ഹ്രസ്വമായ വീഡിയോകൾ തുടർച്ചയായി കാണുന്നത് തലച്ചോറിലെ 'കോഗ്നിറ്റീവ് കൺട്രോൾ' അഥവാ ചിന്താപരമായ നിയന്ത്രണവുമായി ബന്ധപ്പെട്ട ഭാഗങ്ങളുടെ പ്രവർത്തനത്തെ താൽക്കാലികമായി കുറയ്ക്കുമെന്ന് ഗവേഷകർ കണ്ടെത്തി. കാര്യങ്ങളിൽ ശ്രദ്ധ കേന്ദ്രീകരിക്കാനും, പെട്ടെന്ന് തീരുമാനങ്ങൾ എടുക്കാനും, സ്വയം നിയന്ത്രണം പാലിക്കാനും സഹായിക്കുന്ന മസ്തിഷ്ക മേഖലകളുടെ പ്രവർത്തനത്തെ മന്ദഗതിയിലാക്കാൻ ഇത്തരം വീഡിയോകൾക്ക് കഴിയും.

'ന്യൂറോഇമേജ്' എന്ന പ്രശസ്ത സയൻസ് ജേണലിൽ പ്രസിദ്ധീകരിച്ച പഠനത്തിലാണ് ഈ വിവരങ്ങളുള്ളത്. 56 യുവാക്കളിൽ നടത്തിയ പഠനത്തിൽ, 'fMRI' സ്കാനിംഗും 'പ്രോട്ടോൺ മാഗ്നെറ്റിക് റെസോണൻസ് സ്പെക്ട്രോസ്കോപ്പി'യും ഉപയോഗിച്ചാണ് ഗവേഷകർ തലച്ചോറിലെ ന്യൂറോട്രാൻസ്മിറ്ററുകളായ ഗ്ലൂട്ടാമേറ്റ്, ഗാബ എന്നിവയുടെ അളവിലുണ്ടാകുന്ന മാറ്റങ്ങൾ നിരീക്ഷിച്ചത്.

മസ്തിഷ്കത്തെ മാത്രമല്ല, ദീർഘനേരം ഒരേ ഇരിപ്പ് ഇരുന്ന് ഫോൺ ഉപയോഗിക്കുന്നത് മറ്റ് പല ശാരീരിക ബുദ്ധിമുട്ടുകൾക്കും വഴിവെക്കുന്നു:

എല്ലുകൾക്കും പേശികൾക്കും വേദന: മണിക്കൂറുകളോളം ഒരേ നിലയിൽ ഇരിക്കുന്നത് കടുത്ത കഴുത്തുവേദന, നടുവേദന, തോൾവേദന എന്നിവയ്ക്ക് കാരണമാകുന്നു.

കാഴ്ചശക്തിയെ ബാധിക്കുന്നു: സ്ക്രീനിലേക്ക് നോക്കിയിരിക്കുന്നത് കണ്ണ് വരണ്ടുപോകാനും, കാഴ്ചയിൽ മങ്ങലുണ്ടാകാനും, കടുത്ത തലവേദനയ്ക്കും ഇടയാക്കും.

ഉറക്കമില്ലായ്മ (Insomnia): രാത്രി വൈകി ഫോൺ ഉപയോഗിക്കുന്നത് ഉറക്കത്തിന് സഹായിക്കുന്ന 'മെലാടോണിൻ' (Melatonin) ഹോർമോണിന്റെ ഉത്പാദനത്തെ തടസ്സപ്പെടുത്തുകയും ഗുരുതരമായ ഉറക്കമില്ലായ്മയ്ക്ക് കാരണമാവുകയും ചെയ്യുന്നു.

ഷോർട്ട് വീഡിയോകളിൽ അമിതമായി സമയം ചെലവഴിക്കുന്ന ശീലം കുറയ്ക്കണമെന്നും, ഇടവേളകൾ എടുത്ത് മാത്രം ഫോൺ ഉപയോഗിക്കണമെന്നുമാണ് വിദഗ്ദ്ധർ നിർദ്ദേശിക്കുന്നത്.