വർഷങ്ങളായി ഉൽപാദനം നിലച്ച് നിശ്ചലമായിരുന്ന കായംകുളം എൻടിപിസി താപനിലയം വീണ്ടും സജീവമാകുന്നു. നാഫ്തയുടെ ഉയർന്ന വിലയെ തുടർന്ന് അടച്ചുപൂട്ടേണ്ടിവന്ന നിലയത്തിൽ മെഥനോൾ ഉപയോഗിച്ചുള്ള പരീക്ഷണ വൈദ്യുതി ഉൽപാദനം വിജയകരമായതും, ഇന്ത്യൻ ഓയിൽ കോർപ്പറേഷന്റെ (ഐഒസി) എൽഎൻജി പൈപ്പ് ലൈൻ പദ്ധതിക്ക് കേന്ദ്രാനുമതി ലഭിച്ചതും കേരളത്തിന്റെ ഊർജമേഖലയിൽ പുതിയ പ്രതീക്ഷകൾക്ക് വഴിയൊരുക്കുകയാണ്.

മെഥനോൾ ഉപയോഗിച്ച് വൈദ്യുതി ഉൽപാദിപ്പിച്ച് സംസ്ഥാനത്തിന് കൈമാറിയതോടെ കായംകുളം നിലയത്തിന്റെ പുനരുജ്ജീവനത്തിന് ആദ്യ ചുവടുവെപ്പായി. ദീർഘകാലമായി ഉപയോഗശൂന്യമായി കിടക്കുന്ന നിലയം വീണ്ടും പൂർണതോതിൽ പ്രവർത്തിപ്പിക്കാനായാൽ സംസ്ഥാനത്തിന്റെ വൈദ്യുതി ഉൽപാദനശേഷിയിൽ വലിയ വർധനയുണ്ടാകുമെന്നാണ് പ്രതീക്ഷ.

നാഫ്ത ഇന്ധനമാക്കി 360 മെഗാവാട്ട് ശേഷിയിൽ പ്രവർത്തിച്ചിരുന്ന കായംകുളം നിലയത്തിന് ഉൽപാദനച്ചെലവ് അമിതമായതാണ് തിരിച്ചടിയായത്. ഒരു യൂണിറ്റ് വൈദ്യുതി ഉൽപാദിപ്പിക്കാൻ 16 രൂപ വരെ ചെലവ് വന്നതോടെ 2017 മുതൽ കെഎസ്ഇബി ഇവിടെനിന്നുള്ള വൈദ്യുതി വാങ്ങുന്നത് നിർത്തി. സംഭരിച്ചിരുന്ന നാഫ്ത ഉപയോഗിച്ചു തീർക്കുന്നതിനായി 2021 മാർച്ചിൽ അവസാനമായി പ്രവർത്തിപ്പിച്ച ശേഷം പ്ലാന്റ് പൂർണമായും അടച്ചിടുകയായിരുന്നു.

തുടർന്ന് ചെലവ് കുറഞ്ഞ ബദൽ ഇന്ധനങ്ങൾ ഉപയോഗിച്ച് നിലയം വീണ്ടും പ്രവർത്തിപ്പിക്കാനുള്ള സാധ്യതകളാണ് എൻടിപിസി പരിശോധിച്ചത്.

വൈദ്യുതി ഉൽപാദനത്തിന് മെഥനോൾ ഉപയോഗിക്കുന്ന പരീക്ഷണത്തിന് കായംകുളം നിലയത്തിലാണ് തുടക്കമിട്ടത്. എൻടിപിസിയും പൊതുമേഖലാ സ്ഥാപനമായ ഭാരത് ഹെവി ഇലക്ട്രിക്കൽസ് ലിമിറ്റഡും (ഭെൽ) സംയുക്തമായാണ് ഇതിനാവശ്യമായ സാങ്കേതികവിദ്യ വികസിപ്പിച്ചത്.

