ആധുനിക മെട്രോ റെയില്‍ സംവിധാനങ്ങളുടെ മാതൃകയില്‍ കൃത്രിമബുദ്ധി അധിഷ്ഠിത ചാറ്റ്‌ബോട്ട് ഉപയോഗിച്ചാണ് കെ.എസ്.ആര്‍.ടി.സി. തങ്ങളുടെ പുതിയ വാട്‌സ്ആപ്പ് ടിക്കറ്റിങ് പ്ലാറ്റ്ഫോം സജ്ജമാക്കിയിരിക്കുന്നത്.

പൊതുജനങ്ങള്‍ക്ക് ഏറെ ഉപകാരപ്രദമാകുന്ന ഈ പദ്ധതിയോടെ കെ.എസ്.ആര്‍.ടി.സിയുടെ ടിക്കറ്റിങ് രീതിയില്‍ വലിയൊരു സാങ്കേതിക മുന്നേറ്റത്തിനാണ് വഴിതുറക്കുന്നത്. യാത്രക്കാര്‍ക്ക് യാതൊരുവിധ ബുദ്ധിമുട്ടുകളുമില്ലാതെ തങ്ങളുടെ ഫോണിലുള്ള വാട്‌സ്ആപ്പ് വഴി തന്നെ നിമിഷങ്ങള്‍ക്കുള്ളില്‍ ബസ് ടിക്കറ്റുകള്‍ ബുക്ക് ചെയ്യാന്‍ ഇതിലൂടെ സാധിക്കും. പദ്ധതിയുടെ സംസ്ഥാനതല ഉദ്ഘാടനം തിരുവനന്തപുരം മസ്‌കറ്റ് ഹോട്ടലില്‍ വെച്ച് നടക്കും. ചടങ്ങില്‍ ഗതാഗത വകുപ്പ് മന്ത്രി സി.പി. ജോണ്‍ ഉദ്ഘാടനം നിര്‍വ്വഹിക്കും. ഇതിനായി കെ.എസ്.ആര്‍.ടി.സി.യുടെ ഔദ്യോഗിക വാട്‌സ്ആപ്പ് നമ്പറും ഉടന്‍ തന്നെ പൊതുജനങ്ങള്‍ക്കായി പുറത്തുവിടും.

പുതിയ സംവിധാനത്തിലൂടെ യാത്രക്കാര്‍ക്ക് വാട്‌സ്ആപ്പ് ചാറ്റിലൂടെ തന്നെ യാത്ര ആരംഭിക്കുന്ന സ്ഥലവും ലക്ഷ്യസ്ഥാനവും തീയതിയും തെരഞ്ഞെടുത്ത് വളരെ എളുപ്പത്തില്‍ ടിക്കറ്റ് ബുക്ക് ചെയ്യാം. ടിക്കറ്റ് തുക ഡിജിറ്റലായി ഒടുക്കുന്നതോടെ ക്യൂ ആര്‍ കോഡ് അടങ്ങിയ ടിക്കറ്റ് വാട്‌സ്ആപ്പില്‍ തന്നെ ലഭ്യമാകും. ഭാഷാപരമായ തടസ്സങ്ങള്‍ ഒഴിവാക്കാന്‍ വിപുലമായ സൗകര്യങ്ങളാണ് എ.ഐ. ചാറ്റ്‌ബോട്ടില്‍ ഒരുക്കിയിരിക്കുന്നത്.

ആശയവിനിമയത്തിനായി മലയാളം, ഇംഗ്ലീഷ് എന്നീ പ്രധാന ഭാഷകള്‍ക്ക് പുറമേ, സാധാരണക്കാര്‍ വ്യാപകമായി ഉപയോഗിക്കുന്ന 'മംഗ്ലീഷ്' (മലയാളം ഇംഗ്ലീഷ് അക്ഷരങ്ങളില്‍ എഴുതുന്ന രീതി) ഭാഷയും ചാറ്റ്‌ബോട്ട് പൂര്‍ണ്ണമായി പിന്തുണയ്ക്കും.

ടിക്കറ്റ് ബുക്കിങ്ങിന് പുറമേ, യാത്ര സംബന്ധമായ വിവരങ്ങളും സമയക്രമങ്ങളും സംശയങ്ങളും ഈ ചാറ്റ്‌ബോട്ട് വഴി ഉടനടി അറിയാന്‍ സാധിക്കും. സാങ്കേതിക പരിജ്ഞാനം കുറവുള്ള സാധാരണക്കാര്‍ക്കും വളരെ ലളിതമായി ഉപയോഗിക്കാവുന്ന രീതിയിലാണ് എ.ഐ. അധിഷ്ഠിത ചാറ്റ്‌ബോട്ട് രൂപകല്‍പ്പന ചെയ്തിരിക്കുന്നത്. കെ.എസ്.ആര്‍.ടി.സി. സേവനങ്ങള്‍ കൂടുതല്‍ വേഗത്തിലും സുതാര്യമായും സാധാരണക്കാരിലേക്ക് എത്തിക്കുന്നതിനുള്ള വലിയൊരു ഡിജിറ്റല്‍ മാറ്റത്തിനാണ് ഇതിലൂടെ തുടക്കമാകുന്നത്. ആപ്പുകള്‍ ഡൗണ്‍ലോഡ് ചെയ്യാതെയും മറ്റ് വെബ്സൈറ്റുകളില്‍ കയറാതെയും ടിക്കറ്റ് ഉറപ്പാക്കാം എന്നത് യാത്രക്കാര്‍ക്ക് വലിയ ആശ്വാസമാകും.

