28-ാം തീയതിമുതല്‍ മൂന്ന് ദിവസം ബാങ്ക് ജീവനക്കാര്‍ പണിമുടക്ക് പ്രഖ്യാപിച്ച സാഹചര്യത്തിലാണ് കേന്ദ്രസര്‍ക്കാരിന്റെ നിര്‍ണായക നീക്കം. ഫോര്‍ത്ത് സാറ്റര്‍ഡേ, ഞായറാഴ്ച പിന്നെ മൂന്ന് ദിവസത്തെ പണിമുടക്ക് എന്നിങ്ങനെ 5 ബാങ്ക് അവധികള്‍ അടുപ്പിച്ചുവരുന്നത് തടയിടാനാണ് സര്‍ക്കാര്‍ നീക്കം. ഞായറാഴ്ച ബാങ്കുകള്‍ തുറന്നുപ്രവര്‍ത്തിക്കുന്നതിന് റിസര്‍വ് ബാങ്ക് അനുമതി നല്‍കി. രാജ്യത്തെ എല്ലാ പൊതുമേഖല, പ്രാദേശിക ബാങ്കുകളും വരുന്ന ഞായറാഴ്ച (സെപ്റ്റംബര്‍ 27) സാധാരണ പോലെ തുറന്നു പ്രവര്‍ത്തിക്കുമെന്ന് ധനമന്ത്രാലയം അറിയിച്ചു.

അടുപ്പിച്ച് വരുന്ന 3 ദിവസത്തെ പണിമുടക്കും അതിന് മുമ്പുള്ള ബാങ്ക് അവധിയും ജനങ്ങള്‍ക്കുണ്ടാക്കുന്ന പ്രയാസം വലുതാണ്. തുടര്‍ന്നാണ് പൊതുജനങ്ങള്‍ക്കുള്ള ബാങ്കിങ് സേവനങ്ങള്‍ മുടങ്ങാതിരിക്കാനുള്ള നീക്കം. പണിമുടക്കില്‍ നിന്ന് പിന്മാറണമെന്ന് സര്‍ക്കാരും ബാങ്ക് മാനേജ്‌മെന്റുകളും ജീവനക്കാരോട് ആവശ്യപ്പെട്ടിട്ടുണ്ടെന്നും ധന മന്ത്രാലയം അറിയിച്ചു.

ഡപ്യൂട്ടി ചീഫ് ലേബര്‍ കമ്മിഷണറുടെ മധ്യസ്ഥതയില്‍ നടന്ന അനുരഞ്ജന യോഗം പരാജയപ്പെട്ടതോടെ തിങ്കളാഴ്ച ആരംഭിക്കുന്ന പണിമുടക്കില്‍ വിട്ടുവീഴ്ച വേണ്ടെന്ന നിലപാടില്‍ പൊതുമേഖലാ ബാങ്ക് ജീവനക്കാര്‍. ബാങ്കുകളുടെ പ്രവൃത്തിദിനം 5 ദിവസമാക്കുന്ന കാര്യം പരിഗണനയിലാണെന്ന പതിവുമറുപടി മാത്രമാണ് ലഭിച്ചതെന്നും ഇതില്‍ തീരുമാനമായാലേ പണിമുടക്കിന്റെ കാര്യം പുനഃപരിശോധിക്കൂ എന്ന നിലപാടിലാണ് യൂണിയനുകള്‍.

സെപ്റ്റംബര്‍ 28 മുതല്‍ 30 വരെയാണ് പണിമുടക്ക് പ്രഖ്യാപിച്ചിരുന്നത്. ഇതിനു തൊട്ടുമുന്‍പുള്ള രണ്ടുദിവസങ്ങള്‍ നാലാം ശനിയാഴ്ചയും ഞായറാഴ്ചയും ആയതിനാല്‍ ഫലത്തില്‍, അഞ്ച് ദിവസം ബാങ്കിങ് സേവനങ്ങള്‍ തടസ്സപ്പെടുന്ന സാഹചര്യം കണക്കിലെടുത്താണ് ഞായറാഴ്ച ബാങ്കുകള്‍ തുറന്ന് പ്രവര്‍ത്തിക്കാന്‍ കേന്ദ്രസര്‍ക്കാര്‍ തീരുമാനിച്ചത്.

ബാങ്ക് ജീവനക്കാരുടെ സംഘടനകളുടെ ഐക്യവേദിയായ യുണൈറ്റഡ് ഫോറം ഓഫ് ബാങ്ക് യൂണിയന്‍സാണ് (യു.എഫ്.ബി.യു.) പണിമുടക്കിന് ആഹ്വാനം ചെയ്തത്. സെപ്റ്റംബര്‍ 28 തിങ്കള്‍ മുതല്‍ 30 ബുധന്‍ വരെയാണ് പണിമുടക്ക്. സെപ്റ്റംബര്‍ 30 ബാങ്കുകളുടെ അര്‍ധവാര്‍ഷിക കണക്കെടുപ്പ് നടക്കുന്ന ദിവസമാണ്. ട്രഷറി പ്രവര്‍ത്തനങ്ങള്‍ ഉള്‍പ്പെടെയുള്ളവയ്ക്ക് ഈ തീയതി നിര്‍ണായകമാണ്. പണിമുടക്ക് ബാങ്കുകളുടെ കണക്കെടുപ്പുകളെയും വിപണി ക്രമീകരണങ്ങളെയും ബാധിച്ചേക്കാം.

പണിമുടക്കിന്റെ പശ്ചാത്തലത്തില്‍ ബാങ്കിങ് ഇടപാടുകള്‍ മുന്‍കൂട്ടി പൂര്‍ത്തിയാക്കാനും ഡിജിറ്റല്‍ സേവനങ്ങള്‍ ഉപയോഗിക്കാനും ഉപഭോക്താക്കള്‍ക്ക് ബാങ്കുകള്‍ നിര്‍ദേശം നല്‍കി. സമരം പരിഗണിച്ച് എടിഎമ്മുകളില്‍ പണം നിറയ്ക്കാന്‍ നടപടി സ്വീകരിച്ചതായി ബാങ്കുകള്‍ അറിയിച്ചു. ഉപഭോക്താക്കളുടെ ആശങ്ക പരിഹരിക്കാന്‍ എസ്.ബി.ഐ., ബാങ്ക് ഓഫ് ബറോഡ, കനറാ ബാങ്ക് ഉള്‍പ്പെടെയുള്ളവ ജാഗ്രതാനിര്‍ദേശം നല്‍കിയിട്ടുണ്ട്. ബ്രാഞ്ചുകളിലെ സേവനങ്ങള്‍ തടസ്സപ്പെടുമെങ്കിലും ഡിജിറ്റല്‍, എടിഎം ഇടപാടുകള്‍ നടത്താമെന്ന് ബാങ്കുകള്‍ അറിയിച്ചു.

സമരത്തിന്റെ മൂന്നാം ഘട്ടമായി, ഒക്ടോബര്‍ 26 മുതല്‍ അനിശ്ചിതകാല പണിമുടക്ക് ആരംഭിക്കുമെന്നും ജീവനക്കാര്‍ മുന്നറിയിപ്പ് നല്‍കിയിട്ടുണ്ട്.