പരീക്ഷണത്തിന്റെ ഭാഗമായി ഏകദേശം 100 മെഗാവാട്ട് വൈദ്യുതി ഉൽപാദിപ്പിച്ച് സൗജന്യമായി സംസ്ഥാനത്തിന് കൈമാറിയതായാണ് റിപ്പോർട്ട്. ഈ പരീക്ഷണം വിജയിച്ചതോടെ മറ്റ് നിലയങ്ങളിലും മെഥനോൾ ഉപയോഗിച്ച് വൈദ്യുതി ഉൽപാദിപ്പിക്കാനുള്ള സാധ്യതകൾ എൻടിപിസി പരിഗണിക്കുന്നുണ്ട്.

എൽഎൻജി പൈപ്പ് ലൈൻ വരുന്നു ; കായംകുളത്തിന് പുതിയ ഊർജം

കായംകുളം നിലയത്തിന്റെ ഭാവി നിർണയിക്കുന്ന മറ്റൊരു പ്രധാന നീക്കമാണ് ഇന്ത്യൻ ഓയിൽ കോർപ്പറേഷന്റെ കൊച്ചി–തൂത്തുക്കുടി എൽഎൻജി വിതരണ പൈപ്പ് ലൈൻ പദ്ധതി. കൊച്ചിയിൽനിന്ന് കോട്ടയം, കൊട്ടാരക്കര, കൊല്ലം വഴി കടന്നുപോകുന്ന 424 കിലോമീറ്ററിലധികം ദൈർഘ്യമുള്ള പദ്ധതിക്ക് കേന്ദ്രത്തിന്റെ അനുമതി ലഭിച്ചതായാണ് വിവരം.

ഈ പാതയിൽനിന്ന് കോട്ടയം അല്ലെങ്കിൽ കൊട്ടാരക്കര ഭാഗത്തുനിന്ന് ഏകദേശം 50 കിലോമീറ്റർ ദൈർഘ്യമുള്ള ലിങ്ക് പൈപ്പ് ലൈൻ കൂടി സ്ഥാപിച്ചാൽ കായംകുളത്തേക്ക് എൽഎൻജി എത്തിക്കാനാകും.

എൽഎൻജി ലഭ്യമാകുന്നതോടെ കായംകുളം നിലയത്തിൽ 2,400 മെഗാവാട്ട് വരെ വൈദ്യുതി ഉൽപാദിപ്പിക്കാനുള്ള സാധ്യതയാണ് മുന്നിലുള്ളത്. ഇതിനാവശ്യമായ സാങ്കേതിക മാറ്റങ്ങൾക്കായി വർഷങ്ങൾക്കുമുമ്പ് തന്നെ എൻടിപിസി കോടികൾ ചെലവഴിച്ചിരുന്നു. എന്നാൽ വാതകവിതരണ സംവിധാനം ഇല്ലാത്തതിനാൽ ഈ സൗകര്യങ്ങൾ ഉപയോഗിക്കാനാകാതെ കിടക്കുകയായിരുന്നു.

വൈദ്യുതി ഉപഭോഗം ഏറ്റവും ഉയരുന്ന പീക്ക് സമയങ്ങളിൽ പുറത്തുനിന്ന് ഉയർന്ന നിരക്കിൽ വൈദ്യുതി വാങ്ങേണ്ടിവരുന്നത് കെഎസ്ഇബിക്ക് വലിയ സാമ്പത്തിക ബാധ്യതയാണ്. ഈ സാഹചര്യത്തിൽ കായംകുളം നിലയം വീണ്ടും പ്രവർത്തനക്ഷമമാകുന്നത് സംസ്ഥാനത്തിന് വലിയ ആശ്വാസമാകും.

നിലയം പ്രവർത്തിക്കാതിരുന്നിട്ടും പരിപാലനച്ചെലവുകൾ ഉൾപ്പെടെയുള്ള ബാധ്യതകൾ സംസ്ഥാനത്തിന് നേരിടേണ്ടിവന്നിരുന്നു. പ്ലാന്റ് പൂർണതോതിൽ പ്രവർത്തിപ്പിക്കാൻ കഴിഞ്ഞാൽ നിലവിലെ നഷ്ടങ്ങൾ കുറയ്ക്കുന്നതിനൊപ്പം ആഭ്യന്തര വൈദ്യുതി ഉൽപാദനവും വർധിപ്പിക്കാനാകും.

