നോർത്ത് ഡൽഹിയിലെ ബവാനയിലെ ന്യൂ സനോത്ത് കോളനിയിൽ നടത്തിയ പരിശോധനയിലാണ് ഇരുവരും അറസ്റ്റിലായത്. ഡൽഹി പൊലീസിന്റെ ആന്റി നാർക്കോട്ടിക്സ് സ്ക്വാഡിന് സെപ്റ്റംബർ 23ന് ലഭിച്ച വിവരത്തിന്റെ അടിസ്ഥാനത്തിലായിരുന്നു പരിശോധന. വീട്ടിലെ രണ്ടാം നിലയിൽ നടത്തിയ റെയ്ഡിൽ 1.204 കിലോഗ്രാം ഹെറോയിൻ ഉൾപ്പെടെയുള്ള മയക്കുമരുന്നുകൾ പിടിച്ചെടുത്തതായി പൊലീസ് അറിയിച്ചു. പിടിച്ചെടുത്ത മയക്കുമരുന്നിന് മാത്രം 1.5 കോടിയിലധികം രൂപ വിലവരുമെന്നാണ് പൊലീസ് കണക്കാക്കുന്നത്.

പാർവതിയുടെ വീട്ടിൽ നടത്തിയ പരിശോധനയിൽ 56.69 ലക്ഷം രൂപ പണമായും 355 ഗ്രാം സ്വർണവും 161 ഗ്രാം വെള്ളിയും കണ്ടെത്തിയതായി പൊലീസ് പറഞ്ഞു. കൂടാതെ നാല് വസ്തുക്കളുടെ രജിസ്ട്രേഷൻ രേഖകളും രണ്ട് കാറുകളും പിടിച്ചെടുത്തിട്ടുണ്ട്. മയക്കുമരുന്ന് കടത്തിലൂടെ ലഭിച്ച പണം ഉപയോഗിച്ചാണ് സ്വത്തുക്കളും മറ്റ് വസ്തുക്കളും സ്വന്തമാക്കിയതെന്നാണ് പൊലീസിന്റെ ആരോപണം. പാർവതിക്കെതിരെ നേരത്തെ തന്നെ നാർക്കോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് ആക്ട്, എക്സൈസ് ആക്ട് എന്നിവ പ്രകാരം 12 കേസുകൾ രജിസ്റ്റർ ചെയ്തിട്ടുണ്ടെന്നും പൊലീസ് വ്യക്തമാക്കി. നരേല ഇൻഡസ്ട്രിയൽ ഏരിയ പൊലീസ് സ്റ്റേഷന്റെ ‘ബാഡ് ക്യാരക്ടർ ഹിസ്റ്ററി ഷീറ്റിലും’ ഇവരുടെ പേര് ഉൾപ്പെട്ടിട്ടുണ്ടെന്നാണ് പൊലീസ് പറയുന്നത്.

ബവാനയിലെ വാടകവീട്ടിലാണ് പാർവതി താമസിച്ചിരുന്നത്. ബുറാരിയിലെ സന്ത് നഗർ സ്വദേശിയായ വികാസ് കുമാർ ഇവർക്കൊപ്പം താമസിക്കുകയും ബോഡിഗാർഡായി ജോലി ചെയ്യുകയും ചെയ്തിരുന്നുവെന്നാണ് പൊലീസ് പറയുന്നത്. മയക്കുമരുന്ന് കടത്തിലൂടെ ലഭിച്ച പണം ഉപയോഗിച്ച് പാർവതി ഒരു വീട് നിർമ്മിച്ചുവരികയായിരുന്നുവെന്നും പൊലീസ് ആരോപിക്കുന്നു. കേസുമായി ബന്ധപ്പെട്ട് ഇതുവരെ മൂന്ന് പേരെ അറസ്റ്റ് ചെയ്തതായി പൊലീസ് അറിയിച്ചു. മയക്കുമരുന്ന് ശൃംഖലയുടെ വ്യാപ്തിയും പിടിച്ചെടുത്ത പണത്തിന്റെയും സ്വത്തുക്കളുടെയും ഉറവിടവും കണ്ടെത്തുന്നതിനുള്ള അന്വേഷണം തുടരുകയാണ്.