സന്ദര്‍ശന വിസയില്‍ എത്തുന്നവര്‍ക്ക് പരമാവധി ആറുമാസം വരെ യു.എസില്‍ തങ്ങാന്‍ സാധിക്കുമെന്നത് പൊതുവായ ധാരണയാണെങ്കിലും, അതിര്‍ത്തിയിലെ കസ്റ്റംസ് ആന്‍ഡ് ബോര്‍ഡര്‍ പ്രൊട്ടക്ഷന്‍ ഉദ്യോഗസ്ഥര്‍ നല്‍കുന്ന അനുമതി മാത്രമാണ് അന്തിമമെന്ന് വിദഗ്ധര്‍ വ്യക്തമാക്കുന്നു.

ഇന്ത്യയില്‍ നിന്ന് അമേരിക്കയിലുള്ള മക്കളുടെ അടുക്കലേക്ക് എത്തിയ മാതാപിതാക്കള്‍ക്ക് മയാമി വിമാനത്താവളത്തിലെ ഇമിഗ്രേഷന്‍ വിഭാഗം രണ്ടുമാസത്തെ താമസം മാത്രം അനുവദിച്ച പശ്ചാത്തലത്തിലാണ് ഈ വിഷയം വീണ്ടും ചര്‍ച്ചയാകുന്നത്. കൊച്ചുമകന്റെ ജനനവുമായി ബന്ധപ്പെട്ട് 2027 ഫെബ്രുവരി വരെയുള്ള മടക്കയാത്രാ ടിക്കറ്റുമായി എത്തിയ ഇവര്‍ക്ക് 2026 നവംബര്‍ വരെ മാത്രമേ യു.എസില്‍ തങ്ങാന്‍ അനുമതിയുള്ളൂ.

പിതാവിന് ഇന്ത്യയില്‍ ജോലിയുള്ളപ്പോള്‍ അഞ്ചുമാസത്തോളം യു.എസില്‍ തങ്ങുന്നത് എന്തിനാണെന്ന് ചൂണ്ടിക്കാട്ടിയാണ് ഉദ്യോഗസ്ഥര്‍ കാലാവധി രണ്ടുമാസമായി വെട്ടിച്ചുരുക്കിയത്. ഇതോടെ നിരാശരായ പ്രവാസി കുടുംബം സോഷ്യല്‍ മീഡിയയിലൂടെ തങ്ങളുടെ അനുഭവം പങ്കുവെക്കുകയും തുടര്‍നടപടികള്‍ക്കായി ഉപദേശം തേടുകയും ചെയ്തു.

വിസയിലെ കാലാവധിയല്ല, മറിച്ച് യു.എസ്. അതിര്‍ത്തിയില്‍ വെച്ച് ലഭിക്കുന്ന ഐ-94 രേഖയിലെ തീയതിയാണ് ഒരാള്‍ക്ക് രാജ്യത്ത് തങ്ങാന്‍ അനുവാദമുള്ള സമയപരിധിയെ നിശ്ചയിക്കുന്നതെന്ന് ഇമിഗ്രേഷന്‍ വിദഗ്ധര്‍ വ്യക്തമാക്കി. വിസ ലഭിച്ചു എന്നതുകൊണ്ട് മാത്രം അമേരിക്കയില്‍ പ്രവേശിക്കാനോ ആറുമാസം തങ്ങാനോ ഉള്ള പൂര്‍ണ അവകാശം ലഭിക്കുന്നില്ല.

ഒരു വ്യക്തിയുടെ സന്ദര്‍ശന ലക്ഷ്യം, മുന്‍കാല യാത്രകള്‍, യു.എസില്‍ മുന്‍പ് തങ്ങിയിട്ടുള്ള ദിവസങ്ങളുടെ എണ്ണം, സ്വന്തം രാജ്യത്തെ ജോലി, സാമ്പത്തിക പശ്ചാത്തലം എന്നിവ വിലയിരുത്തിയാണ് സി.ബി.പി. ഉദ്യോഗസ്ഥര്‍ ഐ-94 കാലാവധി നിശ്ചയിക്കുന്നത്. ഈ സാഹചര്യത്തില്‍ മയാമിയില്‍ എത്തിയ മാതാപിതാക്കള്‍ക്ക് ഐ-94ല്‍ നല്‍കിയിരിക്കുന്ന നവംബര്‍ തീയതിക്ക് മുന്‍പായി രാജ്യം വിടേണ്ടിവരും.

