മുരിദ്കെയിലുള്ള ലഷ്കർ ആസ്ഥാനമായ മർക്കസ് തൊയ്ബ സമുച്ചയത്തിനുള്ളിൽ വെച്ചായിരുന്നു സംഭവം.

ഈദ് നമസ്കാരത്തിന് പിന്നാലെ നടന്ന ആക്രമണത്തിൽ സലാഫിയെ ലക്ഷ്യമിട്ട് അടുത്തു കൂടി വെടിയുതിർക്കുകയും തുടർന്ന് കത്തി ഉപയോഗിച്ച് പലതവണ കുത്തുകയും ചെയ്തതായി റിപ്പോർട്ടുകൾ വ്യക്തമാക്കുന്നു. ആക്രമികൾക്ക് പിന്തുണയായി മൂന്നാമത്തെ ഒരാൾ സ്ഥലത്തെ നിയന്ത്രിച്ചിരുന്നുവെന്നും സൂചനകളുണ്ട്. ഗുരുതരമായി പരിക്കേറ്റ സലാഫി ആശുപത്രിയിൽ എത്തുന്നതിന് മുമ്പ് തന്നെ മരിച്ചതായി സ്ഥിരീകരിച്ചു.

ഇന്ത്യൻ സുരക്ഷാ വൃത്തങ്ങൾ നൽകുന്ന വിവരങ്ങൾ അനുസരിച്ച്, സലാഫി കശ്മീർ മേഖലയിൽ ഇന്ത്യയ്‌ക്കെതിരായ തീവ്രവാദ പ്രവർത്തനങ്ങൾക്ക് യുവാക്കളെ പ്രേരിപ്പിക്കുന്നതിലും അതിർത്തി കടത്തുന്നതിലും നിർണായക പങ്കുവഹിച്ചിരുന്ന വ്യക്തിയായിരുന്നു. നിരവധി യുവാക്കളെ മതഭ്രാന്തിലാഴ്‌ത്തി ഇന്ത്യയ്‌ക്കെതിരെ ആക്രമണങ്ങൾക്ക് തയ്യാറാക്കുന്നതിൽ അദ്ദേഹം പ്രധാന ആസൂത്രകനായിരുന്നുവെന്നാണ് വിലയിരുത്തൽ.

അതീവ സുരക്ഷയുള്ള ലഷ്കർ ആസ്ഥാനത്തിനുള്ളിൽ തന്നെ ഇത്തരമൊരു ആക്രമണം നടന്നത് സംഘടനയ്‌ക്കുള്ളിലെ ഭിന്നതകളെയും സുരക്ഷാ വീഴ്ചകളെയും തുറന്നുകാട്ടുന്നതായി കാണപ്പെടുന്നു. സംഭവസമയത്ത് മറ്റ് ഉന്നത ലഷ്കർ നേതാക്കളും സ്ഥലത്തുണ്ടായിരുന്നുവെന്ന വിവരം, ആഭ്യന്തര സംഘർഷസാദ്ധ്യതകൾ ശക്തമാക്കുന്നു.

സംഭവത്തിന്റെ ഉത്തരവാദിത്വം ഇതുവരെ ആരും ഏറ്റെടുത്തിട്ടില്ല. എന്നാൽ, ഈ സംഭവത്തോടെ പാകിസ്ഥാനിൽ പ്രവർത്തിക്കുന്ന ഇന്ത്യവിരുദ്ധ തീവ്രവാദ ശൃംഖലകൾക്ക് വലിയ തിരിച്ചടി നേരിട്ടതായി സുരക്ഷാ വിദഗ്ധർ ചൂണ്ടിക്കാട്ടുന്നു. ഇന്ത്യയ്‌ക്കെതിരായ ഭീകരപ്രവർത്തനങ്ങൾക്ക് നേതൃത്വം നൽകിയിരുന്ന പ്രധാന വ്യക്തിയുടെ നഷ്ടം, അതിർത്തി ഭീകരവാദ പ്രവർത്തനങ്ങളിൽ അടുത്ത കാലത്തേക്ക് മന്ദഗതിയുണ്ടാക്കുമെന്നാണു വിലയിരുത്തൽ.