യുകെ, കാനഡ, ജര്മനി, യു എസ്, ഓസ്ട്രേലിയ തുടങ്ങിയ രാജ്യങ്ങളില് പഠനം പൂര്ത്തിയാക്കിയ ശേഷം ദീര്ഘകാല തൊഴില് വിസ നേടാന് കഴിയാത്തതാണ് പലരെയും മടങ്ങാന് നിര്ബന്ധിതരാക്കുന്നത്. വിദേശത്തേക്ക് പോകുന്ന വിദ്യാര്ഥികളുടെ എണ്ണം വര്ധിച്ച അതേ കാലയളവില് തിരിച്ചെത്തുന്നവരുടെ എണ്ണത്തിലും ശ്രദ്ധേയമായ മാറ്റമുണ്ടായതായി റിപ്പോര്ട്ട് പറയുന്നു.
കോവിഡ് ശേഷമുള്ള 2021 മുതല് 2025 വരെയുള്ള കാലയളവില് വിദേശപഠനത്തിനായി കേരളത്തില് നിന്ന് വലിയ തോതില് യുവാക്കള് പോയിരുന്നു. എന്നാല് പല രാജ്യങ്ങളും കുടിയേറ്റ, തൊഴില് വിസാ നിബന്ധനകള് കര്ശനമാക്കിയതോടെ പഠനം പൂര്ത്തിയാക്കിയ ശേഷം അവിടെ തുടരാനുള്ള അവസരങ്ങള് കുറഞ്ഞു. വിദേശ സര്വകലാശാലകളില് നിന്നുള്ള ബിരുദം മാത്രം തൊഴില് ഉറപ്പാക്കുന്നില്ലെന്നും തൊഴില്ദാതാക്കളുടെ സ്പോണ്സര്ഷിപ്പ് ആവശ്യകതകള് അവസരങ്ങള് പരിമിതപ്പെടുത്തുന്നുവെന്നും മടങ്ങിയെത്തിയ വിദ്യാര്ഥികള് പറയുന്നു. വിദേശപഠനത്തിനായി വായ്പയെടുത്ത കുടുംബങ്ങള്ക്ക് ദീര്ഘകാല തൊഴില്തിരച്ചില് സാമ്പത്തികമായി വലിയ ബാധ്യതയാകുന്നതും തിരിച്ചുവരവിന് കാരണമാകുന്നു.
കേരളത്തിന്റെ പ്രൊഫഷണല് പ്രതിഭാശേഖരം കഴിഞ്ഞ അഞ്ച് വര്ഷത്തിനിടെ 172 ശതമാനം വര്ധിച്ചതായി സംസ്ഥാന സര്ക്കാരിനായി ലിങ്ക്ഡ്ഇന് തയ്യാറാക്കിയ റിപ്പോര്ട്ടില് പറയുന്നുണ്ട്. 2023ലെ കേരള മൈഗ്രേഷന് സര്വേ പ്രകാരം 2.5 ലക്ഷം കേരളീയര് വിദ്യാഭ്യാസത്തിനായി വിദേശത്തേക്ക് പോയിരുന്നു. വിദേശപഠനത്തിനായി പോകുന്നവരില് 17 വയസിന് താഴെയുള്ളവരുടെ എണ്ണവും വര്ധിക്കുന്നതായി റിപ്പോര്ട്ട് ചൂണ്ടിക്കാട്ടുന്നു. വിദേശത്തുനിന്ന് മടങ്ങിയെത്തുന്നവരില് ചിലര് കേരളത്തിലും മറ്റു ഇന്ത്യന് നഗരങ്ങളിലുമായി ജോലി കണ്ടെത്തുമ്പോള് മറ്റുചിലര് ഉയര്ന്ന പഠനത്തിനും മത്സരപ്പരീക്ഷകള്ക്കും പ്രഫഷനല് കോഴ്സുകള്ക്കും തിരിയുന്നു.
അതേസമയം,
വിദേശ വിദ്യാഭ്യാസ സ്ഥാപനങ്ങളിലേക്കുള്ള പ്രവേശനവും തൊഴില് സാധ്യതകളും സംബന്ധിച്ച് ചില ഏജന്സികള് യാഥാര്ഥ്യബോധമില്ലാത്ത വാഗ്ദാനങ്ങള് നല്കുന്നതായും വിദ്യാര്ഥികള് ആരോപിക്കുന്നു.
ഇത്തരം സ്ഥാപനങ്ങള്ക്കെതിരെ നിയമനടപടി സ്വീകരിക്കുമെന്നു ആവശ്യമായാല് പുതിയ നിയമനിര്മാണം പരിഗണിക്കുമെന്നും കേരള ഉന്നതവിദ്യാഭ്യാസ മന്ത്രി റോജി എം ജോണ് പറഞ്ഞു.
വിദേശത്തുനിന്ന് മടങ്ങിയ വിദ്യാര്ഥികളുടെ കൃത്യമായ കണക്ക് സര്ക്കാരിന്റെ കൈവശമില്ലെന്നും അതിനായി പ്രത്യേക രേഖ സംവിധാനം ആവശ്യമാണെന്നും മന്ത്രി വ്യക്തമാക്കി.
വിദേശപഠനത്തിനും ജോലി സാധ്യതകള്ക്കുമായി പോയ മലയാളി വിദ്യാര്ഥികളില് കൂടുതല് പേര് വിസാ നിയന്ത്രണങ്ങളും തൊഴില് സാധ്യതകളിലെ കുറവും ഉയര്ന്ന പഠനച്ചെലവും കാരണം കേരളത്തിലേക്ക് മടങ്ങുന്നതായി റിപ്പോര്ട്ട് !!
Advertisement
Advertisement
Advertisement
