തിങ്കളാഴ്ച പുലർച്ചെയോടെ തന്നെ സേവന തടസ്സവുമായി ബന്ധപ്പെട്ട പരാതികൾ ഉയർന്നതായി ഔട്ടേജ് നിരീക്ഷണ പ്ലാറ്റ്‌ഫോമായ ഡൗൺഡിറ്റക്ടർ വ്യക്തമാക്കുന്നു.

മെറ്റയുടെ ഉടമസ്ഥതയിലുള്ള വാട്സ്ആപ്പ് ഉപയോഗിക്കുന്നവർക്ക് ഫോട്ടോകൾ, വീഡിയോകൾ, സ്റ്റിക്കറുകൾ, GIFകൾ തുടങ്ങിയ മീഡിയ ഫയലുകൾ അയയ്ക്കാൻ കഴിയുന്നില്ലെന്നാണ് പ്രധാന പരാതി. ചില ഉപയോക്താക്കൾക്ക് സന്ദേശങ്ങളും മീഡിയ ഫയലുകളും കൈമാറുന്നതിൽ തടസ്സം നേരിട്ടതായും റിപ്പോർട്ടുകളുണ്ട്.
തിങ്കളാഴ്ച രാവിലെ മുതൽ ഇന്ത്യയുടെ വിവിധ ഭാഗങ്ങളിൽ നിന്നാണ് ഡൗൺഡിറ്റക്ടറിൽ പരാതികൾ രേഖപ്പെടുത്താൻ തുടങ്ങിയത്. സാധാരണയായി ഉപയോക്താക്കൾ നേരിടുന്ന പ്രശ്നങ്ങൾ കേന്ദ്രീകരിച്ച് ഔട്ടേജ് സംബന്ധിച്ച സൂചനകൾ നൽകുന്ന പ്ലാറ്റ്‌ഫോമാണ് ഡൗൺഡിറ്റക്ടർ.

അതേസമയം, സേവന തടസ്സത്തിന്റെ കാരണം സംബന്ധിച്ച് വാട്സ്ആപ്പിന്റെ ഭാഗത്തുനിന്ന് ഔദ്യോഗിക വിശദീകരണം ലഭ്യമായിട്ടില്ല. പ്രശ്നം എത്രത്തോളം വ്യാപകമാണെന്നും എല്ലാ ഉപയോക്താക്കളെയും ബാധിച്ചിട്ടുണ്ടോയെന്നും വ്യക്തമല്ല. വാട്സ്ആപ്പിന്റെ സേവനം സാധാരണ നിലയിലേക്ക് മടങ്ങിയെത്തുന്നുണ്ടോയെന്ന കാര്യത്തിൽ ഉപയോക്താക്കൾ ഇപ്പോഴും നിരീക്ഷണം തുടരുകയാണ്.