‘അജിത് ദാദ’ എന്ന് അനുയായികൾ സ്നേഹത്തോടെ വിളിച്ചിരുന്ന അദ്ദേഹം, ഭരണാധികാരി എന്ന നിലയിൽ കരുത്ത് തെളിയിച്ച വ്യക്തിത്വമായിരുന്നു.

മഹാരാഷ്ട്ര രാഷ്ട്രീയത്തിലെ അതികായനായ ശരദ് പവാറിന്റെ അനന്തരവൻ എന്ന നിലയിൽ രാഷ്ട്രീയത്തിൽ പ്രവേശിച്ച അജിത് പവാർ, പിന്നീട് സ്വന്തമായ ഇടം കണ്ടെത്തിയ നേതാവാണ്. 1959 ജൂലൈ 22ന് അഹമ്മദ്‌നഗർ ജില്ലയിലെ ദേവ്‌ലാലി പ്രവരയിലാണ് അജിത് ആനന്ദറാവു പവാർ ജനിച്ചത്. 1982ൽ സഹകരണ മേഖലയിലൂടെ അദ്ദേഹം രാഷ്ട്രീയ പ്രവർത്തനത്തിന് തുടക്കം കുറിച്ചു. ബാരാമതി സഹകരണ ബാങ്കിന്റെ ചെയർമാനായി തിരഞ്ഞെടുക്കപ്പെട്ടതായിരുന്നു ഇതിന്റെ തുടക്കം.

1991ൽ ബാരാമതി മണ്ഡലത്തിൽ നിന്ന് അദ്ദേഹം ലോക്സഭയിലേക്ക് തിരഞ്ഞെടുക്കപ്പെട്ടു. എന്നാൽ പിന്നീട് ശരദ് പവാറിന് പ്രതിരോധ മന്ത്രിയാകാനായി അദ്ദേഹം ആ സ്ഥാനം ഒഴിഞ്ഞുകൊടുത്തു. 1991 മുതൽ മഹാരാഷ്ട്ര നിയമസഭയിൽ ബാരാമതിയെ പ്രതിനിധീകരിച്ച അജിത് പവാർ കൃഷി, വൈദ്യുതി, ജലസേചനം തുടങ്ങിയ സുപ്രധാന വകുപ്പുകൾ കൈകാര്യം ചെയ്തു.

മഹാരാഷ്ട്രയുടെ ചരിത്രത്തിൽ ഏറ്റവും കൂടുതൽ കാലം ഉപമുഖ്യമന്ത്രി പദവി അലങ്കരിച്ച നേതാക്കളിൽ ഒരാളാണ് അദ്ദേഹം. വിവിധ സഖ്യസർക്കാരുകളുടെ കാലത്തായി ആറ് തവണയാണ് അദ്ദേഹം ഈ പദവിയിലെത്തിയത്.

2023ൽ ശരദ് പവാറുമായി രാഷ്ട്രീയമായി വേർപിരിഞ്ഞ അദ്ദേഹം എൻ സി പിയിലെ ഭൂരിഭാഗം എം എൽ എമാരെയും കൂടെ നിർത്തി ഷിൻഡെ – ബി ജെ പി സർക്കാരിൽ ചേർന്നു. പിന്നീട് തിരഞ്ഞെടുപ്പ് കമ്മീഷൻ അജിത് പവാറിന്റെ വിഭാഗത്തെ ഔദ്യോഗിക എൻ സി പിയായി അംഗീകരിച്ചു.

ബാരാമതിയെ ലോകനിലവാരത്തിലുള്ള ഒരു നഗരമായി മാറ്റിയെടുക്കുന്നതിൽ അജിത് പവാർ വലിയ പങ്കുവഹിച്ചു. മികച്ച അടിസ്ഥാന സൗകര്യങ്ങളും വിദ്യാഭ്യാസ സ്ഥാപനങ്ങളും വ്യവസായങ്ങളും ബാരാമതിയിലെത്തിക്കുന്നതിൽ അദ്ദേഹം വിജയിച്ചു. തന്റെ കാര്യക്ഷമമായ ഭരണശൈലിയും വേഗത്തിലുള്ള തീരുമാനങ്ങളുമാണ് അദ്ദേഹത്തെ മറ്റുള്ളവരിൽ നിന്ന് വ്യത്യസ്തനാക്കിയത്.

സംസ്ഥാനത്തിന്റെ ഭരണചക്രം തിരിക്കുന്നതിൽ മുഖ്യ പങ്കുവഹിച്ചിരുന്ന അദ്ദേഹത്തിന്റെ വിയോഗം മഹാരാഷ്ട്ര രാഷ്ട്രീയത്തിൽ വലിയ ശൂന്യതയാണ് സൃഷ്ടിച്ചിരിക്കുന്നത്.

ആദരാഞ്ജലികൾ ...