ഉത്പന്നങ്ങളുടെ പാക്കറ്റുകളിൽ അമ്മയുടെയും കുഞ്ഞിന്റെയും ചിത്രങ്ങൾ ഉപയോഗിക്കരുതെന്നും ‘മുലപ്പാലാണ് ഉത്തമം’ എന്ന സന്ദേശം നിർബന്ധമായും ഉൾപ്പെടുത്തണമെന്നും എഫ്.ഡി.എ നിർദേശിച്ചു. നവജാത ശിശുക്കൾക്കുള്ള ഉത്പന്നങ്ങൾ ഡിസ്കൗണ്ട് നിരക്കിൽ വിൽക്കുന്നതിനും സൗജന്യമായി വിതരണം ചെയ്യുന്നതിനും വിലക്കേർപ്പെടുത്തിയിട്ടുണ്ട്.

മുലപ്പാലിന്റെ പ്രാധാന്യത്തെക്കുറിച്ച് അവബോധം വർധിപ്പിക്കുകയാണ് നടപടിയുടെ ലക്ഷ്യമെന്ന് മഹാരാഷ്ട്ര എഫ്.ഡി.എ കമ്മീഷണർ തുക്കാറാം മുണ്ടെ വ്യക്തമാക്കി. കുഞ്ഞുങ്ങൾക്ക് മുലപ്പാൽ നൽകുന്ന പ്രവണത കുറഞ്ഞുവരുന്നതായി പഠനങ്ങൾ സൂചിപ്പിക്കുന്നുണ്ടെന്നും അദ്ദേഹം പറഞ്ഞു. ബേബി ഫോർമുല ഉത്പന്നങ്ങളുടെ പ്രചാരണരീതികൾ നിയന്ത്രിക്കുന്നതിലൂടെ മുലയൂട്ടലിന്റെ പ്രാധാന്യം കൂടുതൽ പേരിലേക്ക് എത്തിക്കാനാകുമെന്നാണ് അധികൃതരുടെ വിലയിരുത്തൽ.

നവജാത ശിശുക്കൾക്കായുള്ള ഉത്പന്നങ്ങളുടെ വിപണനത്തിൽ കൂടുതൽ ഉത്തരവാദിത്തം ഉറപ്പാക്കുന്നതിന്റെ ഭാഗമായാണ് പുതിയ നിർദേശങ്ങൾ. ഉത്പന്നങ്ങളുടെ പാക്കേജിങ്ങിലും വിൽപ്പനയിലും ഏർപ്പെടുത്തിയ നിയന്ത്രണങ്ങൾ മുലപ്പാലിനെക്കുറിച്ചുള്ള തെറ്റായ ധാരണകൾ ഒഴിവാക്കാനും സഹായിക്കുമെന്ന് എഫ്.ഡി.എ പ്രതീക്ഷിക്കുന്നു.