breaking news New

ബിജെപിയോട് വിടപറയാൻ പത്മജ വേണുഗോപാൽ ? കോൺഗ്രസിലേക്ക് മടങ്ങാൻ നീക്കം ; തിരിച്ചുവരവിനെതിരെ തൃശൂരിൽ എതിർപ്പ് ശക്തം

തൃശൂർ: ബിജെപിയിൽ നിന്ന് പത്മജ വേണുഗോപാൽ രാജിവെച്ചേക്കുമെന്ന് സൂചന. ഇന്ന് രാജിപ്രഖ്യാപനം ഉണ്ടായേക്കുമെന്നാണ് പുറത്തുവരുന്ന വിവരം.

വ്യക്തിപരമായ കാരണങ്ങളാണ് രാജിക്ക് പിന്നിലെന്നാണ് വിശദീകരണമെങ്കിലും ബിജെപിയിൽ അർഹമായ പരിഗണനയും പ്രതീക്ഷിച്ച സ്ഥാനമാനങ്ങളും ലഭിക്കാത്തതിലുള്ള അതൃപ്തിയാണ് തീരുമാനത്തിന് പിന്നിലെന്നാണ് സൂചന.

ബിജെപി സംസ്ഥാന നേതൃത്വം തന്നെ ഒറ്റപ്പെടുത്തിയെന്ന ആരോപണവും പത്മജ ഉയർത്തിയിട്ടുണ്ട്. ബിജെപിയുമായുള്ള ബന്ധം കുടുംബബന്ധങ്ങളെപ്പോലും ബാധിക്കുന്നുവെന്ന് നേരത്തെ പ്രതികരിച്ചിരുന്ന അവർ, ഇക്കാര്യങ്ങൾ സംസ്ഥാന നേതൃത്വത്തെ അറിയിച്ചതായും വ്യക്തമാക്കിയിട്ടുണ്ട്. കുടുംബപ്രശ്നമായതിനാൽ ഇക്കാര്യത്തിൽ കൂടുതൽ ചർച്ചകൾക്കില്ലെന്നാണ് പത്മജയുടെ നിലപാട്.

അതേസമയം, ബിജെപി വിട്ടാൽ പത്മജയുടെ അടുത്ത രാഷ്ട്രീയ നീക്കം കോൺഗ്രസിലേക്കായിരിക്കുമെന്ന അഭ്യൂഹവും ശക്തമാണ്. സഹോദരനും മന്ത്രിയുമായ കെ. മുരളീധരൻ ഉൾപ്പെടെയുള്ളവർ തിരിച്ചുവരവിനെ സ്വാഗതം ചെയ്തതായാണ് വിവരം. കോൺഗ്രസിലെ പ്രമുഖ നേതാക്കളുമായും പത്മജ ആശയവിനിമയം നടത്തിയതായാണ് സൂചന.

കോൺഗ്രസിലേക്കുള്ള മടക്കവുമായി ബന്ധപ്പെട്ട് ആദ്യം സംസാരിച്ചത് കെ. മുരളീധരനോടാണെന്നും വിഷയം പാർട്ടി നേതൃത്വവുമായി ചർച്ച ചെയ്യാനായിരുന്നു അദ്ദേഹത്തിന്റെ നിർദേശമെന്നും റിപ്പോർട്ടുകളുണ്ട്. തുടർന്ന് സംസ്ഥാന നേതൃത്വവുമായും മുഖ്യമന്ത്രിയുമായും ആശയവിനിമയം നടത്തിയതായും വിവരങ്ങൾ പുറത്തുവരുന്നു.

എന്നാൽ പത്മജയുടെ തിരിച്ചുവരവിന് കോൺഗ്രസിനുള്ളിൽ തന്നെ എല്ലാവരുടെയും പിന്തുണയില്ല. പ്രത്യേകിച്ച് തൃശൂർ ജില്ലയിലെ ഒരു വിഭാഗം നേതാക്കളും പ്രവർത്തകരും കടുത്ത എതിർപ്പിലാണ്. കോൺഗ്രസിലുണ്ടായിരുന്ന കാലം മുതൽ പത്മജയുമായി അഭിപ്രായവ്യത്യാസം പുലർത്തിയിരുന്ന വിഭാഗമാണ് ഇപ്പോൾ തിരിച്ചുവരവിനെതിരെ രംഗത്തെത്തിയിരിക്കുന്നത്.

പത്മജയെ തിരിച്ചെടുക്കരുതെന്നാവശ്യപ്പെട്ട് സംസ്ഥാന നേതൃത്വത്തെ സമീപിക്കാനും ഈ വിഭാഗം നീക്കം നടത്തുന്നുണ്ട്.

ബിജെപിയിൽ അവഗണനയെന്ന് പരാതി, കോൺഗ്രസിലേക്ക് മടങ്ങാൻ നീക്കം. പത്മജയുടെ രാഷ്ട്രീയ തിരിച്ചുവരവ് തൃശൂരിൽ പുതിയ പോരിന് വഴിയൊരുക്കുമോ?

CENTRAL MEDIA NEWS DESK | 🌐 www.cmediaonline.in


സി മീഡിയ ന്യൂസിൽ നിന്നും ഉള്ള വാർത്തകൾ തുടർന്നും ലഭിക്കുവാൻ, സി മീഡിയ ഓൺലൈൻ ന്യൂസ് & ഇൻഫോ വാട്സ്ആപ്പ് ഗ്രൂപ്പിൽ അംഗമാകുവാൻ ഈ ലിങ്കിൽ ക്ലിക്ക് ചെയ്യുക… 👇

https://chat.whatsapp.com/BhxxZeoiXdI3KXQy5t182Y?s=cl&p=a&mlu=4