ഭാര്യയുടെ കുത്തേറ്റ എസി മെക്കാനിക്കായ ഷെയ്ഖ് അഹമ്മദ് ആണ് മരിച്ചത്. മംഗളഗിരിയിലെ ടിഡ്കോ ഹൗസിംഗ് കോളനിയിലാണ് ദാരുണമായ സംഭവം നടന്നത്.

വീട്ടിൽ ടിവി കണ്ടുകൊണ്ടിരിക്കെ ശബ്ദം കുറയ്ക്കണമെന്ന് അഹമ്മദ് ഭാര്യയോട് ആവശ്യപ്പെട്ടു. ഇതേച്ചൊല്ലി ഇരുവരും തമ്മിൽ വാക്കേറ്റമുണ്ടായി. തർക്കം രൂക്ഷമായതോടെ പ്രകോപിതയായ ഭാര്യ കത്തിയെടുത്ത് അഹമ്മദിനെ കുത്തുകയായിരുന്നു. ശരീരത്തിൽ ആഴത്തിൽ മുറിവേറ്റ അഹമ്മദ് രക്തം വാർന്ന് നിലത്തു വീണു.

ബഹളം കേട്ടെത്തിയ അയൽവാസികൾ ഉടൻ തന്നെ അഹമ്മദിനെ വിജയവാഡയിലെ സർക്കാർ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു. മംഗളഗിരി പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. അഹമ്മദിന്റെ ഭാര്യയെ പോലീസ് കസ്റ്റഡിയിലെടുത്തിട്ടുണ്ടെന്നാണ് വിവരം.