കേണ്ടതില്ലെന്നതാണ് പ്രധാന നിർദേശം. നിലവിൽ പ്രവർത്തിക്കുന്ന ത്രീ സ്റ്റാർ ബാറുകൾക്ക് ലൈസൻസ് പുതുക്കി നൽകുമെങ്കിലും പുതിയ സ്ഥാപനങ്ങൾക്ക് അനുമതി നൽകില്ല. മദ്യലഭ്യത ഘട്ടംഘട്ടമായി കുറയ്ക്കുകയാണ് ലക്ഷ്യം. കരടിന് യു.ഡി.എഫിന്റെയും മന്ത്രിസഭയുടെയും അന്തിമ അംഗീകാരം ലഭിക്കേണ്ടതുണ്ട്.

നിലവിൽ കേരളത്തിൽ പ്രവർത്തിക്കുന്ന 906 ബാറുകളിൽ 515 എണ്ണവും ത്രീ സ്റ്റാർ വിഭാഗത്തിലാണ്. 308 ഫോർ സ്റ്റാർ, 57 ഫൈവ് സ്റ്റാർ, 26 ഹെറിറ്റേജ് ബാറുകളുമുണ്ട്. നിലവിലുള്ള ലൈസൻസുകൾ പുതുക്കാൻ അനുമതിയുള്ളതിനാൽ പുതിയ നിയന്ത്രണം വന്നാലും ബാറുകളുടെ എണ്ണത്തിൽ ഉടനടി കുറവുണ്ടാകില്ല.

2014ൽ ഉമ്മൻചാണ്ടി സർക്കാർ ഫൈവ് സ്റ്റാർ ഹോട്ടലുകൾക്ക് മാത്രമായി ബാർ ലൈസൻസ് പരിമിതപ്പെടുത്തിയിരുന്നു. പിന്നീട് ഒന്നാം പിണറായി വിജയൻ സർക്കാർ ത്രീ സ്റ്റാർ ഹോട്ടലുകൾക്കും അതിനു മുകളിലുള്ളവയ്ക്കും ലൈസൻസ് അനുവദിക്കുന്ന രീതിയിൽ നയം മാറ്റി. ഈ വ്യവസ്ഥയിൽ വീണ്ടും മാറ്റം കൊണ്ടുവരാനാണ് പുതിയ കരട് ലക്ഷ്യമിടുന്നത്.

പുതിയ ബവ്റിജസ് ഔട്ട്‌ലെറ്റുകൾ ആരംഭിക്കേണ്ടതില്ലെന്നും കരടിൽ നിർദേശമുണ്ട്. നിലവിലുള്ള ഔട്ട്‌ലെറ്റുകൾ മാറ്റിസ്ഥാപിക്കേണ്ടിവന്നാൽ പാർക്കിങ് സൗകര്യം ഉൾപ്പെടെ ബാർ ലൈസൻസിന് ബാധകമായ മാനദണ്ഡങ്ങൾ പാലിക്കേണ്ടിവരും.

നഗരങ്ങളിൽ രാത്രി 12 വരെ മാത്രം ബാറുകൾ

ബാറുകളുടെ പ്രവർത്തനസമയത്തിലും നിയന്ത്രണം കൊണ്ടുവരാനാണ് എക്സൈസ് വകുപ്പിന്റെ ആലോചന. നഗരപ്രദേശങ്ങളിലെ ബാറുകൾ രാത്രി 12 മണിവരെ മാത്രമായി പരിമിതപ്പെടുത്താനാണ് നിർദേശം. എന്നാൽ വിമാനത്താവളങ്ങൾ, ഐടി പാർക്കുകൾ, വിനോദസഞ്ചാര കേന്ദ്രങ്ങൾ എന്നിവയ്ക്ക് സമീപമുള്ള ഗ്രാമീണ മേഖലകളിലെ ബാറുകൾക്ക് പ്രത്യേക ഇളവുകൾ അനുവദിച്ചേക്കും. രാത്രി ജോലി ചെയ്യുന്നവരുടെയും വിനോദസഞ്ചാരികളുടെയും സൗകര്യം പരിഗണിച്ചായിരിക്കും പ്രത്യേക മേഖലകൾ വിജ്ഞാപനം ചെയ്യുക.

