തിരഞ്ഞെടുപ്പുകള്‍ വിജയിക്കുന്നത് നമ്മള്‍ ചെയ്യുന്ന വികസന പ്രവര്‍ത്തനങ്ങള്‍ കൊണ്ടല്ലെന്ന കേന്ദ്ര ആഭ്യന്തര മന്ത്രി അമിത് ഷായുടെ വാക്കുകള്‍ ഓര്‍മ്മിപ്പിച്ചുകൊണ്ടാണ് ഇന്ത്യന്‍ ജനാധിപത്യത്തിന്റെ പോരായ്മകളെ അദ്ദേഹം ചൂണ്ടിക്കാണിക്കുന്നത്.

ഒരു മണ്ഡലത്തില്‍ ഒരു പാര്‍ട്ടിയോ സ്ഥാനാര്‍ത്ഥിയോ ഉയര്‍ത്തുന്ന വൈകാരികതയുടെയും വികാരങ്ങളുടെയും അടിസ്ഥാനത്തിലാണ് വിജയപരാജയങ്ങള്‍ നിര്‍ണ്ണയിക്കപ്പെടുന്നത് എന്ന് അമിത് ഷാ ഒരിക്കല്‍ തന്നോട് പറഞ്ഞതായി മുതിര്‍ന്ന ഒരു മാധ്യമപ്രവര്‍ത്തകന്‍ അടുത്തിടെ വെളിപ്പെടുത്തിയിരുന്നു. അമിത് ഷാ യഥാര്‍ത്ഥത്തില്‍ അങ്ങനെ പറഞ്ഞിട്ടുണ്ടോ ഇല്ലയോ എന്നതിനേക്കാള്‍, വര്‍ഷങ്ങളായി നാം കണ്ടുകൊണ്ടിരിക്കുന്ന ഒരു യാഥാര്‍ത്ഥ്യത്തെ ആ പ്രസ്താവന ഉള്‍ക്കൊള്ളുന്നു എന്നതാണ് ഏറ്റവും പ്രധാനപ്പെട്ട കാര്യം എന്ന് സുജിത് നായര്‍ തന്റെ കുറിപ്പില്‍ വ്യക്തമാക്കുന്നു.

ഇന്ത്യയില്‍ പലപ്പോഴും തിരഞ്ഞെടുപ്പുകള്‍ തീരുമാനിക്കപ്പെടുന്നത് ഭരണനേട്ടങ്ങളേക്കാള്‍ കൂടുതല്‍ വികാരങ്ങളുടെ അടിസ്ഥാനത്തിലാണ്. മതം, ജാതി, പ്രാദേശികവാദം, രാഷ്ട്രീയ ബ്രാന്‍ഡിംഗ് തുടങ്ങിയ സ്വത്വബോധങ്ങളുടെ പേരിലാണ് നാം വോട്ട് ചെയ്യുന്നത്. ഇവിടെ ഭരണം, വിദ്യാഭ്യാസം, ആരോഗ്യം, തൊഴില്‍, വിലക്കയറ്റം, ദീര്‍ഘകാല വികസനം എന്നിവ പലപ്പോഴും പിന്തള്ളപ്പെടുന്നു. വസ്തുതകളേക്കാള്‍ വേഗത്തില്‍ വോട്ടുകള്‍ സമാഹരിക്കാന്‍ വികാരങ്ങള്‍ക്ക് കഴിയുമെന്ന് രാഷ്ട്രീയ പാര്‍ട്ടികള്‍ക്ക് നന്നായി അറിയാം. പ്രകടനത്തേക്കാള്‍ മുന്‍തൂക്കം ഇത്തരം സ്വത്വബോധങ്ങള്‍ക്കാണ് ലഭിക്കുന്നത്. മികച്ച ഭരണനേട്ടങ്ങളെപ്പോലും തോല്‍പ്പിക്കാന്‍ ഒരു ശക്തമായ മുദ്രാവാക്യത്തിന് കഴിഞ്ഞേക്കാമെന്നും അദ്ദേഹം ചൂണ്ടിക്കാട്ടുന്നു.

ലോകത്തിലെ ഏറ്റവും വലിയ ജനാധിപത്യ രാജ്യമാണ് നമ്മുടേത്. എന്നാല്‍ ഒരു ജനാധിപത്യത്തിന്റെ ശക്തി അളക്കുന്നത് വോട്ട് ചെയ്യുന്ന ആളുകളുടെ എണ്ണം നോക്കിയല്ല, മറിച്ച് അവര്‍ തിരഞ്ഞെടുക്കുന്നതിന്റെ ഗുണനിലവാരം വെച്ചാണ്. വീണ്ടും ഭരണത്തിലേറാന്‍ അവസരം നല്‍കുന്നതിന് മുന്‍പ് ഭരണാധികാരികളോട് കൃത്യമായ ഉത്തരവാദിത്തം ആവശ്യപ്പെടേണ്ടതുണ്ട്. വരും തലമുറയ്ക്ക് മികച്ച ഒരു ഭാവി നാം ആഗ്രഹിക്കുന്നുവെങ്കില്‍, വോട്ട് ചെയ്യുന്നതിന് മുന്‍പ് നാം ചോദിക്കുന്ന ചോദ്യങ്ങളില്‍ മാറ്റം വരുത്തേണ്ടതുണ്ട്. ആരാണ് തൊഴിലവസരങ്ങള്‍ സൃഷ്ടിച്ചത്? വിദ്യാഭ്യാസ-ആരോഗ്യ മേഖലകള്‍ മികച്ചതാക്കിയത് ആരാണ്? കേവലം കെട്ടുകഥകള്‍ സൃഷ്ടിക്കുന്നതിന് പകരം ആരാണ് നമ്മുടെ ജീവിതം മെച്ചപ്പെടുത്തിയത്? എന്നീ ചോദ്യങ്ങള്‍ വോട്ടര്‍മാര്‍ ചോദിച്ചു തുടങ്ങണം.

രാജ്യം ഭരിക്കേണ്ടവരെ തിരഞ്ഞെടുക്കേണ്ടി വരുമ്പോള്‍, വികാരങ്ങളേക്കാള്‍ പ്രാധാന്യം ഭരണനേട്ടങ്ങള്‍ക്ക് തന്നെയാകണം. വൈകാരികതയേക്കാള്‍ വികസന പ്രവര്‍ത്തനങ്ങളെ ഇന്ത്യക്കാര്‍ വിലയിരുത്തിത്തുടങ്ങുന്ന അന്ന്, നമ്മുടെ ജനാധിപത്യം ലോകത്തിലെ ഏറ്റവും കരുത്തുറ്റ ഒന്നായി മാറുമെന്നും അദ്ദേഹം ഓര്‍മ്മിപ്പിക്കുന്നു. വോട്ടര്‍മാരെ ചിന്തിപ്പിക്കാന്‍ പ്രേരിപ്പിക്കുന്ന ഒരു ചോദ്യത്തോടെയാണ് കുറിപ്പ് അവസാനിക്കുന്നത്: ‘അടുത്ത തവണ വോട്ട് ചെയ്യാന്‍ ബാലറ്റ് ബോക്‌സിന് മുന്നില്‍ നില്‍ക്കുമ്പോള്‍, നിങ്ങളോട് തന്നെ ഒരു ചോദ്യം ചോദിക്കുക: ഞാന്‍ വോട്ട് ചെയ്യുന്നത് എന്റെ വികാരങ്ങളെ അടിസ്ഥാനമാക്കിയാണോ, അതോ ഇന്ത്യയുടെ ഭാവിക്ക് വേണ്ടിയാണോ?