സ്വന്തം രാജ്യങ്ങളിൽ കുടുങ്ങിക്കിടക്കുന്ന യു എ ഇ നിവാസികൾ മടങ്ങിവരവ് തീയതികൾ പുനഃക്രമീകരിച്ചിരുന്നു. ഇവരെയാണ് പിഴിയാൻ ശ്രമിക്കുന്നത്. പാകിസ്ഥാനിൽ നിന്നും ചില ഇന്ത്യൻ നഗരങ്ങളിൽ നിന്നുമുള്ള വിമാന ടിക്കറ്റുകളിൽ വൻ വർധനവ് ഉണ്ടായിട്ടുണ്ട്. സൈനിക നടപടികൾക്ക് മുമ്പ് ഇന്ത്യയിലേക്കും പാകിസ്ഥാനിലേക്കും അവധിക്കാലം ആഘോഷിക്കാൻ പോയ യു എ ഇ നിവാസികളിൽ നിന്ന് ധാരാളം അന്വേഷണങ്ങളും ആവശ്യങ്ങളും വരുന്നുണ്ടെന്ന് യു എ ഇയിലെ ട്രാവൽ ഏജന്റുമാർ പറഞ്ഞു. സ്ഥിതിഗതികൾ വഷളായാൽ വിമാന സർവീസുകൾ വീണ്ടും നിർത്തിവെക്കപ്പെടുമെന്ന് ഭയന്ന് നേരത്തെ മടങ്ങാൻ അവർ ആഗ്രഹിക്കുന്നു. പാകിസ്ഥാനിൽ നിന്നുള്ളവരാണ് കൂടുതൽ.

നിലവിൽ ലാഹോറിൽ അവധിക്കാലം ആഘോഷിക്കുകയും യു എ ഇയിലേക്ക് മടങ്ങാൻ ആഗ്രഹിക്കുകയും ചെയ്യുന്ന ആളുകൾ, അടുത്ത കുറച്ച് ദിവസങ്ങൾക്കുള്ളിൽ വിമാന ടിക്കറ്റ് നിരക്കുകൾ വളരെ ഉയർന്നതാണെന്ന് പറഞ്ഞു. “മെയ് 17 വരെയുള്ള വിമാന ടിക്കറ്റ് നിരക്കുകൾ വർധിച്ചു. മെയ് 18നും അതിനുശേഷമുള്ള തീയതികളിലെയും വിമാന ടിക്കറ്റ് നിരക്കുകൾ സാധാരണമാണ്’ ഒരു യാത്രക്കാരൻ പറഞ്ഞു. ഇന്ത്യ പഞ്ചാബിലെ വിമാനത്താവളങ്ങൾ അടച്ചിരുന്നതിനാൽ തിങ്കളാഴ്ച ഡൽഹിയിൽ നിന്ന് ദുബൈയിലേക്കുള്ള വൺവേ ടിക്കറ്റ് നിരക്ക് 44,670 രൂപ (1,920 ദിർഹം) ആയി. ധാരാളം താമസക്കാർ ഡൽഹി വിമാനത്താവളത്തിൽ നിന്ന് പറക്കാൻ തിരഞ്ഞെടുത്തു. എന്നിരുന്നാലും, വൺവേ ടിക്കറ്റ് നിരക്ക് ക്രമാനുഗതമായി കുറയുകയും വെള്ളിയാഴ്ചയോടെ ഏകദേശം 910 ദിർഹത്തിലെത്തുകയും ചെയ്യും.

അതേസമയം, ഡൽഹി – അബൂദബി വിമാന ടിക്കറ്റ് നിരക്ക് തിങ്കളാഴ്ച 51,600 രൂപ (2,230 ദിർഹം) യും ചൊവ്വാഴ്ച 90,300 രൂപ (3,900 ദിർഹം) യും ആയിരുന്നു. ഉയർന്ന ഡിമാൻഡ് കാരണം അടുത്ത കുറച്ച് ദിവസങ്ങളിൽ ഡൽഹി – ഷാർജ വിമാനങ്ങളിലെ ബജറ്റ് കാരിയറിന്റെ വിമാന നിരക്ക് ദിർഹം 1,360നും 1,180നും ഇടയിലായിരുന്നു. ലാഹോറിൽ നിന്ന് ദുബൈ വിമാന നിരക്ക് ഏകദേശം 700,000 രൂപ (9,100 ദിർഹം) വരെ ഉയർന്നെങ്കിലും വെള്ളിയാഴ്ച ഏകദേശം 390,000 (5,100 ദിർഹം) ആയി കുറഞ്ഞു. യാത്രക്കാരുടെ തിരക്ക് കാരണം ബുധനാഴ്ച വരെ ലാഹോർ – അബൂദബിയിലെ സീറ്റുകൾ ഏതാണ്ട് വിറ്റുതീർന്നതായി ഒരു പ്രാദേശിക കാരിയറിന്റെ വെബ്സൈറ്റ് കാണിച്ചു. ടിക്കറ്റ് നിരക്ക് 540,000 രൂപ (7,050 ദിർഹം) ആയി. വ്യോമാതിർത്തി അടച്ചതിനാൽ കഴിഞ്ഞ കുറച്ച് ദിവസങ്ങളായി പാകിസ്ഥാനിൽ നിന്നുള്ള നൂറുകണക്കിന് വിമാനങ്ങൾ റദ്ദാക്കിയിരുന്നു.