ചരിത്രത്തില്‍ ആദ്യമായി രൂപയുടെ മൂല്യം ഒരു ഡോളറിന് എതിരെ 88 രൂപ എന്ന നിലയില്‍ എത്തി.

വെള്ളിയാഴ്ച 87.69 രൂപയില്‍ വ്യാപാരം തുടങ്ങിയ രൂപ 88.29ലേക്ക് ഇടിഞ്ഞു. ട്രംപ് ചുമത്തിയ 50 ശതമാനം തീരുവ കയറ്റുമതി മേഖലയെ പ്രതികൂലമായി ബാധിക്കുമെന്ന വിലയിരുത്തലാണ് രൂപയ്ക്ക് തിരിച്ചടിയായത്.

ഫെബ്രുവരിയിലാണ് ഇതിന് മുന്‍പ് രൂപയുടെ മൂല്യം റോക്കോര്‍ഡ് ഇടിവ് നേരിട്ടത്. ഒരു ഡോളറിന് എതിരെ 87.95 എന്നതായിരുന്നു ഫെബ്രുവരിയില്‍ രേഖപ്പെടുത്തിയത്.

ചൈനീസ് കറന്‍സിയായ യുവാനെതിരെയും രൂപയുടെ മൂല്യം എക്കാലത്തെയും താഴ്ന്ന നിലയിലേക്ക് ഇടിഞ്ഞു. ഒരു യുവാന് 12.3862 എന്ന നിലയിലാണ് രൂപ വ്യാപാരം അവസാനിപ്പിച്ചത്. ജിസിസി കറന്‍സികളായ യുഎഇ ദിര്‍ഹം, സൗദി റിയാല്‍, ഖത്തര്‍ റിയാല്‍ തുടങ്ങിയവയുടെ മൂല്യവും രൂപയ്‌ക്കെതിരെ ഉയര്‍ന്നു.

യുഎഇയിലെ പ്രമുഖ റെമിറ്റൻസ് പ്ലാറ്റ്‌ഫോമുകൾ ഒരു ദിർഹമിന് 23.95 മുതൽ 24 വരെ നിരക്കാണ് വാഗ്ദാനം ചെയ്യുന്നത്. എക്സ്ചേഞ്ച് ഹൗസുകൾ 23.91 രൂപ, ബാങ്കുകൾ 23.81 രൂപ എന്നിങ്ങനെയുമാണ് വാ​ഗ്ദാനം ചെയ്യുന്നത്.