നിലയത്തിന് പ്രതിവർഷം വലിയ തുക ചെലവഴിച്ചിട്ടും വൈദ്യുതി ലഭിക്കാത്ത സാഹചര്യം നേരത്തെ വലിയ വിവാദമായിരുന്നു. സ്ഥലം തിരിച്ചെടുക്കുന്നതുൾപ്പെടെയുള്ള കർശന നടപടികൾ പരിഗണിക്കണമെന്ന് സംസ്ഥാന പബ്ലിക് അക്കൗണ്ട്സ് കമ്മിറ്റി ആവശ്യപ്പെട്ടിരുന്നു. കേന്ദ്ര-സംസ്ഥാന ഊർജവകുപ്പുകൾ അടിയന്തരമായി ഇടപെടണമെന്ന ആവശ്യവും ഉയർന്നിരുന്നു.

ഫ്ലോട്ടിംഗ് സോളാറും താപവൈദ്യുതിയും ; കായംകുളത്തിന് ഇരട്ട സാധ്യത

നിലവിൽ കായംകുളത്തെ ജലാശയത്തിൽ സ്ഥാപിച്ച ഫ്ലോട്ടിംഗ് സോളാർ പ്ലാന്റിൽനിന്ന് 92 മെഗാവാട്ട് സൗരവൈദ്യുതിയാണ് ലഭിക്കുന്നത്. യൂണിറ്റിന് 2.68 രൂപ നിരക്കിൽ 25 വർഷത്തേക്കാണ് കെഎസ്ഇബി കരാറിലേർപ്പെട്ടിരിക്കുന്നത്.

എന്നാൽ സംസ്ഥാനത്തിന്റെ വർധിച്ചുവരുന്ന വൈദ്യുതി ആവശ്യകത കണക്കിലെടുക്കുമ്പോൾ ഈ ഉൽപാദനം പരിമിതമാണ്. സോളാർ വൈദ്യുതിക്കൊപ്പം താപനിലയം കൂടി പ്രവർത്തനസജ്ജമായാൽ കായംകുളം കേരളത്തിന്റെ പ്രധാന വൈദ്യുതി ഉൽപാദന കേന്ദ്രങ്ങളിലൊന്നായി മാറും.

കുറഞ്ഞ നിരക്കിൽ വൈദ്യുതി ലഭിക്കുമോ? നിർണായകം ഇന്ധനവില

പദ്ധതിയുടെ വിജയത്തിൽ ഏറ്റവും പ്രധാനപ്പെട്ട ഘടകം ഇന്ധനത്തിന്റെ വിലയാണ്. അന്താരാഷ്ട്ര വിപണിയിലെ എൽഎൻജി വിലയിലെ ഏറ്റക്കുറച്ചിലുകൾ വൈദ്യുതി ഉൽപാദനച്ചെലവിനെ ബാധിക്കാം. അതിനാൽ ദീർഘകാലത്തേക്ക് കുറഞ്ഞ നിരക്കിൽ എൽഎൻജി ലഭ്യമാക്കുന്നതിനുള്ള കരാറുകൾ ഉറപ്പാക്കേണ്ടതുണ്ട്.

സംസ്ഥാന സർക്കാരും കേന്ദ്ര ഊർജമന്ത്രാലയവും എൻടിപിസിയും ഏകോപനത്തോടെ പ്രവർത്തിച്ചാൽ കായംകുളം നിലയത്തിന്റെ പുനരുജ്ജീവനം യാഥാർഥ്യമാക്കാനാകും.

മെഥനോൾ പരീക്ഷണത്തിന്റെ വിജയം ആദ്യ പ്രതീക്ഷ നൽകിയിരിക്കുകയാണ്. എൽഎൻജി പൈപ്പ് ലൈൻ കൂടി യാഥാർഥ്യമായാൽ വർഷങ്ങളായി നിശ്ചലമായിരുന്ന കായംകുളത്തെ വമ്പൻ ടർബൈനുകൾ വീണ്ടും കറങ്ങിത്തുടങ്ങും. കേരളത്തിന്റെ വൈദ്യുതി പ്രതിസന്ധിക്ക് വലിയൊരു പരിഹാരമാകുമോ കായംകുളത്തിന്റെ തിരിച്ചുവരവ്? ഇനി ഉറ്റുനോക്കുന്നത് തുടർനടപടികളിലേക്കാണ്.