റിസർവ് ബാങ്ക് ഓഫ് ഇന്ത്യ (ആർബിഐ) ആഭ്യന്തര പണമിടപാട് (Domestic Money Transfer – DMT) സംവിധാനത്തിൽ സമഗ്രമായ മാറ്റങ്ങൾ കൊണ്ടുവന്നു. നവംബർ 11 മുതൽ പ്രാബല്യത്തിൽ വന്ന പുതിയ മാർഗനിർദ്ദേശങ്ങൾ പ്രകാരം ബാങ്ക് അക്കൗണ്ട് ഇല്ലാത്തവർക്കും ഇനി പണം അയക്കാനും സ്വീകരിക്കാനും സാധിക്കും.

നിർബന്ധിത തിരിച്ചറിയൽ രേഖകളോ മേൽവിലാസം തെളിയിക്കുന്ന രേഖകളോ ഇല്ലാത്തവർക്ക് പോലും സുരക്ഷിതമായ ബാങ്കിംഗ് സേവനങ്ങൾ ലഭ്യമാക്കുകയാണ് പുതിയ പരിഷ്കാരങ്ങളുടെ പ്രധാന ലക്ഷ്യം. കുടിയേറ്റ തൊഴിലാളികൾ, ദിവസക്കൂലിക്കാർ, അസംഘടിത മേഖലയിലെ ജീവനക്കാർ തുടങ്ങിയവർക്ക് ഇത് വലിയ ആശ്വാസമാകുമെന്നാണ് വിലയിരുത്തൽ.

ഒറ്റത്തവണ 50,000 രൂപ വരെ അയക്കാം

പുതിയ സംവിധാനത്തിന്റെ ഭാഗമായി 'ക്യാഷ് പേ-ഇൻ' സേവനം അവതരിപ്പിച്ചിട്ടുണ്ട്. ഇതിലൂടെ ഒരാൾക്ക് ബാങ്ക് ശാഖയിലെത്തി ഒറ്റത്തവണയായി 50,000 രൂപ വരെ മറ്റൊരാളുടെ ബാങ്ക് അക്കൗണ്ടിലേക്ക് നിക്ഷേപിക്കാം. എൻഇഎഫ്ടി (NEFT) സംവിധാനത്തിലൂടെയാണ് പണം കൈമാറുക. ഇതിനായി പണം അയക്കുന്നയാൾ അതത് ബാങ്കിലെ രജിസ്റ്റർ ചെയ്ത ഉപഭോക്താവായിരിക്കണമെന്ന നിബന്ധനയില്ല.

ബാങ്ക് അക്കൗണ്ടില്ലാത്തവർക്കും പണം ലഭിക്കും

'ക്യാഷ് പേ-ഔട്ട്' സേവനവും പുതിയ പരിഷ്കാരത്തിലുണ്ട്. സാധാരണ ബാങ്ക് ഉപഭോക്താവിന്റെ അക്കൗണ്ടിൽനിന്ന് പണം പിൻവലിച്ച് ബാങ്ക് അക്കൗണ്ടില്ലാത്ത മറ്റൊരാൾക്ക് പണമായി നൽകാൻ ഇതിലൂടെ സാധിക്കും. എടിഎമ്മുകൾ, അംഗീകൃത ബിസിനസ് കറസ്പോണ്ടന്റുകൾ (BC) തുടങ്ങിയ പേയ്മെന്റ് ചാനലുകൾ വഴി ഗുണഭോക്താക്കൾക്ക് പണം കൈപ്പറ്റാം.

ക്യാഷ് പേ-ഔട്ടിന് പരിധികൾ

പുതിയ നിയമപ്രകാരം ബാങ്ക് അക്കൗണ്ടില്ലാത്ത ഒരാൾക്ക് ഒറ്റ ഇടപാടിൽ പരമാവധി 10,000 രൂപ വരെ സ്വീകരിക്കാം. ഒരു വ്യക്തിക്ക് ഒരു മാസത്തിൽ ലഭിക്കാവുന്ന ആകെ തുകയുടെ പരിധി 25,000 രൂപയാണ്.

പണമിടപാടുകൾ കൂടുതൽ ലളിതവും സുരക്ഷിതവുമാക്കുന്നതിനൊപ്പം സാമ്പത്തിക സേവനങ്ങൾ സാധാരണക്കാരിലേക്ക് എത്തിക്കാനും പുതിയ പരിഷ്കാരങ്ങൾ സഹായിക്കുമെന്നാണ് ആർബിഐയുടെ പ്രതീക്ഷ. രാജ്യത്തെ അടിസ്ഥാനതല സമ്പദ്‌വ്യവസ്ഥയെ ശക്തിപ്പെടുത്തുന്നതിനും സാമ്പത്തിക ഉൾപ്പെടുത്തൽ വിപുലീകരിക്കുന്നതിനും ഈ നീക്കം നിർണായകമാകുമെന്നാണ് വിലയിരുത്തൽ.

CENTRAL MEDIA NEWS DESK | 🌐 www.cmediaonline.in