ദുരന്തത്തിൽ കാണാതായവരുടെ എണ്ണം 1,924 ആയി ഉയർന്നതായി നേപ്പാൾ ദുരന്തനിവാരണ അതോറിറ്റി ഔദ്യോഗികമായി വ്യക്തമാക്കി.(Nepal Flash Flood Death Toll Nears Six Hundred Over One Thousand Nine Hundred Missing India Sends Relief Rescue Teams)

നേപ്പാൾ-ടിബറ്റ് അതിർത്തിയിലുണ്ടായ വിനാശകരമായ മിന്നൽ പ്രളയത്തിലും ഉരുൾപൊട്ടലിലും അകപ്പെട്ടവർക്കായി തിരച്ചിൽ തുടരവേ, ഇന്ത്യയുടെ ദുരിതാശ്വാസ സഹായത്തിന്റെ മൂന്നാം ഘട്ടവും കാഠ്മണ്ഡുവിൽ എത്തിച്ചേർന്നു. 10 ടൺ അടിയന്തര ജീവകാരുണ്യ വസ്തുക്കളും 11 അംഗ വിദഗ്ധ മെഡിക്കൽ-തുരങ്ക രക്ഷാസേനയുമാണ് മൂന്നാമത്തെ വ്യോമസേനാ വിമാനത്തിൽ നേപ്പാളിൽ എത്തിയത്. കേന്ദ്ര വിദേശകാര്യ മന്ത്രി ഡോ. എസ്. ജയ്ശങ്കർ സോഷ്യൽ മീഡിയ പ്ലാറ്റ്‌ഫോമായ X-ലൂടെയാണ് ഈ വിവരം അറിയിച്ചത്.

ഇതോടെ ദുരന്ത മേഖലയിൽ ഇന്ത്യ എത്തിച്ച ആകെ ദുരിതാശ്വാസ സാമഗ്രികളുടെ അളവ് 57.5 ടണ്ണായി ഉയർന്നു. പുതിയ പാക്കേജിൽ പോർട്ടബിൾ ജനറേറ്ററുകൾ, വാട്ടർ പ്യൂരിഫയർ ഗുളികകൾ, ഭക്ഷ്യധാന്യങ്ങൾ, മറ്റ് അടിയന്തര ശുചിത്വ കിറ്റുകൾ എന്നിവ ഉൾപ്പെടുന്നു.

ജലവൈദ്യുത പദ്ധതിയുടെ തുരങ്കങ്ങളിൽ കുടുങ്ങിയ തൊഴിലാളികളെ കണ്ടെത്താൻ പ്രത്യേക പരിശീലനം ലഭിച്ച സംഘവും മെഡിക്കൽ ടീമും ഇതോടൊപ്പം ദൗത്യത്തിൽ പങ്കാളികളായിട്ടുണ്ട്. ഓഗസ്റ്റ് 26-ന് 10 ടൺ സാമഗ്രികളും, ഓഗസ്റ്റ് 27-ന് 37.5 ടൺ അടിയന്തര വസ്തുക്കളുമാണ് ആദ്യ രണ്ട് ഘട്ടങ്ങളിലായി ഇന്ത്യ കൈമാറിയത്. പ്രളയത്തിൽ തകർന്ന റോഡ് ഗതാഗതം പുനഃസ്ഥാപിക്കാൻ ബെയ്‌ലി പാലങ്ങളും സാങ്കേതിക വിദഗ്ധരെയും വിട്ടുനൽകാൻ തയ്യാറാണെന്ന് ഇന്ത്യ അറിയിച്ചിട്ടുണ്ട്.

‘അയൽപക്കത്തിന് ആദ്യ പരിഗണന’ എന്ന ഇന്ത്യയുടെ നയത്തിലൂന്നി, നേപ്പാളിന്റെ ആവശ്യാനുസരണം സർവ്വ പിന്തുണയും ഉറപ്പാക്കുമെന്നും വിദേശകാര്യ മന്ത്രാലയം വ്യക്തമാക്കി.

വിവിധ ജലവൈദ്യുത പദ്ധതികളിൽ ജോലി ചെയ്തിരുന്ന 993 തൊഴിലാളികളെയും അഞ്ഞൂറോളം വിദേശ പൗരന്മാരെയും കുറിച്ച് ഇതുവരെ വിവരമൊന്നുമില്ല. ഇതിൽ 320 ഇന്ത്യക്കാരും വിദേശ പൗരത്വമുള്ള നൂറിലധികം ഇന്ത്യൻ വംശജരും 8 മലയാളികളും ഉൾപ്പെടുന്നുണ്ടെന്ന് ഇന്ത്യൻ വിദേശകാര്യ മന്ത്രാലയം സ്ഥിരീകരിച്ചു. അതേസമയം, പ്രളയബാധിത പ്രദേശങ്ങളിൽ നിന്ന് 84 ഇന്ത്യക്കാരെ രക്ഷപ്പെടുത്താനായെന്നും അതിൽ ആദ്യഘട്ടത്തിൽ രക്ഷപ്പെടുത്തിയ 21 തമിഴ്നാട് സ്വദേശികളെ സുരക്ഷിതമായി നാട്ടിലെത്തിച്ചതായും വിദേശകാര്യ മന്ത്രാലയ വക്താവ് രൺധീർ ജയ്സ്വാൾ അറിയിച്ചു.

ത്രിശൂലി ജലവൈദ്യുത പദ്ധതിയുടെ തുരങ്കത്തിൽ കുടുങ്ങിയ 63 തൊഴിലാളികളെയും രക്ഷപ്പെടുത്തിയിട്ടുണ്ട്. ദുരന്തത്തിൽ കുടുങ്ങിയവരെ വീണ്ടെടുക്കാൻ ഇന്ത്യയുടെ അടിയന്തര സഹായങ്ങൾ നേപ്പാളിലേക്ക് ഒഴുകുന്നു.