‘കടക്ക് പുറത്ത് കാലം’ എന്ന പേരിലാണ് സോഷ്യൽ മീഡിയ കേന്ദ്രീകരിച്ച് കോൺഗ്രസ് പുതിയ പ്രചാരണത്തിന് തുടക്കം കുറിച്ചിരിക്കുന്നത്.

മുഖ്യമന്ത്രി പിണറായി വിജയന്റെ മുൻകാലത്തെ വിവാദ പരാമർശം തന്നെയാണ് അദ്ദേഹത്തിനെതിരെയുള്ള ആയുധമാക്കി പ്രതിപക്ഷം ഈ പ്രത്യേക ഡിജിറ്റൽ-ഫസ്റ്റ് ക്യാംപയിൻ ആരംഭിക്കുന്നത്. സോഷ്യൽ മീഡിയയിലൂടെ സർക്കാരിന്റെ പ്രവർത്തനങ്ങളെ ചോദ്യം ചെയ്യുകയും വിമർശനങ്ങൾ ശക്തമാക്കുകയും ചെയ്യുകയാണ് ലക്ഷ്യം.

ക്യാംപയിന്റെ ഭാഗമായി എൽഡിഎഫ് സർക്കാരിനെതിരായ ചാർജ്‌ഷീറ്റ് പുറത്തിറക്കാനും കോൺഗ്രസ് തീരുമാനിച്ചിട്ടുണ്ട്. ‘അനീതിയുടെ കസേരകൾ ഇളകും. ഇനി കടക്ക് പുറത്ത് കാലം’- എന്ന ക്യാപ്ഷനോടെയാണ് കോൺ​ഗ്രസിന്റെ ഔദ്യോ​ഗിക ഫേസ്ബുക്ക് പേജിൽ പോസ്റ്റ് പങ്കുവച്ചിരിക്കുന്നത്.. ‘പിണറായി സർക്കാർ കടക്ക് പുറത്ത്- ഇനി 90 ദിനങ്ങൾ കൂടി മാത്രം’- എന്നാണ് പോസ്റ്റിലെ വാചകങ്ങൾ. എഐ വീഡിയോയിലൂടെയാണ് വിഷയം അവതരിപ്പിച്ചിരിക്കുന്നത്. നേരത്തെ, ശബരിമല സ്വർണക്കൊള്ളയുമായി ബന്ധപ്പെട്ട് ‘അമ്പലക്കള്ളന്മാർ കടക്ക് പുറത്ത്’ എന്ന ക്യാംപയിനും കോൺ​ഗ്രസ് നടത്തിയിരുന്നു.

ജനങ്ങളുടെ പരാതികൾ ശേഖരിക്കുന്നതിന് വെബ്സൈറ്റും ആരംഭിക്കും. പാട്ടുകൾ, വീഡിയോകൾ എന്നിവ ഉൾപ്പെടുന്ന സോഷ്യൽ മീഡിയ ഉള്ളടക്കങ്ങളും പുറത്തിറക്കും. പൊതുജന പങ്കാളിത്തം അടക്കം ഉറപ്പാക്കി എൽഡിഎഫിനെതിരായ ജനവികാരം പ്രതിഫലിപ്പിക്കുന്ന രീതിയിലാണ് ക്യാമ്പയിൻ ക്രമീകരിച്ചിരിക്കുന്നത്.