പ്രവാസി മലയാളികൾ നേരിടുന്ന സാമ്പത്തിക പ്രതിസന്ധി പരിഹരിക്കാൻ വിമാനക്കമ്പനികളുമായി ചർച്ച നടത്തി നിരക്ക് കുറയ്ക്കുന്നതിനുള്ള നടപടികൾ സ്വീകരിക്കണമെന്നാണ് ആവശ്യം.

അവധിക്കാലവും ഗൾഫ് രാജ്യങ്ങളിലെ സ്കൂളുകൾ വീണ്ടും തുറക്കുന്നതും കാരണം കേരളത്തിലേക്കും തിരിച്ചുമുള്ള യാത്രക്കാരുടെ എണ്ണം വർധിച്ചിരിക്കുകയാണ്. ഇതോടെ പല ഗൾഫ്-കേരള റൂട്ടുകളിലും വിമാന ടിക്കറ്റ് നിരക്ക് സാധാരണ നിരക്കിന്റെ അഞ്ചും ആറുമടങ്ങ് വരെ ഉയർന്നതായി കത്തിൽ ചൂണ്ടിക്കാട്ടുന്നു.

സാധാരണയായി 6,000 മുതൽ 12,000 രൂപ വരെ ലഭിച്ചിരുന്ന ചില ടിക്കറ്റുകൾക്ക് നിലവിൽ വലിയ തുകയാണ് ഈടാക്കുന്നത്. ചില റൂട്ടുകളിൽ ഇക്കോണമി ക്ലാസ് ടിക്കറ്റ് നിരക്ക് 1.17 ലക്ഷം രൂപ കടന്നതായും ചില ഘട്ടങ്ങളിൽ 1.5 ലക്ഷം രൂപ വരെ എത്തിയതായും കത്തിൽ പറയുന്നു.

അയൽ സംസ്ഥാനങ്ങളിലെ വിമാനത്താവളങ്ങളിൽ നിന്ന് ഗൾഫ് രാജ്യങ്ങളിലേക്കുള്ള നിരക്കുമായി താരതമ്യം ചെയ്യുമ്പോൾ കേരളത്തിൽനിന്നുള്ള ടിക്കറ്റ് നിരക്കിലെ വ്യത്യാസവും ചൂണ്ടിക്കാട്ടിയിട്ടുണ്ട്. കർണാടക, തമിഴ്നാട്, മഹാരാഷ്ട്ര എന്നിവിടങ്ങളിൽനിന്ന് ഗൾഫ് നഗരങ്ങളിലേക്ക് ഏകദേശം 30,000 രൂപ നിരക്കിൽ ടിക്കറ്റുകൾ ലഭിക്കുന്ന സാഹചര്യത്തിലാണ് കേരളത്തിലെ ഉയർന്ന നിരക്ക്.

കേരളത്തിന്റെ സമ്പദ്‌വ്യവസ്ഥയിൽ പ്രവാസി സമൂഹം നിർണായക പങ്കാണ് വഹിക്കുന്നത്. കുടുംബത്തോടൊപ്പം ഓണം ആഘോഷിക്കാൻ നാട്ടിലെത്താൻ ആഗ്രഹിക്കുന്ന പ്രവാസികൾക്ക് അമിതമായ വിമാന നിരക്ക് വലിയ സാമ്പത്തിക ബാധ്യത സൃഷ്ടിക്കുന്നുവെന്നും യാത്രയ്ക്കായി കടം വാങ്ങേണ്ട സാഹചര്യം ഉണ്ടാകുന്നത് ആശങ്കാജനകമാണെന്നും കത്തിൽ പറയുന്നു.

പ്രശ്നത്തിന്റെ ഗൗരവം കണക്കിലെടുത്ത് സിവിൽ ഏവിയേഷൻ മന്ത്രാലയവും ഡയറക്ടറേറ്റ് ജനറൽ ഓഫ് സിവിൽ ഏവിയേഷനും (DGCA) അടിയന്തരമായി ഇടപെടണമെന്ന് ആവശ്യപ്പെട്ടു. കേരളത്തിൽനിന്നുള്ള വിമാന സർവീസുകളുടെ എണ്ണം വർധിപ്പിക്കുക, ബന്ധപ്പെട്ട വിമാനക്കമ്പനികളുടെ യോഗം വിളിച്ച് നിരക്ക് നിയന്ത്രിക്കുന്നതിനുള്ള നടപടികൾ സ്വീകരിക്കുക തുടങ്ങിയ ആവശ്യങ്ങളും ഉന്നയിച്ചിട്ടുണ്ട്.

യാത്രക്കാരുടെ അധിക ആവശ്യം പരിഹരിക്കുന്നതിനായി സാധ്യമാകുന്ന റൂട്ടുകളിൽ ചാർട്ടേഡ് വിമാന സർവീസുകൾ ഉൾപ്പെടെ ഏർപ്പെടുത്താൻ കേന്ദ്ര സർക്കാർ നടപടി സ്വീകരിക്കണമെന്നും കത്തിൽ ആവശ്യപ്പെട്ടു.