രാജ്യത്ത് അരി ഉൾപ്പെടെയുള്ള അവശ്യ ഭക്ഷ്യവസ്തുക്കളുടെ വില കുതിച്ചുയരുന്നു. മുന്നറിയിപ്പുകൾ ഉണ്ടായിട്ടും ആവശ്യമായ മുന്നൊരുക്കങ്ങൾ നടത്താത്ത കേന്ദ്ര–സംസ്ഥാന സർക്കാരുകളുടെ നയപരമായ വീഴ്ചയാണ് നിലവിലെ വിലക്കയറ്റത്തിന് കാരണമെന്ന വിമർശനം ശക്തമാകുന്നു.

ദേശീയ തലത്തിൽ അരിയുടെ വിലക്കയറ്റം സെപ്റ്റംബറിൽ 8.25 ശതമാനമായി ഉയർന്നപ്പോൾ, ഉപഭോക്തൃ സംസ്ഥാനമായ കേരളത്തിൽ അരിവിലയിൽ 20 മുതൽ 35 ശതമാനം വരെ വർധനയുണ്ടായെന്നാണ് കണക്കുകൾ സൂചിപ്പിക്കുന്നത്.

പച്ചക്കറികൾക്കും പലചരക്ക് സാധനങ്ങൾക്കും 20 മുതൽ 100 ശതമാനത്തിലധികം വരെ വില വർധിച്ചതോടെ സാധാരണക്കാരുടെ കുടുംബബജറ്റ് താളംതെറ്റുകയാണ്. കാലാവസ്ഥാ വ്യതിയാനവും എൽ നിനോ പ്രതിഭാസവും കാർഷിക ഉൽപ്പാദനത്തെ ബാധിക്കുമെന്ന് ഐക്യരാഷ്ട്രസഭ ഉൾപ്പെടെയുള്ള അന്താരാഷ്ട്ര ഏജൻസികൾ നേരത്തെ മുന്നറിയിപ്പ് നൽകിയിരുന്നു. എന്നാൽ ഭക്ഷ്യധാന്യങ്ങൾ മുൻകൂട്ടി സംഭരിക്കുന്നതിനും വിപണിയിൽ വില നിയന്ത്രിക്കുന്നതിനും ആവശ്യമായ നടപടികൾ ഉണ്ടായില്ലെന്നാണ് പ്രധാന ആരോപണം.

ഉൽപ്പാദനം കുറഞ്ഞു ; ആശങ്കയായി അരിയുടെ ലഭ്യത

2025–26 വർഷത്തിൽ രാജ്യത്ത് 15.4 കോടി ടൺ അരി ഉൽപ്പാദിപ്പിച്ചപ്പോൾ നടപ്പുവർഷം ഉൽപ്പാദനം ഏകദേശം 14.7 കോടി ടണ്ണായി കുറയുമെന്നാണ് വിലയിരുത്തൽ. ഖാരിഫ് സീസണിൽ നെൽകൃഷി ചെയ്ത ഭൂവിസ്തൃതി 449.18 ലക്ഷം ഹെക്ടറിൽ നിന്ന് 433.62 ലക്ഷം ഹെക്ടറായി കുറഞ്ഞതായും കണക്കുകൾ വ്യക്തമാക്കുന്നു. ഏകദേശം 3.46 ശതമാനത്തിന്റെ കുറവാണിത്.

എൽ നിനോ പ്രതിഭാസത്തിന്റെ സാധ്യതയും കുറഞ്ഞ മൺസൂൺ മഴയുമെല്ലാം മുൻകൂട്ടി പ്രവചിക്കപ്പെട്ടിരുന്നെങ്കിലും പ്രതിസന്ധി നേരിടാനുള്ള ബദൽ സംവിധാനങ്ങൾ ഒരുക്കുന്നതിൽ കേന്ദ്ര സർക്കാർ പരാജയപ്പെട്ടുവെന്നാണ് വിമർശനം.

ഭക്ഷ്യധാന്യം എഥനോൾ നിർമ്മാണത്തിന് ; വിവാദമായി കേന്ദ്ര തീരുമാനം

അരിയുടെ ലഭ്യത കുറയുന്ന സാഹചര്യത്തിൽ ഫുഡ് കോർപറേഷൻ ഓഫ് ഇന്ത്യയുടെ (FCI) ശേഖരത്തിൽനിന്ന് എഥനോൾ നിർമ്മാണത്തിനായി 72 ലക്ഷം ടൺ അരി അനുവദിച്ചതായുള്ള റിപ്പോർട്ടുകളും വിവാദത്തിന് വഴിവെച്ചിട്ടുണ്ട്. മുൻവർഷം അനുവദിച്ചത് 52 ലക്ഷം ടണ്ണായിരുന്നു. ഇതിന് പുറമെ 55 ലക്ഷം ടൺ നുറുക്ക് അരി വിൽക്കാനും അനുമതി നൽകിയതായാണ് ദേശീയ മാധ്യമ റിപ്പോർട്ടുകൾ.

