ലോകത്തിലെ ഏറ്റവും വിലകൂടിയ അരി എന്ന പേരിൽ ഗിന്നസ് വേൾഡ് റെക്കോർഡിൽ ഇടംപിടിച്ച ‘കിൻമെമൈ പ്രീമിയം’ അരിയെക്കുറിച്ചാണ് പറഞ്ഞു വരുന്നത്.

ജപ്പാനിൽ നിന്നുള്ള ഈ വിസ്മയ അരിയുടെ വില കേട്ട് നെറ്റി ചുളിക്കുന്നവർ അതിന് പിന്നിലെ സാങ്കേതികവിദ്യ കൂടി അറിയണം. വെറുമൊരു അരിയല്ല ഇത് . പേറ്റന്റ് നേടിയ പ്രത്യേക ജാപ്പനീസ് മില്ലിംഗ് സാങ്കേതികവിദ്യയിലൂടെയാണ് ഇത് ഉത്പാദിപ്പിക്കുന്നത്. സാധാരണ മില്ലിംഗ് പ്രക്രിയയിൽ അരിയുടെ പോഷകഗുണങ്ങൾ നഷ്ടപ്പെടുമ്പോൾ, കിൻമെമൈ അരിയിൽ അവ കൃത്യമായി നിലനിർത്തുന്നു.

ഈ അരിയുടെ ഏറ്റവും വലിയ പ്രത്യേകത ഇത് പാചകം ചെയ്യുന്നതിന് മുൻപ് കഴുകേണ്ട ആവശ്യമില്ല എന്നതാണ്. സാധാരണ അരി കഴുകുമ്പോൾ അതിലെ പോഷകങ്ങൾ നഷ്ടപ്പെടാൻ സാധ്യതയുണ്ട്. എന്നാൽ പ്രത്യേക പ്രോസസിംഗിലൂടെ പുറത്തിറങ്ങുന്ന കിൻമെമൈ അരി നേരിട്ട് വെള്ളമൊഴിച്ച് വേവിക്കാം. ഇത് സമയലാഭം നൽകുന്നതിനൊപ്പം പോഷകങ്ങൾ പൂർണ്ണമായും ശരീരത്തിന് ലഭ്യമാക്കുകയും ചെയ്യുന്നു.

സാധാരണ അരിയെ അപേക്ഷിച്ച് വൈറ്റമിനുകളും അന്നജവും ഇതിൽ വളരെ കൂടുതലാണ്.
വളരെ ഭാരം കുറഞ്ഞ ഈ അരി എളുപ്പത്തിൽ ദഹിക്കുമെന്നതിനാൽ ആരോഗ്യ പ്രേമികൾക്കിടയിൽ വലിയ പ്രിയമാണ്.
ബ്രൗൺ റൈസിലെ എല്ലാ ഗുണങ്ങളും അടങ്ങിയിട്ടുണ്ടെങ്കിലും കഴിക്കുമ്പോൾ വെളുത്ത അരിയുടെ അത്രയും രുചികരമാണ് കിൻമെമൈ.

വിപണിയിലെ മറ്റ് പ്രീമിയം ബ്രാൻഡുകളെ കടത്തിവെട്ടിയാണ് കിൻമെമൈ ഈ വില നേടിയത്. ജപ്പാനിലെ മികച്ച അഞ്ച് ഇനം അരികൾ മിശ്രണം ചെയ്താണ് ഇത് തയ്യാറാക്കുന്നത്. ഇതിന്റെ ഓരോ മണിയും ആരോഗ്യത്തിന്റെ ഒരു കലവറ തന്നെയാണെന്നാണ് നിർമ്മാതാക്കൾ അവകാശപ്പെടുന്നത്. കേരളത്തിലെ സാധാരണക്കാർക്ക് ഒരുപക്ഷേ ഇത് സ്വപ്നം കാണാൻ പോലുമാകാത്ത വിലയാണെങ്കിലും, ലോകത്തിലെ അതിസമ്പന്നരുടെ തീൻമേശകളിൽ ഇന്ന് കിൻമെമൈ പ്രീമിയം അരിക്ക് വലിയ സ്ഥാനമാണുള്ളത്.