റാണി ഖേരയിലെ ഫാക്ടറിയിൽ നടത്തിയ റെയ്ഡിൽ പ്രമുഖ അന്താരാഷ്ട്ര ബ്രാൻഡുകളെ വെല്ലുന്ന രീതിയിലുള്ള വ്യാജ നിർമ്മാണ സജ്ജീകരണങ്ങളാണ് പോലീസ് കണ്ടെത്തിയത്.

പ്രമുഖ കമ്പനികളുടെ ലോഗോ, സ്റ്റിക്കറുകൾ, ഹോളോഗ്രാമുകൾ, ക്യുആർ കോഡുകൾ എന്നിവ അതേപടി വ്യാജമായി നിർമ്മിച്ചായിരുന്നു തട്ടിപ്പ്. സാധാരണക്കാർക്ക് ഒറ്റനോട്ടത്തിൽ ഇത് തിരിച്ചറിയാൻ സാധിക്കില്ല. വില കുറഞ്ഞ മാൾട്ടോഡെക്‌സ്‌ട്രിൻ (Maltodextrin), ഗുണനിലവാരമില്ലാത്ത ഫ്ലേവറിംഗ് ഏജന്റുകൾ എന്നിവ ചേർത്താണ് സപ്ലിമെന്റുകൾ ഉണ്ടാക്കിയിരുന്നത്. ഇത് ആരോഗ്യത്തിന് അതീവ ദോഷകരമാണ്.

വ്യാജ സീൽ ചെയ്ത കണ്ടെയ്നറുകൾ, ഒഴിഞ്ഞ ജാറുകൾ, ക്യുആർ കോഡ് പ്രിന്ററുകൾ, വൻതോതിലുള്ള പൗഡർ ശേഖരം എന്നിവ പോലീസ് കസ്റ്റഡിയിലെടുത്തു.

ഈ മാസമാദ്യം 150 കിലോ വ്യാജ സപ്ലിമെന്റുകളുമായി പിടിയിലായ രണ്ടുപേരെ ചോദ്യം ചെയ്തപ്പോഴാണ് ‘ബഞ്ചാര’ എന്നറിയപ്പെടുന്ന നവീൻ കുമാറിനെക്കുറിച്ചുള്ള വിവരം ലഭിച്ചത്. ഈ തട്ടിപ്പിന് പിന്നിൽ അന്തർസംസ്ഥാന ബന്ധങ്ങളുള്ള വലിയൊരു ശൃംഖല പ്രവർത്തിക്കുന്നുണ്ടെന്നാണ് പോലീസ് നിഗമനം. ബോഡി ബിൽഡിംഗ് രംഗത്തുള്ളവരും ജിം ട്രെയിനർമാരും ഈ ശൃംഖലയുടെ ഭാഗമാണോ എന്ന് പോലീസ് പരിശോധിച്ചുവരികയാണ്.