മദ്യപിച്ച് വാഹനമോടിച്ചാൽ ബാറുടമകൾക്കും ഉത്തരവാദിത്തം

മദ്യപിച്ച് വാഹനമോടിക്കുന്നവരെ നിയന്ത്രിക്കാൻ ബാറുടമകൾക്കും ഉത്തരവാദിത്തം നിശ്ചയിക്കുന്ന നിയമനിർമാണവും പരിഗണനയിലുണ്ട്. ബാറിൽനിന്ന് മദ്യപിച്ചിറങ്ങുന്നവർ സ്വയം വാഹനമോടിച്ച് പോകുന്നത് തടയാൻ പ്രത്യേക ഡ്രൈവർമാരെയോ മറ്റ് യാത്രാസൗകര്യങ്ങളോ ഏർപ്പെടുത്തേണ്ടിവരും. മദ്യപിച്ചുള്ള വാഹനാപകടങ്ങൾ കുറയ്ക്കുകയാണ് ലക്ഷ്യം.

മദ്യലഭ്യത നിയന്ത്രിക്കുന്നതിനൊപ്പം ടൂറിസം മേഖലയ്ക്ക് പ്രത്യേക പരിഗണന നൽകാനും കരടിൽ നിർദേശമുണ്ട്. അംഗീകൃത ഹോംസ്റ്റേകളുടെയോ റിസോർട്ടുകളുടെയോ പരിധിയിലുള്ള തെങ്ങിൻതോപ്പുകളിൽ ടൂറിസം സംരംഭകർക്ക് കള്ളുഷാപ്പുകൾ നടത്താൻ അനുമതി നൽകാനാണ് ആലോചന. എന്നാൽ ഇത്തരം ഷാപ്പുകളിൽ വിനോദസഞ്ചാരികൾക്ക് മാത്രമായിരിക്കും കള്ള് വിതരണം ചെയ്യാൻ അനുമതി.

മദ്യലഭ്യത നിയന്ത്രണം, ബാർ പ്രവർത്തനസമയത്തിലെ മാറ്റം, പുതിയ ലൈസൻസുകൾക്കുള്ള നിയന്ത്രണം, ടൂറിസം മേഖലയ്ക്കുള്ള ഇളവുകൾ എന്നിവ ഉൾപ്പെടുന്ന കരട് മദ്യനയം അന്തിമമായി അംഗീകരിക്കപ്പെടുകയാണെങ്കിൽ സംസ്ഥാനത്തെ മദ്യവിൽപ്പന സംവിധാനത്തിൽ ശ്രദ്ധേയമായ മാറ്റങ്ങളുണ്ടാകും.

കരട് നിർദേശങ്ങൾ മാത്രമാണ് നിലവിലുള്ളത്. അന്തിമ മദ്യനയത്തിൽ മാറ്റങ്ങൾ വരാം.

CENTRAL MEDIA NEWS DESK | 🌐 www.cmediaonline.in


സി മീഡിയ ന്യൂസിൽ നിന്നും ഉള്ള വാർത്തകൾ തുടർന്നും ലഭിക്കുവാൻ, സി മീഡിയ ഓൺലൈൻ ന്യൂസ് & ഇൻഫോ വാട്സ്ആപ്പ് ഗ്രൂപ്പിൽ അംഗമാകുവാൻ ഈ ലിങ്കിൽ ക്ലിക്ക് ചെയ്യുക… 👇

https://chat.whatsapp.com/BhxxZeoiXdI3KXQy5t182Y?s=cl&p=a&mlu=4