കേന്ദ്ര സർക്കാർ തുടർച്ചയായി ഡീസൽ വില വർധിപ്പിക്കുന്നതും പ്രവർത്തനച്ചെലവ് ഉയർന്നതുമാണ് ടിക്കറ്റ് നിരക്ക് കൂട്ടാൻ സർക്കാരിനെ നിർബന്ധിതരാക്കിയതെന്ന് മന്ത്രി വ്യക്തമാക്കി. നിരക്ക് വർധനവിലൂടെ നാല് ഗതാഗത കോർപ്പറേഷനുകളുടെയും കടുത്ത സാമ്പത്തിക പ്രതിസന്ധിക്ക് ഭാഗികമായി പരിഹാരം കാണാനാകുമെന്നും അദ്ദേഹം പറഞ്ഞു.

കഴിഞ്ഞ മേയ് മാസം മുതൽ കേന്ദ്ര സർക്കാർ ഏഴ് തവണയായി ലിറ്ററിന് 10.47 രൂപയുടെ വർധനവാണ് ഡീസൽ വിലയിൽ വരുത്തിയത്. നിലവിൽ പ്രതിദിനം 15.60 കോടി രൂപയും പ്രതിവർഷം 5,694 കോടി രൂപയുമാണ് ഇന്ധനത്തിനായി മാത്രം നാല് കോർപ്പറേഷനുകളും ചെലവഴിക്കുന്നത്. ആകെ വരുമാനത്തിന്റെ 80 ശതമാനവും ഡീസലിനും ജീവനക്കാരുടെ വേതനത്തിനുമായാണ് ചെലവാകുന്നത്. നിലവിൽ 10,200 കോടി രൂപയുടെ സഞ്ചിത നഷ്ടമാണ് കോർപ്പറേഷനുകൾ നേരിടുന്നത്.

സ്ത്രീകൾക്ക് സൗജന്യ യാത്ര അനുവദിക്കുന്ന ‘ശക്തി’ പദ്ധതിയാണ് നഷ്ടത്തിന് കാരണമെന്ന ആരോപണം മന്ത്രി തള്ളി. പ്രതിദിനം യാത്ര ചെയ്യുന്ന 1.24 കോടി ആളുകളിൽ 74.40 ലക്ഷത്തോളം സ്ത്രീകളാണ്. ഇവർക്കുള്ള സൗജന്യ യാത്രാ തുക സർക്കാർ കൃത്യമായി കോർപ്പറേഷനുകൾക്ക് റീഇംബേഴ്സ് ചെയ്യുന്നുണ്ടെന്നും അദ്ദേഹം കൂട്ടിച്ചേർത്തു.

KSRTC, NWKRTC, KKRTC ഓർഡിനറി ബസുകളിൽ ആദ്യ 5 സ്റ്റേജുകൾക്ക് പരമാവധി 9 രൂപ വരെ വർധിക്കും. എക്സ്പ്രസ് സർവീസുകളിൽ പരമാവധി 18 രൂപ വരെയാണ് വർധന. ബി.എം.ടി.സി (BMTC) സർവീസുകളിൽ 2 കി.മീ വരെയുള്ള യാത്രയ്ക്ക് 4 രൂപയും, 2 മുതൽ 4 കി.മീ വരെ 6 രൂപയും വർധിക്കും (പരമാവധി വർധന 12 രൂപ). നിരക്ക് എത്ര ശതമാനമാണ് വർധിപ്പിച്ചതെന്ന മാധ്യമപ്രവർത്തകരുടെ ചോദ്യത്തിന്, കൃത്യമായ ശതമാനം വ്യക്തമാക്കാതെ ഘട്ടം തിരിച്ചു കണക്കുകൂട്ടാൻ മന്ത്രി ആവശ്യപ്പെട്ടത് വാർത്താസമ്മേളനത്തിൽ ചെറിയ ആശയക്കുഴപ്പത്തിനും ഇടയാക്കി.