കള്ളപ്പണം തടയാനും ഡിജിറ്റൽ ഇടപാടുകൾ പ്രോത്സാഹിപ്പിക്കാനും ലക്ഷ്യമിട്ട് നടപ്പാക്കിയ നോട്ട് നിരോധനം പത്തുവർഷത്തിലേക്ക് കടക്കുമ്പോൾ, പ്രഖ്യാപിത ലക്ഷ്യങ്ങൾ എത്രത്തോളം കൈവരിച്ചുവെന്ന ചോദ്യമുയർത്തി പുതിയ കണക്കുകൾ.

രാജ്യത്ത് ഡിജിറ്റൽ പണമിടപാടുകൾ വ്യാപകമായെങ്കിലും കറൻസിയിലുള്ള ആശ്രിതത്വം കുറയ്ക്കാൻ കഴിഞ്ഞില്ലെന്നാണ് റിസർവ് ബാങ്കിന്റെ കണക്കുകൾ വ്യക്തമാക്കുന്നത്.

2016 നവംബർ എട്ടിനാണ് 500, 1000 രൂപ നോട്ടുകൾ അസാധുവാക്കുന്നതായി കേന്ദ്ര സർക്കാർ പ്രഖ്യാപിച്ചത്. അന്ന് രാജ്യത്ത് പ്രചാരത്തിലുണ്ടായിരുന്ന കറൻസിയുടെ ആകെ മൂല്യം 17.77 ട്രില്യൺ രൂപയായിരുന്നു. എന്നാൽ 2026 ഒക്ടോബർ 23 ആയപ്പോഴേക്കും ഇത് 43.16 ട്രില്യൺ രൂപയായി ഉയർന്നു. ഏകദേശം 143 ശതമാനത്തിന്റെ വർധനയാണ് പത്തുവർഷത്തിനിടെ രേഖപ്പെടുത്തിയത്.

നോട്ട് നിരോധനത്തിലൂടെ പ്രചാരത്തിലുണ്ടായിരുന്ന കറൻസിയുടെ 86.9 ശതമാനവും ഒറ്റരാത്രികൊണ്ട് അസാധുവായി. ഇതോടെ രാജ്യത്ത് കടുത്ത പണക്ഷാമം അനുഭവപ്പെടുകയും ഉപഭോക്താക്കളും വ്യാപാര സ്ഥാപനങ്ങളും പണമിടപാടുകൾക്കായി ബദൽ സംവിധാനങ്ങളെ ആശ്രയിക്കേണ്ടിവരികയും ചെയ്തു.

പണക്ഷാമം പരിഹരിക്കുന്നതിനായി റിസർവ് ബാങ്ക് പുതിയ നോട്ടുകൾ പുറത്തിറക്കി. അതേസമയം, ഡിജിറ്റൽ പണമിടപാടുകളും അതിവേഗം വ്യാപിച്ചു. യു.പി.ഐ ഉൾപ്പെടെയുള്ള സംവിധാനങ്ങൾ ദൈനംദിന ഇടപാടുകളിൽ വലിയ മാറ്റം സൃഷ്ടിച്ചെങ്കിലും പണത്തിന്റെ ഉപയോഗം കുറയുന്നതിന് പകരം വർധിക്കുകയാണുണ്ടായത്.

ആർ.ബി.ഐ കണക്കുകൾ പ്രകാരം, 2026 സാമ്പത്തിക വർഷാവസാനത്തിൽ പ്രചാരത്തിലുള്ള കറൻസിയുടെ മൂല്യം 41.68 ട്രില്യൺ രൂപയിലെത്തി. മുൻ സാമ്പത്തിക വർഷത്തെ അപേക്ഷിച്ച് 11.9 ശതമാനത്തിന്റെ വർധനയാണിത്. തുകയുടെ അടിസ്ഥാനത്തിൽ 4.44 ട്രില്യൺ രൂപയുടെ വർധന. 2018 സാമ്പത്തിക വർഷത്തിന് ശേഷമുള്ള ഏറ്റവും വലിയ വർധനയാണിതെന്നും കണക്കുകൾ സൂചിപ്പിക്കുന്നു.

ഡിജിറ്റൽ ഇടപാടുകളും കറൻസി ഉപയോഗവും ഒരേസമയം വർധിക്കുന്നു എന്നതാണ് നിലവിലെ സാമ്പത്തിക സാഹചര്യത്തിന്റെ പ്രത്യേകതയെന്ന് ആർ.ബി.ഐ വിലയിരുത്തുന്നു.

നോട്ട് നിരോധനത്തിലൂടെ കള്ളപ്പണം തടയുക, പൗരന്മാരുടെ അക്കൗണ്ടുകളിലേക്ക് പണം എത്തിക്കുക, ഡിജിറ്റൽ സമ്പദ്‌വ്യവസ്ഥയ്ക്ക് വേഗം കൂട്ടുക തുടങ്ങിയ ലക്ഷ്യങ്ങൾ മുന്നോട്ടുവച്ചിരുന്നു. എന്നാൽ പത്തുവർഷത്തിനിപ്പുറം പ്രചാരത്തിലുള്ള കറൻസിയുടെ അളവ് ഇരട്ടിയിലധികമായി വർധിച്ച സാഹചര്യത്തിൽ, നോട്ട് നിരോധനത്തിന്റെ യഥാർത്ഥ നേട്ടങ്ങളെക്കുറിച്ചുള്ള വിലയിരുത്തലുകൾ വീണ്ടും പ്രസക്തമാവുകയാണ്.

C-MEDIA NEWS DESK വാർത്തകൾ | വിശകലനങ്ങൾ | പൊതുജനങ്ങൾക്കൊപ്പം www.cmediaonline.in