ഭക്ഷ്യധാന്യങ്ങളുടെ ലഭ്യതയിൽ ആശങ്ക നിലനിൽക്കുമ്പോൾ ഇത്രയധികം അരി എഥനോൾ നിർമ്മാണത്തിനായി മാറ്റിവയ്ക്കേണ്ടതുണ്ടോയെന്ന ചോദ്യവും ഉയരുന്നുണ്ട്. ഭക്ഷ്യസുരക്ഷയ്ക്ക് മുൻഗണന നൽകേണ്ട സമയത്ത് ഇത്തരം തീരുമാനങ്ങൾ പുനഃപരിശോധിക്കണമെന്നാണ് വിമർശകരുടെ ആവശ്യം.

കേരളത്തിലും വിപണി ഇടപെടൽ ദുർബലം

അരി ഉൾപ്പെടെയുള്ള ഭക്ഷ്യവസ്തുക്കളുടെ ഉൽപ്പാദനം ഉപഭോഗത്തേക്കാൾ വളരെ കുറവായ കേരളത്തിൽ വിലക്കയറ്റത്തിന്റെ ആഘാതം കൂടുതൽ രൂക്ഷമാണ്. മാവേലി സ്റ്റോറുകൾ, സപ്ലൈകോ, ത്രിവേണി സഹകരണ വിപണനശാലകൾ തുടങ്ങിയ സംവിധാനങ്ങളിലൂടെ വിപണിയിൽ ഇടപെട്ട് വില നിയന്ത്രിക്കുന്ന മുൻകാല നടപടികൾ നിലവിലെ സാഹചര്യത്തിൽ ഫലപ്രദമായി നടപ്പാക്കുന്നില്ലെന്നാണ് വിമർശനം.

മറ്റ് സംസ്ഥാനങ്ങളിൽനിന്ന് അരിയും ഭക്ഷ്യവസ്തുക്കളും സംഭരിച്ച് സബ്സിഡി നിരക്കിൽ വിതരണം ചെയ്യുക, റേഷൻ കാർഡ് ഉടമകൾക്ക് അധിക അരി ലഭ്യമാക്കുക തുടങ്ങിയ നടപടികൾ ശക്തമാക്കേണ്ടതുണ്ടെന്നും ആവശ്യമുയരുന്നു.

സാധാരണക്കാരുടെ അടുക്കളകളിലേക്ക് പ്രതിസന്ധി

പശ്ചിമേഷ്യൻ സംഘർഷത്തെ തുടർന്നുള്ള ഇന്ധനവില വർധനയും ഗതാഗതച്ചെലവിലെ വർധനയും ഭക്ഷ്യവിലയെ നേരത്തെ തന്നെ ബാധിച്ചിരുന്നു. അതിനുപുറമെ കാർഷിക ഉൽപ്പാദനത്തിലെ കുറവും ഭക്ഷ്യസംഭരണത്തിലെ വീഴ്ചകളും വിപണിയിലെ വിലക്കയറ്റം കൂടുതൽ രൂക്ഷമാക്കിയെന്നാണ് വിലയിരുത്തൽ.

വിലക്കയറ്റം നിയന്ത്രിക്കാൻ കേന്ദ്ര–സംസ്ഥാന സർക്കാരുകൾ അടിയന്തരമായി ഇടപെടണമെന്നും പൊതുവിപണിയിൽ ഭക്ഷ്യവസ്തുക്കളുടെ ലഭ്യത ഉറപ്പാക്കണമെന്നും ആവശ്യമുയരുന്നു. അല്ലാത്തപക്ഷം അരിവില ഉൾപ്പെടെയുള്ള അവശ്യസാധനങ്ങളുടെ വിലക്കയറ്റം സാധാരണക്കാരുടെ ജീവിതച്ചെലവ് ഇനിയും ഉയർത്തുമെന്ന ആശങ്ക ശക്തമാണ്.

CENTRAL MEDIA NEWS DESK | SPECIAL REPORTS

🌐 www.cmediaonline.in