അതേസമയം,
വരാനിരിക്കുന്ന ഓണക്കാലത്തെ കനത്ത തിരക്ക് പരിഗണിച്ച് കെ.എസ്.ആര്‍.ടി.സി. ഏര്‍പ്പെടുത്തിയ പ്രത്യേക അന്തര്‍സംസ്ഥാന സര്‍വീസുകളുടെ ഓണ്‍ലൈന്‍ ബുക്കിങ് ആരംഭിച്ചതായി അധികൃതര്‍ അറിയിച്ചു. മലയാളി യാത്രക്കാരുടെ സൗകര്യാര്‍ത്ഥം വിവിധ അയല്‍ സംസ്ഥാന നഗരങ്ങളില്‍ നിന്ന് വിപുലമായ സര്‍വീസുകളാണ് ക്രമീകരിച്ചിരിക്കുന്നത്. കേരളത്തില്‍നിന്ന് ബെംഗളൂരു, മൈസൂരു, ചെന്നൈ തുടങ്ങിയ പ്രധാന നഗരങ്ങളിലേക്ക് ഈ മാസം 18 മുതല്‍ സെപ്റ്റംബര്‍ ഒന്ന് വരെയും, തിരികെ ഓണത്തിന് ശേഷം ഓഗസ്റ്റ് 19 മുതല്‍ സെപ്റ്റംബര്‍ രണ്ട് വരെയുമാണ് പ്രത്യേക സര്‍വീസുകള്‍ നടത്തുന്നത്. ബെംഗളൂരുവില്‍നിന്ന് കോഴിക്കോട്ടേക്ക് എട്ടും കണ്ണൂര്‍, എറണാകുളം എന്നിവിടങ്ങളിലേക്ക് നാലും തൃശൂരിലേക്ക് മൂന്നും കോട്ടയത്തേക്ക് രണ്ടും ബസുകള്‍ പ്രത്യേകമായി സര്‍വീസ് നടത്തും.

കൂടാതെ മലപ്പുറം, ആലപ്പുഴ, കൊല്ലം, കൊട്ടാരക്കര, പുനലൂര്‍, ചേര്‍ത്തല, ഹരിപ്പാട്, പയ്യന്നൂര്‍, കാഞ്ഞങ്ങാട്, തിരുവനന്തപുരം എന്നിവിടങ്ങളിലേക്കും ബെംഗളൂരുവില്‍നിന്ന് സൂപ്പര്‍ ഡീലക്സ്, സ്പെഷ്യല്‍ ഫാസ്റ്റ് സര്‍വീസുകളുണ്ടാകും. മൈസൂരുവില്‍നിന്ന് കണ്ണൂരിലേക്ക് രണ്ടും എറണാകുളം, തൃശൂര്‍ എന്നിവിടങ്ങളിലേക്ക് ഓരോ ബസും സര്‍വീസ് നടത്തും. ചെന്നൈയില്‍നിന്ന് തിരുവനന്തപുരത്തേക്ക് സൂപ്പര്‍ ഡീലക്സും എറണാകുളത്തേക്ക് മള്‍ട്ടി ആക്സില്‍ എ.സിയുമാണ് ക്രമീകരിച്ചിരിക്കുന്നത്.

എല്ലാ പ്രത്യേക ബസുകള്‍ക്കും ഓണ്‍ലൈന്‍ വഴി മുന്‍കൂട്ടി ടിക്കറ്റെടുക്കാനുള്ള സൗകര്യമുണ്ട്. യാത്രികര്‍ക്ക് www.keralartc.com എന്ന ഔദ്യോഗിക വെബ്സൈറ്റ് വഴിയും 'എന്റെ കെ.എസ്.ആര്‍.ടി.സി. നിയോ ഒ.പി.ആര്‍.എസ്' (Ente KSRTC Neo OPRS) എന്ന മൊബൈല്‍ ആപ്ലിക്കേഷന്‍ വഴിയും ടിക്കറ്റുകള്‍ മുന്‍കൂട്ടി റിസര്‍വ് ചെയ്ത് യാത്ര സുരക്ഷിതമാക്കാവുന്നതാണ്.