മുന്‍ സര്‍ക്കാരിന്റെ കാലത്ത് ചട്ടങ്ങളെല്ലാം കാറ്റില്‍പ്പറത്തി ഊരാളുങ്കല്‍ ലേബര്‍ കോണ്‍ട്രാക്ട് കോ ഓപ്പറേറ്റീവ് സൊസൈറ്റിക്ക് നിയമസഭയില്‍ ലഭിച്ച അവിഹിത സ്വാധീനത്തിന്റെയും കോടികളുടെ സാമ്പത്തിക ആനുകൂല്യങ്ങളുടെയും കൃത്യമായ വിവരങ്ങളാണ് ഇപ്പോള്‍ ഉദ്യോഗസ്ഥര്‍ തന്നെ അന്വേഷണ സംഘത്തിന് മുന്നില്‍ തുറന്നു സമ്മതിച്ചിരിക്കുന്നത്.

വിവരം പുറത്തുവന്നതോടെ ഒളിച്ചുകളിക്ക് നില്‍ക്കാതെ കടുത്ത നടപടികളിലേക്ക് കടന്നിരിക്കുകയാണ് സ്പീക്കര്‍ തിരുവഞ്ചൂര്‍ രാധാകൃഷ്ണന്‍. അഴിമതിക്കാരെയും അവര്‍ക്ക് കൂട്ടുനിന്ന ഉന്നതരെയും കല്‍തുറങ്കിലടയ്ക്കാന്‍ രണ്ടും കല്‍പ്പിച്ച് സ്പീക്കര്‍ നേരിട്ട് രംഗത്തിറങ്ങിയതോടെ നിയമസഭാ സെക്രട്ടേറിയറ്റില്‍ വന്‍ ശുദ്ധീകരണത്തിനാണ് വഴിതുറന്നിരിക്കുന്നത്.

സ്പീക്കറുടെ പ്രത്യേക നിര്‍ദ്ദേശപ്രകാരം നടത്തിയ പ്രാഥമിക പരിശോധനയിലാണ് ഉദ്യോഗസ്ഥര്‍ മുന്‍ ഭരണകൂടത്തിന്റെ സമ്മര്‍ദ്ദതന്ത്രങ്ങളെക്കുറിച്ച് മൊഴി നല്‍കിയത്. മനോരമയാണ് ഈ വിവരങ്ങള്‍ റിപ്പോര്‍ട്ട് ചെയ്തിരിക്കുന്നത്.

ഏതാനും വര്‍ഷം മുന്‍പ് ഒരു രാത്രിയില്‍ നിയമസഭാ മന്ദിരത്തിലേക്ക് ഊരാളുങ്കലിന്റെ പേരില്‍ ലോറിയില്‍ എത്തിച്ച ഡിജിറ്റല്‍ ഉപകരണങ്ങളുമായി ബന്ധപ്പെട്ടാണ് ഏറ്റവും ഗുരുതരമായ വെളിപ്പെടുത്തല്‍ ഉണ്ടായിരിക്കുന്നത്. സുതാര്യത ഉറപ്പാക്കേണ്ട സാങ്കേതിക ഉപകരണങ്ങള്‍ യാതൊരുവിധ പരിശോധനയും കൂടാതെ കോടികളുടെ ബില്ലുകള്‍ പാസാക്കി നല്‍കാന്‍ ഉദ്യോഗസ്ഥര്‍ക്ക് മേല്‍ കടുത്ത രാഷ്ട്രീയ സമ്മര്‍ദ്ദമുണ്ടായെന്നാണ് വ്യക്തമാകുന്നത്. വഴിവിട്ട നീക്കങ്ങള്‍ക്ക് തടസ്സം നിന്ന ഉദ്യോഗസ്ഥരെ ഭീഷണിപ്പെടുത്തിയാണ് കാര്യങ്ങള്‍ സാധിച്ചെടുത്തത്.

