തിരുവനന്തപുരം : വിഷയത്തിൽ പാർലമെന്ററി പാർട്ടി യോഗത്തിൽ നേതാക്കളുമായി വാക്കേറ്റമുണ്ടായതിനെത്തുടർന്ന് മാത്യു കുഴൽനാടൻ എംഎൽഎ യോഗത്തിൽനിന്ന് ഇറങ്ങിപ്പോയി. മുഖ്യമന്ത്രി വി.ഡി. സതീശൻ ഉൾപ്പെടെയുള്ളവർ വ്യത്യസ്ത നിലപാട് സ്വീകരിച്ചതോടെ യോഗത്തിൽ മാത്യു കുഴൽനാടൻ ഒറ്റപ്പെട്ടെന്നാണ് റിപ്പോർട്ടുകൾ.

പിണറായി വിജയനെതിരെ നേരത്തെ തന്നെ എഫ്ഐആർ രജിസ്റ്റർ ചെയ്യേണ്ടതായിരുന്നുവെന്നാണ് മാത്യു കുഴൽനാടന്റെ നിലപാട്. കേസിൽ സർക്കാർ സ്വീകരിച്ച സമീപനം ശരിയായില്ലെന്നും ഉമ്മൻചാണ്ടിക്ക് ലഭിക്കാത്ത നീതി പിണറായി വിജയന് നൽകേണ്ടതില്ലെന്നും അദ്ദേഹം യോഗത്തിൽ അഭിപ്രായപ്പെട്ടു. മാസപ്പടി കേസിൽ നിയമനടപടികളുമായി മുന്നോട്ടുപോയത് തന്റെ കൂടി പോരാട്ടത്തിന്റെ ഭാഗമാണെന്നും കുഴൽനാടൻ വ്യക്തമാക്കി.

എന്നാൽ, കേസിൽ ധൃതിപിടിച്ച് എഫ്ഐആർ രജിസ്റ്റർ ചെയ്യേണ്ടതില്ലെന്ന നിലപാടാണ് മുഖ്യമന്ത്രി വി.ഡി. സതീശൻ സ്വീകരിച്ചതെന്നാണ് റിപ്പോർട്ട്. പിണറായി വിജയനെതിരെ കേസുമായി മുന്നോട്ടുപോകുന്നത് അദ്ദേഹത്തിന് രാഷ്ട്രീയമായി ഗുണകരമായേക്കാമെന്നും മുഖ്യമന്ത്രി ചൂണ്ടിക്കാട്ടി. കേസുമായി ബന്ധപ്പെട്ട് സ്വീകരിച്ച നടപടികൾക്ക് നിയമപരമായ വശങ്ങളുണ്ടെന്നും സർക്കാർ നിലപാടിനെ ന്യായീകരിച്ചുകൊണ്ട് നേതാക്കൾ വിശദീകരിച്ചു.

അതേസമയം, കേസിൽ സർക്കാർ സ്വീകരിച്ച നിലപാടിനെച്ചൊല്ലി കോൺഗ്രസിനുള്ളിൽ ഭിന്നത ചർച്ചയായിരിക്കുകയാണ്. പിണറായി വിജയനും മകൾ വീണ വിജയനും ഉൾപ്പെട്ട മാസപ്പടി ഇടപാടുമായി ബന്ധപ്പെട്ട കേസിൽ എഫ്ഐആർ രജിസ്റ്റർ ചെയ്യണമെന്ന ഉത്തരവിനെതിരായ അപ്പീലുകൾ ഹൈക്കോടതി ഡിവിഷൻ ബെഞ്ച് തള്ളിയിരുന്നു. ഇതിന് പിന്നാലെയാണ് കേസിലെ സർക്കാർ സമീപനം കോൺഗ്രസ് പാർലമെന്ററി പാർട്ടി യോഗത്തിൽ തർക്കവിഷയമായത്.