അമേരിക്കന്‍ വിസയും ഐ-94 രേഖയും രണ്ടും രണ്ടാണെന്ന് യാത്രക്കാര്‍ മനസ്സിലാക്കേണ്ടതുണ്ട്. വിദേശകാര്യ മന്ത്രാലയം നല്‍കുന്ന വിസ യു.എസ്. അതിര്‍ത്തി വരെ യാത്ര ചെയ്യാനുള്ള അനുമതി പത്രം മാത്രമാണ്. എന്നാല്‍ ബോര്‍ഡര്‍ പ്രൊട്ടക്ഷന്‍ വിഭാഗം നല്‍കുന്ന ഐ-94 ആണ് ഒരാളുടെ ഔദ്യോഗിക താമസ അനുമതി രേഖ.

നിയമപ്രകാരം അനുവദിച്ച താമസപരിധിക്കുള്ളില്‍ തന്നെ യാത്ര അവസാനിപ്പിച്ച് മടങ്ങുന്നതാണ് ഭാവിയിലെ വിസാ സന്ദര്‍ശനങ്ങള്‍ക്കും ഇമിഗ്രേഷന്‍ റെക്കോര്‍ഡിനും സുരക്ഷിതമെന്ന് അഭിഭാഷകര്‍ ചൂണ്ടിക്കാണിക്കുന്നു. അനുവദിച്ച സമയത്തില്‍ കൂടുതല്‍ തങ്ങുന്നത് ഭാവിയില്‍ വിസ റദ്ദാക്കപ്പെടുന്നതിനും യു.എസിലേക്ക് വിലക്ക് ഏര്‍പ്പെടുത്തുന്നതിനും കാരണമായേക്കാം.

ബി1/ബി2 വിസയില്‍ അമേരിക്കയിലേക്ക് യാത്ര ചെയ്യുന്നവര്‍ പ്രധാനമായും അഞ്ചു കാര്യങ്ങള്‍ ശ്രദ്ധിക്കണമെന്ന് വിദഗ്ധര്‍ ഓര്‍മ്മിപ്പിക്കുന്നു. വിസയുണ്ട് എന്നത് രാജ്യത്തോട്ടുള്ള ഉറപ്പായ പ്രവേശനമല്ല എന്നതാണ് ആദ്യത്തേത്. കൂടാതെ ആറുമാസത്തെ ഐ-94 കാലാവധി ലഭിക്കുമെന്ന് ഉറപ്പുപറയാന്‍ സാധിക്കില്ല.

യു.എസില്‍ പ്രവേശിച്ച ഉടന്‍ തന്നെ എല്ലാവരും തങ്ങളുടെ ഇലക്ട്രോണിക് ഐ-94 രേഖ പരിശോധിച്ച് കാലാവധി ഉറപ്പുവരുത്തണം. വിസ പാസ്‌പോര്‍ട്ടില്‍ പതിപ്പിച്ച കാലാവധിയല്ല, മറിച്ച് ഐ-94 രേഖയില്‍ നല്‍കിയിരിക്കുന്ന തീയതിയാണ് പ്രാബല്യത്തിലുള്ളതെന്ന കാര്യം മറക്കരുത്.

മടക്കയാത്രാ ടിക്കറ്റും സന്ദര്‍ശന ലക്ഷ്യവും കൃത്യമായി വ്യക്തമാക്കാന്‍ സാധിച്ചില്ലെങ്കില്‍ ഇമിഗ്രേഷന്‍ ഉദ്യോഗസ്ഥര്‍ക്ക് പ്രവേശനം നിഷേധിക്കാനോ സമയം വെട്ടിച്ചുരുക്കാനോ അധികാരമുണ്ട്. അതിനാല്‍ വിസിറ്റ് വിസയില്‍ അമേരിക്കയിലേക്ക് പോകുന്നവര്‍ കൃത്യമായ വിവരങ്ങളും വ്യക്തമായ പദ്ധതികളും കരുതണമെന്ന് നിയമവിദഗ്ധര്‍ വ്യക്തമാക്കുന്നു.