മൊഴി പ്രകാരം, 13 വലിയ പെട്ടികളിലായാണ് അന്ന് രാത്രി ഡിജിറ്റല്‍ ഉപകരണങ്ങള്‍ ലോറിയില്‍ നിയമസഭയിലെത്തിച്ചത്. അസ്വാഭാവികമായ ഈ നീക്കം കണ്ട്, ഡ്യൂട്ടിയിലില്ലാതിരുന്ന ഉദ്യോഗസ്ഥനെ അടിയന്തരമായി രാത്രി തന്നെ നിയമസഭയിലേക്ക് അധികൃതര്‍ വിളിച്ചുവരുത്തുകയായിരുന്നു.

കോടികള്‍ വിലമതിക്കുന്ന ഉപകരണങ്ങള്‍ ആയതിനാല്‍, അവ പ്രവര്‍ത്തനക്ഷമമാണോ എന്ന് കൃത്യമായി പരിശോധിച്ച് ബോധ്യപ്പെടാതെ കൈപ്പറ്റാന്‍ കഴിയില്ലെന്ന് ഉദ്യോഗസ്ഥന്‍ കര്‍ശന നിലപാടെടുത്തു.

എന്നാല്‍, നിയമസഭയിലെ അന്നത്തെ ഉന്നത അധികാരികളില്‍ നിന്നും ഉദ്യോഗസ്ഥന് മേല്‍ കടുത്ത സമ്മര്‍ദ്ദമാണ് ഉണ്ടായത്. ഉപകരണങ്ങള്‍ ഇപ്പോള്‍ പരിശോധിക്കേണ്ടതില്ലെന്നും, അവ നേരിട്ട് സ്റ്റോറിലേക്ക് മാറ്റിയാല്‍ മതിയെന്നുമായിരുന്നു ഉന്നത ഉദ്യോഗസ്ഥര്‍ നല്‍കിയ കര്‍ശന നിര്‍ദ്ദേശം. ഒടുവില്‍ മേലുദ്യോഗസ്ഥരുടെ ഭീഷണിക്കും സമ്മര്‍ദ്ദത്തിനും വഴങ്ങി ഇയാള്‍ക്ക് ഡിജിറ്റല്‍ ഉപകരണങ്ങള്‍ അടങ്ങിയ പെട്ടികള്‍ സ്റ്റോറിലേക്ക് മാറ്റേണ്ടി വരികയായിരുന്നു.

പദ്ധതി കൃത്യമായി നടപ്പാക്കിയെന്ന് വരുത്തിത്തീര്‍ത്ത ഊരാളുങ്കല്‍ സൊസൈറ്റി, തൊട്ടടുത്ത ദിവസം തന്നെ കോടികളുടെ ബില്ലാണ് നിയമസഭയില്‍ സമര്‍പ്പിച്ചത്. ഉപകരണങ്ങള്‍ പ്രവര്‍ത്തിപ്പിച്ചു നോക്കുക പോലും ചെയ്യാതെ, കേവലം പെട്ടികള്‍ സ്റ്റോറിലിരുന്ന വകയില്‍ മാത്രം ഈ കോടികളുടെ ബില്‍ ഉദ്യോഗസ്ഥര്‍ക്ക് പാസാക്കി നല്‍കേണ്ടി വന്നുവെന്നാണ് ലഭിച്ചിരിക്കുന്ന മൊഴി. ഖജനാവിലെ പണം എങ്ങനെയാണ് മുന്‍ ഭരണകാലത്ത് തന്നിഷ്ടപ്രകാരം ധൂര്‍ത്തടിച്ചതെന്നതിന്റെ ജീവിക്കുന്ന തെളിവാണ് ഈ വെളിപ്പെടുത്തല്‍.

