കർണാടക: ബസ് സ്റ്റാൻഡിൽ വെച്ച് ഫോൺ വിളിക്കാൻ സഹായം ചോദിച്ച യുവതിക്ക് സ്വന്തം മൊബൈൽ ഫോൺ നൽകിയ ഒരു യുവാവ് പിന്നീട് നേരിട്ടത് രണ്ടര വർഷത്തെ ജയിൽവാസം.

കൊലപാതകക്കുറ്റം ചുമത്തപ്പെട്ട് ജീവിതം തന്നെ തകർന്ന രാജേഷിന് ഒടുവിൽ നീതി ലഭിക്കുമെന്ന പ്രതീക്ഷയ്ക്ക് വഴിയൊരുങ്ങിയത്, കൊല്ലപ്പെട്ടുവെന്ന് പൊലീസ് കരുതിയ യുവതി ജീവനോടെ തിരിച്ചെത്തിയതോടെയാണ്. കർണാടകയിലെ മാണ്ഡ്യ ജില്ലയിലാണ് സിനിമാക്കഥയെ വെല്ലുന്ന സംഭവം.

2019 ജൂൺ 23-നാണ് കേസിന്റെ തുടക്കം. പാണ്ഡവപുര സ്വദേശിയായ നാഗരാജുവിന്റെ മകൾ മഞ്ജുവിനെ കാണാനില്ലെന്ന് കാണിച്ച് കുടുംബം പൊലീസിൽ പരാതി നൽകി. അന്വേഷണത്തിനിടെ മഞ്ജു അവസാനമായി ഫോൺ വിളിച്ചത് നിർമാണത്തൊഴിലാളിയായ രാജേഷിന്റെ മൊബൈലിൽ നിന്നാണെന്ന് പൊലീസ് കണ്ടെത്തി. ഈ ഫോൺവിളിയാണ് പിന്നീട് രാജേഷിനെ സംശയത്തിന്റെ നിഴലിലാക്കിയത്.

2021-ൽ മഞ്ജുവിന്റെ പിതാവ് വീണ്ടും പൊലീസിനെ സമീപിച്ചു. രാജേഷാണ് മകളെ കൊലപ്പെടുത്തി കാവേരി നദിയിൽ ഉപേക്ഷിച്ചതെന്ന് ചിലർ പറഞ്ഞതായി അദ്ദേഹം മൊഴി നൽകി. ഇതോടെ രാജേഷിനെ അറസ്റ്റ് ചെയ്ത് കൊലപാതകക്കുറ്റം ചുമത്തി ജയിലിലടച്ചു.

എന്നാൽ തനിക്ക് മഞ്ജുവിനെ അറിയില്ലെന്നും യാത്രയ്ക്കിടെ ഫോൺ ഉപയോഗിക്കാൻ സഹായിക്കുക മാത്രമാണ് ചെയ്തതെന്നും രാജേഷ് ആവർത്തിച്ചു. പൊലീസ് കസ്റ്റഡിയിൽ ക്രൂരമായ മർദനത്തിനും വൈദ്യുതാഘാതത്തിനും ഇരയായെന്നും ഭയം മൂലമാണ് കുറ്റം സമ്മതിച്ചതെന്നും രാജേഷ് പിന്നീട് വെളിപ്പെടുത്തി. രണ്ടര വർഷത്തോളം ജയിൽവാസം അനുഭവിച്ച ശേഷമാണ് ജാമ്യം ലഭിച്ചത്.

2026 നവംബറിലാണ് കേസിനെ പൂർണമായും മാറ്റിമറിച്ച സംഭവമുണ്ടായത്. പിതാവിനെ കാണാൻ മഞ്ജു വീണ്ടും നാട്ടിലെത്തിയതോടെയാണ് വർഷങ്ങളായി കാണാതായിരുന്ന യുവതി ജീവനോടെയുണ്ടെന്ന വിവരം പുറത്തുവന്നത്. രാജേഷിന്റെ അഭിഭാഷകൻ നാട്ടുകാരുടെ സഹായത്തോടെ മഞ്ജുവിന്റെ താമസസ്ഥലം കണ്ടെത്തി പൊലീസിനെ വിവരമറിയിക്കുകയായിരുന്നു.

മാധ്യമങ്ങളോട് സംസാരിച്ച മഞ്ജു, രാജേഷിനെ അറിയില്ലെന്നും വ്യക്തമാക്കിയിട്ടുണ്ട്. വീട്ടുകാരുടെ എതിർപ്പിനെ തുടർന്ന് മറ്റൊരാളുമായി പ്രണയത്തിലായിരുന്ന താൻ സ്വന്തം ഇഷ്ടപ്രകാരമാണ് ഒളിച്ചോടിയതെന്നാണ് മൊഴി. യാത്രയ്ക്കിടെ ബന്ധുവിനെ വിളിക്കാനായി വഴിയാത്രക്കാരനായ രാജേഷിനോട് ഫോൺ വാങ്ങി ഉപയോഗിക്കുകയായിരുന്നു. പിന്നീട് കോയമ്പത്തൂരിലും മറ്റിടങ്ങളിലുമായി താമസിച്ചു. തനിക്കെതിരെ കൊലപാതകക്കേസ് രജിസ്റ്റർ ചെയ്ത വിവരം അറിഞ്ഞിരുന്നില്ലെന്നും മഞ്ജു പറഞ്ഞു.

ജീവനോടെയുള്ള മഞ്ജുവിന്റെ തിരിച്ചുവരവോടെ അന്വേഷണത്തിലെ ഗുരുതരമായ വീഴ്ചകളും രാജേഷ് നേരിട്ടതായി പറയുന്ന കസ്റ്റഡി പീഡനങ്ങളും ചർച്ചയായിരിക്കുകയാണ്. കേസന്വേഷിച്ചിരുന്ന അന്നത്തെ പാണ്ഡവപുര പൊലീസ് ഇൻസ്പെക്ടർ പ്രഭാകർ സർവീസിൽ നിന്ന് വിരമിച്ചിട്ടുണ്ട്.

നിരപരാധിയായ രാജേഷിന്റെ ജീവിതം തകർത്ത സംഭവത്തിൽ ഉത്തരവാദികളായ ഉദ്യോഗസ്ഥർക്കെതിരെ നിയമനടപടി സ്വീകരിക്കണമെന്നും കുടുംബത്തിന് നഷ്ടപരിഹാരം നൽകണമെന്നും അഭിഭാഷകനും ബന്ധുക്കളും ആവശ്യപ്പെടുന്നു.

മഞ്ജുവിനെ നിലവിൽ മഹിളാ സന്ത്വന കേന്ദ്രത്തിലേക്ക് മാറ്റിയിട്ടുണ്ട്. സംഭവത്തിൽ വിശദമായ അന്വേഷണം നടത്താൻ ഉത്തരവിട്ടതായി മാണ്ഡ്യ എസ്.പി. ശോഭറാണി വി.ജെ. അറിയിച്ചു.

ഒരു ഫോൺവിളിയുടെ പേരിൽ കൊലപാതകക്കേസിൽ കുടുങ്ങിയ യുവാവ്... കൊല്ലപ്പെട്ടെന്ന് കരുതിയ യുവതി വർഷങ്ങൾക്കുശേഷം ജീവനോടെ തിരിച്ചെത്തിയപ്പോൾ ഉയരുന്നത് അന്വേഷണത്തിലെ പിഴവുകളെക്കുറിച്ചുള്ള ഗൗരവമായ ചോദ്യങ്ങളാണ്.

CENTRAL MEDIA NEWS DESK | 🌐 www.cmediaonline.in