ഓഗസ്റ്റ് 26ന് ഉണ്ടായ ദുരന്തത്തിന് ഒരാഴ്ച പിന്നിടുമ്പോൾ നേപ്പാളിൽ 987 പേരും ചൈനയിൽ 16 പേരുമാണ് മരിച്ചതായി ഔദ്യോഗിക കണക്കുകൾ വ്യക്തമാക്കുന്നത്.

ഇരുരാജ്യങ്ങളിലുമായി ആകെ 1,003 മരണങ്ങളാണ് സ്ഥിരീകരിച്ചിരിക്കുന്നത് . നേപ്പാളിലെ നാഷണൽ ഡിസാസ്റ്റർ റിസ്ക് റിഡക്ഷൻ ആൻഡ് മാനേജ്മെന്റ് അതോറിറ്റിയുടെ കണക്കനുസരിച്ച് 84 മരണങ്ങൾ കൂടി സ്ഥിരീകരിച്ചതോടെയാണ് രാജ്യത്തെ മരണസംഖ്യ 987 ആയി ഉയർന്നത്. 583 വിദേശികൾ ഉൾപ്പെടെ 3,916 പേരെയാണ് നേപ്പാൾ ഭാഗത്ത് കാണാതായിരിക്കുന്നത്. കാണാതായവരിൽ 639 പേർ ജലവൈദ്യുത നിലയങ്ങളിൽ ജോലി ചെയ്തിരുന്നവരാണെന്നും അധികൃതർ അറിയിച്ചു.

ചൈനീസ് അധികൃതർ 16 മരണങ്ങൾ സ്ഥിരീകരിച്ചിട്ടുണ്ട്. 261 വിദേശികൾ ഉൾപ്പെടെ 546 പേരെ ചൈനീസ് ഭാഗത്ത് ഇപ്പോഴും കണ്ടെത്താനുണ്ട്. ഇതോടെ ഇരുരാജ്യങ്ങളിലുമായി 844 വിദേശികൾ ഉൾപ്പെടെ 4,462 പേരെയാണ് കാണാതായിരിക്കുന്നത്. കാണാതായ വിദേശികളിൽ ഏറ്റവും കൂടുതൽ പേർ ഇന്ത്യക്കാരാണ്. 275 ഇന്ത്യക്കാരെയും 100 ചൈനീസ് പൗരന്മാരെയും കാണാതായതായി കണക്കുകൾ വ്യക്തമാക്കുന്നു.

ഓഗസ്റ്റ് 26ന് നേപ്പാളിലെ ലാങ്‌ടാങ് ലിരുങ് പർവതത്തിൽ ഏകദേശം 5,200 മീറ്റർ ഉയരത്തിൽ ഹിമാനി പിളർന്നതാണ് ദുരന്തത്തിന് കാരണമായതെന്നാണ് റിപ്പോർട്ട്. ഇതിനെത്തുടർന്ന് ഉണ്ടായ മഞ്ഞും പാറകളും ഉൾപ്പെട്ട വൻ പ്രവാഹം പിന്നീട് ശക്തമായ മണ്ണും വെള്ളവും കലർന്ന ഒഴുക്കായി മാറി അതിർത്തിയിലെ താഴ്‌വരകളിലൂടെ പാഞ്ഞെത്തുകയായിരുന്നു. നേപ്പാളിലെ റസുവ, നുവാകോട്ട്, ധാദിങ്, കാവ്രെ, കാഠ്മണ്ഡു താഴ്‌വര തുടങ്ങിയ പ്രദേശങ്ങളിലും ചൈനയുടെ തെക്കുപടിഞ്ഞാറൻ ടിബറ്റിലെ ഗ്യിറോങ് അതിർത്തി മേഖലയിലും വൻ നാശനഷ്ടമുണ്ടായി.

കൂടുതൽ മൃതദേഹങ്ങൾ കണ്ടെത്തുന്ന സാഹചര്യത്തിൽ മൃതദേഹങ്ങൾ സൂക്ഷിക്കുന്നതിനുള്ള ഫ്രീസറുകൾ, ഡിഎൻഎ പരിശോധനാ കിറ്റുകൾ, ദുരന്തബാധിത മേഖലകൾ മാപ്പ് ചെയ്യുന്നതിനുള്ള റിമോട്ട് സെൻസിങ് സംവിധാനങ്ങൾ, ഡ്രോണുകൾ എന്നിവ നേപ്പാൾ ആവശ്യപ്പെട്ടിട്ടുണ്ട്. ഇന്ത്യ, ചൈന, ദക്ഷിണ കൊറിയ എന്നീ രാജ്യങ്ങൾ തിരച്ചിൽ-രക്ഷാപ്രവർത്തനങ്ങൾക്കായി സംഘങ്ങളെ അയച്ചിട്ടുണ്ട്. ദുരന്തബാധിത മേഖലകളിലെ ദുർഘടമായ ഭൂപ്രകൃതി, തകർന്ന റോഡുകൾ, അടിസ്ഥാന സൗകര്യങ്ങളുടെ നാശം എന്നിവ രക്ഷാപ്രവർത്തനത്തിനും ആശയവിനിമയത്തിനും വലിയ വെല്ലുവിളിയാണ്.

ചൈനീസ് ഔദ്യോഗിക മാധ്യമങ്ങളോട് രക്ഷാപ്രവർത്തകർ പറഞ്ഞതനുസരിച്ച് 10 മണിക്കൂർ നടന്നാണ് ഗ്യിറോങ് അതിർത്തി മേഖലയിലെത്തിയത്. എന്നാൽ ചൈനീസ് ഭാഗത്ത് കെട്ടിടങ്ങളുടെയോ മറ്റ് അടിസ്ഥാന സൗകര്യങ്ങളുടെയോ യാതൊരു അടയാളവും കണ്ടെത്താനായില്ല.