വടക്കേ അമേരിക്കയിലേക്കുള്ള തിരഞ്ഞെടുക്കപ്പെട്ട ദീര്‍ഘദൂര അന്താരാഷ്ട്ര സര്‍വീസുകളില്‍ ഇനി മുതല്‍ 'വുഡ്-ഫയര്‍ഡ് സ്റ്റോണ്‍-ബേക്ക്ഡ്' പിസ്സകള്‍ ലഭ്യമാകും. പ്രമുഖ മാധ്യമങ്ങള്‍ ഉള്‍പ്പെടെയാണ് എയര്‍ ഇന്ത്യയുടെ ഈ വേറിട്ട നീക്കം റിപ്പോര്‍ട്ട് ചെയ്തിരിക്കുന്നത്.

പുതിയ മാവും ആര്‍ട്ടിസാനല്‍ ചീസും ഗുണനിലവാരമുള്ള ചേരുവകളും ഉപയോഗിച്ച് നിര്‍മ്മിച്ച് സ്റ്റോണ്‍-ബേക്ക് ചെയ്‌തെടുക്കുന്ന പിസ്സകളാണ് യാത്രക്കാര്‍ക്ക് നല്‍കുന്നത്. ഉയര്‍ന്ന ആകാശദൂരങ്ങളില്‍ സാധാരണ എയര്‍ലൈന്‍ ഭക്ഷണങ്ങള്‍ക്ക് പകരം മികച്ചൊരു പിസ്സീരിയയില്‍ (Pizzeria) നിന്ന് ലഭിക്കുന്ന അതേ രുചിയും ഗുണനിലവാരവും ഉറപ്പാക്കാന്‍ ഈ നിര്‍മ്മാണ രീതിയിലൂടെ സാധിക്കുന്നുണ്ട്.

ന്യൂയോര്‍ക്ക് (JFK)-ഡല്‍ഹി, സാന്‍ ഫ്രാന്‍സിസ്‌കോ-ഡല്‍ഹി, ന്യൂആര്‍ക്ക്-മുംബൈ, ടൊറന്റോ-ഡല്‍ഹി, വാന്‍കൂവര്‍-ഡല്‍ഹി എന്നീ റൂട്ടുകളിലാണ് നിലവില്‍ ഈ സേവനം ലഭ്യമാക്കിയിരിക്കുന്നത്. ബിസിനസ് ക്ലാസുകാര്‍ക്ക് മാത്രമല്ല, ഇക്കോണമി, പ്രീമിയം ഇക്കോണമി ക്ലാസുകളിലെ യാത്രക്കാര്‍ക്കും പിസ്സ ലഭ്യമാക്കുന്നു എന്നത് ഇതിന്റെ ആകര്‍ഷണീയത വര്‍ദ്ധിപ്പിക്കുന്നു.

സാധാരണയായി വിമാനത്തിനുള്ളില്‍ ലഭ്യമാകുന്ന ഭക്ഷണങ്ങളില്‍ റീഹീറ്റിംഗിനും സംഭരണത്തിനും വലിയ പരിമിതികളാണുള്ളത്. എന്നാല്‍ ഇത്തരമൊരു പരീക്ഷണം വിജയകരമായി പൂര്‍ത്തിയാക്കിയത് വ്യോമയാന മേഖലയിലെ ഭക്ഷണ വിതരണ രംഗത്ത് വലിയ മാറ്റങ്ങള്‍ക്ക് വഴിതുറക്കും. എയര്‍ ഇന്ത്യയുടെ പുതിയ മാറ്റത്തെ സോഷ്യല്‍ മീഡിയയിലൂടെ നിരവധിയാളുകളാണ് അഭിനന്ദിക്കുന്നത്.

അന്താരാഷ്ട്ര സര്‍വീസുകളിലെ ഭക്ഷണക്രമം വിപുലീകരിക്കുന്നതിന്റെ ഭാഗമായാണ് പിസ്സ ഉള്‍പ്പെടെയുള്ള പുതിയ വിഭവങ്ങള്‍ എയര്‍ ഇന്ത്യ അവതരിപ്പിച്ചിരിക്കുന്നത്. ഇന്ത്യയിലെ വൈവിധ്യമാര്‍ന്ന പ്രാദേശിക വിഭവങ്ങള്‍ക്കൊപ്പം യൂറോപ്യന്‍, പാന്‍-ഏഷ്യന്‍ ഭക്ഷണങ്ങളും വിമാനങ്ങളില്‍ ലഭ്യമാണ്.

വെജ് അവധി ഥാലി, ജാപ്പനീസ് ടെപ്പന്യാക്കി ബൗള്‍, ചിക്കന്‍ ബിബിംബാപ് തുടങ്ങിയ ജനപ്രിയ അന്താരാഷ്ട്ര വിഭവങ്ങളും പുതിയ മെനുവിന്റെ ഭാഗമാണ്. ഇന്ത്യയില്‍ നിന്ന് പുറപ്പെടുന്ന പ്രധാന അന്താരാഷ്ട്ര റൂട്ടുകളിലെല്ലാം ഈ പുതിയ മെനു പ്രാബല്യത്തില്‍ വന്നിട്ടുണ്ട്.

യാത്രക്കാരുടെ ഭക്ഷണ പാനീയങ്ങളുടെ പട്ടിക കൂടുതല്‍ സമ്പന്നമാക്കിയ എയര്‍ ഇന്ത്യയുടെ ഈ നീക്കം അന്താരാഷ്ട്ര തലത്തില്‍ എയര്‍ലൈന്റെ ജനപ്രീതി വര്‍ദ്ധിപ്പിക്കുമെന്നാണ് വിലയിരുത്തപ്പെടുന്നത്. 35,000 അടി ഉയരത്തില്‍ വെച്ച് ചൂടുള്ള ഒരു സ്ലൈസ് പിസ്സ കഴിക്കാന്‍ അവസരമൊരുങ്ങുന്നത് ദീര്‍ഘദൂര യാത്രക്കാരെ സംബന്ധിച്ചിടത്തോളം വേറിട്ടൊരു അനുഭവമായിരിക്കും.