ഇതിനു പുറമേ, മുന്‍ സര്‍ക്കാരിന്റെ കാലത്ത് നിയമസഭയ്ക്കുള്ളില്‍ ഊരാളുങ്കലുമായി ബന്ധപ്പെട്ട് എത്തിയ എല്ലാ ഫയലുകള്‍ക്കും മിന്നല്‍ വേഗത്തിലാണ് അനുമതി ലഭിച്ചിരുന്നതെന്നും മറ്റ് ചില ഉദ്യോഗസ്ഥര്‍ വെളിപ്പെടുത്തിയിട്ടുണ്ട്. സാധാരണ ഫയലുകള്‍ ആഴ്ചകളും മാസങ്ങളും ചുവപ്പുനാടയില്‍ കുരുങ്ങിക്കിടക്കുമ്പോള്‍, ഊരാളുങ്കലിന്റെ ഫയലുകള്‍ക്ക് മണിക്കൂറുകള്‍ക്കകം ഉന്നതതല അംഗീകാരം ലഭിച്ചിരുന്നു. ഇതിനു പിന്നില്‍ പ്രവര്‍ത്തിച്ച ഉന്നത രാഷ്ട്രീയ ലോബിയെക്കുറിച്ചും അന്വേഷണം നീളുന്നുണ്ട്.

ഉദ്യോഗാര്‍ത്ഥികളെയും പൊതുജനങ്ങളെയും ഞെട്ടിച്ച ഈ വെളിപ്പെടുത്തലുകളുടെ അടിസ്ഥാനത്തില്‍ നിയമസഭാ സെക്രട്ടേറിയറ്റ് ഇപ്പോള്‍ സമഗ്രമായ ഉയര്‍ന്ന അന്വേഷണത്തിലേക്ക് കടന്നിരിക്കുകയാണ്. പ്രാഥമിക പരിശോധനയില്‍ തന്നെ അഴിമതിയുടെ വലിയ കറുത്ത കൈകള്‍ വ്യക്തമായ സാഹചര്യത്തില്‍, കുറ്റക്കാരെ നിയമത്തിന് മുന്നില്‍ കൊണ്ടുവരാന്‍ സ്പീക്കര്‍ തിരുവഞ്ചൂര്‍ രാധാകൃഷ്ണന്‍ ആഭ്യന്തര അന്വേഷണ സംഘത്തിന് പൂര്‍ണ്ണ സ്വാതന്ത്ര്യം നല്‍കിയിട്ടുണ്ട്.

ഊരാളുങ്കല്‍ ഉള്‍പ്പെടെയുള്ള വിവിധ കരാറുകാര്‍ നിയമസഭയില്‍ നടപ്പാക്കിയ എല്ലാ പദ്ധതികളുടെയും നിലവിലെ സ്ഥിതി വ്യക്തമാക്കാന്‍ സ്പീക്കര്‍ ഉത്തരവിട്ടിട്ടുണ്ട്. ഇതിനായി സഭയിലെ എല്ലാ വകുപ്പുകള്‍ക്കും അടിയന്തരമായി വിവരങ്ങള്‍ കൈമാറാന്‍ ആവശ്യപ്പെട്ട് നിയമസഭാ സെക്രട്ടേറിയറ്റ് പ്രത്യേക കുറിപ്പ് നല്‍കിക്കഴിഞ്ഞു. പദ്ധതികള്‍ക്ക് എത്ര പണം ചെലവായി, കരാര്‍ വ്യവസ്ഥകള്‍ പാലിച്ചിട്ടുണ്ടോ തുടങ്ങിയ എല്ലാ വിവരങ്ങളും ഇതിലൂടെ ശേഖരിക്കും.

അഴിമതിയിലൂടെ ജനങ്ങളുടെ നികുതിപ്പണം കവര്‍ന്നവര്‍ എത്ര ഉന്നതരാണെങ്കിലും അവരെ വെറുതെ വിടില്ലെന്ന ഉറച്ച നിലപാടിലാണ് സ്പീക്കര്‍. ഡിജിറ്റല്‍ ഉപകരണങ്ങളുടെ പേരില്‍ നടന്ന ഈ കള്ളക്കളിയില്‍ സാങ്കേതിക വിദഗ്ദ്ധരെ ഉള്‍പ്പെടുത്തി വിശദമായ ഓഡിറ്റിംഗും നടത്തും.