മധ്യപ്രദേശ് നഴ്സസ് രജിസ്ട്രേഷൻ കൗൺസിലിന്റെ ഓൺലൈൻ രജിസ്ട്രേഷൻ സംവിധാനത്തിലെ പരിശോധനാ വീഴ്ചകൾ ചൂണ്ടിക്കാട്ടിയാണ് സംഭവം പുറത്തുവന്നത്. കഴുതയുടെ ചിത്രം ഉൾപ്പെടെ വ്യാജ വിവരങ്ങളും രേഖകളും ഉപയോഗിച്ച് സമർപ്പിച്ച അപേക്ഷയ്ക്ക് താൽക്കാലിക നഴ്സ്-മിഡ്‌വൈഫ് രജിസ്ട്രേഷൻ സർട്ടിഫിക്കറ്റ് ലഭിച്ചതായാണ് റിപ്പോർട്ട്.

എൻഎസ്‌യുഐ സംസ്ഥാന വൈസ് പ്രസിഡന്റ് രവി പർമാറാണ് ഓൺലൈൻ സംവിധാനത്തിലെ പരിശോധനാ നടപടികൾ പരീക്ഷിക്കുന്നതിനായി അപേക്ഷ സമർപ്പിച്ചതെന്നാണ് അദ്ദേഹത്തിന്റെ അവകാശവാദം. അപേക്ഷയിൽ പേര് ‘Donkey’ എന്നും ഫോട്ടോയുടെ സ്ഥാനത്ത് കഴുതയുടെ ചിത്രവുമാണ് നൽകിയിരുന്നത്. പിതാവിന്റെയും മാതാവിന്റെയും പേരുകൾ യഥാക്രമം ‘Donkey Father’, ‘Donkey Mother’ എന്നും ജാതിയുടെ കോളത്തിൽ ‘Animal’ എന്നും രേഖപ്പെടുത്തിയതായും റിപ്പോർട്ടുകളുണ്ട്.

പരിശീലനവും വിദ്യാഭ്യാസ യോഗ്യതയും തെളിയിക്കുന്ന രേഖകൾക്ക് പകരം ശൂന്യമായ പേപ്പറുകളാണ് അപ്‌ലോഡ് ചെയ്തതെന്നും പർമാർ പറഞ്ഞു.

നിശ്ചിത 2,050 രൂപ ഫീസ് അടച്ചതിന് പിന്നാലെ സെപ്റ്റംബർ 25-ന് ഏകദേശം അഞ്ച് മിനിറ്റിനുള്ളിൽ സർട്ടിഫിക്കറ്റ് ജനറേറ്റ് ചെയ്തതായാണ് പർമാറിന്റെ വാദം. സർട്ടിഫിക്കറ്റിൽ ‘Registered Nurse and Registered Midwife’ എന്ന നിലയിൽ രജിസ്ട്രേഷൻ രേഖപ്പെടുത്തിയിരുന്നതായും റിപ്പോർട്ടുകളുണ്ട്.

അതേസമയം, സർട്ടിഫിക്കറ്റ് താൽക്കാലിക രജിസ്ട്രേഷൻ മാത്രമാണെന്നും രേഖകളുടെ പരിശോധനയ്ക്ക് വിധേയമാണെന്നും മധ്യപ്രദേശ് നഴ്സസ് രജിസ്ട്രേഷൻ കൗൺസിൽ വ്യക്തമാക്കി. തെറ്റായ വിവരങ്ങൾ നൽകി ഇത്തരം രജിസ്ട്രേഷൻ നേടുന്നത് തട്ടിപ്പാണെന്നും കൗൺസിൽ പ്രതികരിച്ചു. സംഭവത്തെ തുടർന്ന് കൂടുതൽ പരിശോധനാ സംവിധാനങ്ങൾ ഏർപ്പെടുത്തുന്നതിനായി ഓൺലൈൻ രജിസ്ട്രേഷൻ നടപടികൾ താൽക്കാലികമായി നിർത്തിവെച്ചതായും റിപ്പോർട്ടുകളുണ്ട്.

കഴുതയുടെ പേരിൽ തന്നെ നഴ്സിംഗ് രജിസ്ട്രേഷൻ എങ്ങനെ ലഭിച്ചുവെന്നത് ഓൺലൈൻ പരിശോധനാ സംവിധാനത്തിന്റെ വിശ്വാസ്യതയെക്കുറിച്ച് ചോദ്യങ്ങൾ ഉയർത്തിയിരിക്കുകയാണ്. യഥാർഥ അപേക്ഷകരുടെ വിദ്യാഭ്യാസ യോഗ്യതയും രേഖകളും എത്രത്തോളം കൃത്യമായി പരിശോധിക്കുന്നുണ്ടെന്നതിലും അന്വേഷണം ആവശ്യപ്പെട്ട് വിമർശനം ഉയർന്നിട്ടുണ്ട്.