ഗൂഗിളിൽ തിരയുമ്പോൾ നമ്മളിൽ ഭൂരിഭാഗം പേരും കരുതുന്നത് സ്‌ക്രീനിൽ തെളിയുന്നതെല്ലാം സുരക്ഷിതമാണെന്നാണ്. എന്നാൽ ഡിജിറ്റൽ ലോകത്ത് ഒളിഞ്ഞിരിക്കുന്ന തട്ടിപ്പുകളും ചതിക്കുഴികളും നിരവധിയാണ്.

ഓൺലൈൻ ലോകത്ത് നമ്മൾ വരുത്തുന്ന ചില ചെറിയ അശ്രദ്ധകൾ പോലും വൻ സാമ്പത്തിക നഷ്ടത്തിലേക്കോ വ്യക്തിഗത വിവരങ്ങളുടെ ചോർച്ചയിലേക്കോ നയിച്ചേക്കാം.

ഇന്റർനെറ്റ് സെർച്ച് ചെയ്യുമ്പോഴും ലിങ്കുകളിൽ ക്ലിക്ക് ചെയ്യുമ്പോഴും നമ്മൾ നിർബന്ധമായും ഒഴിവാക്കേണ്ട 5 പ്രധാന കാര്യങ്ങൾ താഴെ പറയുന്നവയാണ് ...

1. വ്യക്തിഗതബാങ്കിംഗ് വിവരങ്ങൾ ചോദിക്കുന്ന സൈറ്റുകൾ

ഓൺലൈനിൽ അപരിചിതമായ വെബ്‌സൈറ്റുകളിൽ കടക്കുമ്പോൾ നിങ്ങളുടെ പേര്, ഫോൺ നമ്പർ, വിലാസം അല്ലെങ്കിൽ ബാങ്ക് അക്കൗണ്ട്, ഡെബിറ്റ്/ക്രെഡിറ്റ് കാർഡ് വിവരങ്ങൾ നൽകുന്നത് വളരെ സൂക്ഷിച്ചു വേണം. ഒരു അക്കൗണ്ട് തുടങ്ങുമ്പോഴും ആവശ്യമുള്ള വിവരങ്ങൾ മാത്രം നൽകുക. വെബ്‌സൈറ്റിന്റെ address barൽ https:// എന്നും പൂട്ടിന്റെ (Padlock) ചിഹ്നവും ഉണ്ടെന്ന് ഉറപ്പുവരുത്തുക.

2. അജ്ഞാത ലിങ്കുകളും അറ്റാച്ച്‌മെന്റുകളും

ഇമെയിൽ വഴിയോ മെസ്സേജുകൾ വഴിയോ വരുന്ന സംശയകരമായ ലിങ്കുകളിൽ ക്ലിക്ക് ചെയ്യാതിരിക്കുക. ലോട്ടറി അടിച്ചെന്നോ, അടിയന്തരമായി അക്കൗണ്ട് വെരിഫൈ ചെയ്യണമെന്നോ പറയുന്ന സന്ദേശങ്ങൾ ഭൂരിഭാഗവും ഫിഷിംഗ് തട്ടിപ്പുകളായിരിക്കും. ലിങ്കിൽ ക്ലിക്ക് ചെയ്യുന്നതിന് മുൻപ് കർസർ അതിനു മുകളിലേക്ക് കൊണ്ട് വന്ന് (Hover ചെയ്ത്) യഥാർത്ഥ അഡ്രസ് ഏതാണെന്ന് ഉറപ്പുവരുത്തുക.

3. വ്യാജ ആപ്പുകളും സോഫ്റ്റ്‌വെയറുകളും ഡൗൺലോഡ് ചെയ്യുന്നത്

സൗജന്യമായി പ്രീമിയം ആപ്പുകൾ തരാമെന്ന വാഗ്ദാനം നൽകുന്ന ഔദ്യോഗികമല്ലാത്ത മൂന്നാം കക്ഷി വെബ്‌സൈറ്റുകളിൽ നിന്ന് ആപ്പുകളോ ഫയലുകളോ ഡൗൺലോഡ് ചെയ്യരുത്. ഇത് ഫോണിലേക്കോ കമ്പ്യൂട്ടറിലേക്കോ മാൽവെയറുകളും, വിവരങ്ങൾ ചോർത്തുന്ന സ്‌പൈവെയറുകളും കടത്തിവിടാൻ കാരണമാകും. ആപ്പുകൾ എപ്പോഴും ഗൂഗിൾ പ്ലേ സ്റ്റോർ അല്ലെങ്കിൽ ആപ്പിൾ ആപ്പ് സ്റ്റോർ എന്നിവയിൽ നിന്ന് മാത്രം ഡൗൺലോഡ് ചെയ്യുക.

4. പ്രശസ്ത വ്യക്തികളുടെ പേരിലുള്ള നിക്ഷേപ തട്ടിപ്പുകൾ

സോഷ്യൽ മീഡിയകളിലും സെർച്ചുകളിലും കാണുന്ന 'സിനിമ താരങ്ങളോ പ്രമുഖ വ്യവസായികളോ നിർദ്ദേശിക്കുന്ന നിക്ഷേപ പദ്ധതികൾ' പലപ്പോഴും ഉപയോഗിച്ച് നിർമ്മിച്ച വ്യാജ വീഡിയോകളാകാം. വൻ ലാഭം വാഗ്ദാനം ചെയ്യുന്ന ഇത്തരം ലിങ്കുകളിൽ ക്ലിക്ക് ചെയ്ത് പണം നിക്ഷേപിക്കരുത്.

5. വ്യാജ ഓഫറുകളും അമിത കിഴിവുകളും നൽകുന്ന ഇകോമേഴ്‌സ് സൈറ്റുകൾ

വലിയ ബ്രാൻഡുകളുടെ പേരുകളിൽ വ്യാജ വെബ്‌സൈറ്റുകൾ ഉണ്ടാക്കി അതിശയകരമായ വിലക്കുറവിൽ ഉൽപ്പന്നങ്ങൾ വാഗ്ദാനം ചെയ്യുന്ന തട്ടിപ്പ് രീതി വ്യാപകമാണ്. ഇത്തരം സൈറ്റുകളുടെ URL നന്നായി പരിശോധിച്ച് മാത്രം സാധനങ്ങൾ വാങ്ങുക.

ഉപയോക്താക്കൾ ശ്രദ്ധിക്കേണ്ട ചില ഡിജിറ്റൽ സുരക്ഷാ മുൻകരുതലുകൾ:

ശക്തമായ പാസ്‌വേഡുകൾ ഉപയോഗിക്കുക: എല്ലാ അക്കൗണ്ടുകൾക്കും ഒരേ പാസ്‌വേഡ് ഉപയോഗിക്കരുത്. അക്ഷരങ്ങളും അക്കങ്ങളും സ്‌പെഷ്യൽ ക്യാരക്ടറുകളും ഉൾപ്പെടുത്തി കരുത്തുറ്റ പാസ്‌വേഡ് സൃഷ്ടിക്കുക.

Two-Factor Authentication (2FA) ഓൺ ചെയ്യുക: അക്കൗണ്ടുകളുടെ സുരക്ഷ ഇരട്ടിയാക്കാൻ ഫോണിലേക്ക് വരിഫിക്കേഷൻ കോഡ് വരുന്ന രീതിയിലുള്ള 2FA സംവിധാനം ഉപയോഗിക്കുക.

പബ്ലിക് വൈഫൈ ഉപയോഗിക്കുമ്പോൾ സൂക്ഷിക്കുക: കഫേകളിലും റെയിൽവേ സ്റ്റേഷനുകളിലും ലഭിക്കുന്ന സൗജന്യ വൈഫൈ നെറ്റ്‌വർക്കുകൾ ഉപയോഗിച്ച് ബാങ്കിംഗ് ഇടപാടുകൾ നടത്തുമ്പോൾ ഡാറ്റ ചോരാൻ സാധ്യത കൂടുതലാണ്.

NEWS courtesy : റോബിൻസ് ആന്റണി സി മീഡിയ ഓൺലൈൻ