ബിസിനസ് ക്ലാസിലെ ഈ ബജറ്റ് ഓപ്ഷന്‍ ബേസിക് ബിസിനസ് എന്ന പേരിലാണ് കമ്പനി വിപണിയിലെത്തിക്കുന്നത്.

യാത്രക്കാര്‍ക്ക് വിമാനത്തിനുള്ളിലെ പ്രീമിയം സൗകര്യങ്ങള്‍ പൂര്‍ണ്ണമായും നിലനിര്‍ത്തിക്കൊണ്ട്, എയര്‍പോര്‍ട്ടിലെ അധിക ആനുകൂല്യങ്ങള്‍ ഒഴിവാക്കി ടിക്കറ്റ് നിരക്ക് കുറയ്ക്കുക എന്നതാണ് ഈ പുതിയ അണ്‍ബണ്ടലിംഗ് തന്ത്രത്തിലൂടെ ഡെല്‍റ്റ ലക്ഷ്യമിടുന്നത്.

പുതിയ ബേസിക് ബിസിനസ് ടിക്കറ്റ് എടുക്കുന്നവര്‍ക്ക് വിമാനത്തിനുള്ളില്‍ സാധാരണ ഡെല്‍റ്റ വണ്‍ യാത്രക്കാര്‍ക്ക് ലഭിക്കുന്ന എല്ലാ ആഡംബരങ്ങളും ലഭിക്കും. സോണ്‍ 1 ബോര്‍ഡിംഗ്, സുഖകരമായി കിടന്നുറങ്ങാന്‍ കഴിയുന്ന ലൈ-ഫ്‌ലാറ്റ് ബെഡ്ഡുകള്‍, മികച്ച ഭക്ഷണം, മദ്യം, പ്രീമിയം ബെഡ്ഡിംഗ്‌സ്, അമെനിറ്റി കിറ്റുകള്‍ എന്നിവയെല്ലാം ഇതില്‍ ഉള്‍പ്പെടുന്നു. എന്നാല്‍ കുറഞ്ഞ നിരക്കില്‍ ടിക്കറ്റ് ലഭിക്കുമ്പോള്‍ ചില പ്രധാന ആനുകൂല്യങ്ങള്‍ യാത്രക്കാര്‍ക്ക് നഷ്ടമാകും.

ലോഞ്ച് ആക്‌സസ് ഇല്ല: ഡെല്‍റ്റയുടെ പ്രശസ്തമായ ഡെല്‍റ്റ വണ്‍ ലോഞ്ചുകളിലോ ഡെല്‍റ്റ സ്‌കൈ ക്ലബ്ബുകളിലോ പ്രവേശനം ലഭിക്കില്ല (പ്രത്യേക ക്രെഡിറ്റ് കാര്‍ഡോ മെമ്പര്‍ഷിപ്പോ ഉള്ളവര്‍ക്ക് ഒഴികെ). പുതിയ മാറ്റങ്ങളുമായി പൊരുത്തപ്പെടാന്‍ 2027 ജനുവരി 18 വരെ നിലവിലുള്ള ലൗഞ്ച് സൗകര്യം തുടരും.

സീറ്റ് തിരഞ്ഞെടുക്കാന്‍ കഴിയില്ല: ടിക്കറ്റ് ബുക്ക് ചെയ്യുമ്പോള്‍ സൗജന്യമായി സീറ്റ് മുന്‍കൂട്ടി തിരഞ്ഞെടുക്കാന്‍ സാധിക്കില്ല. ചെക്ക്-ഇന്‍ സമയത്ത് മാത്രമായിരിക്കും സീറ്റ് അനുവദിക്കുക.

ലഗേജ് പരിമിതി: സാധാരണ ബിസിനസ് ക്ലാസിനേക്കാള്‍ ഒരു ചെക്ക്-ഇന്‍ ബാഗ് കുറവായിരിക്കും അനുവദിനീയമായിട്ടുള്ളത്.

ഫ്‌ലെക്‌സിബിലിറ്റി കുറവ്: ടിക്കറ്റുകളില്‍ സൗജന്യമായി മാറ്റങ്ങള്‍ വരുത്താനോ റദ്ദാക്കാനോ കഴിയില്ല. കൂടാതെ കുറഞ്ഞ സ്‌കൈമൈല്‍സ് മാത്രമേ അക്കൗണ്ടില്‍ ക്രെഡിറ്റ് ആകൂ.

ഡെല്‍റ്റ പുറത്തുവിട്ട ഒരു ഉദാഹരണ കണക്ക് പ്രകാരം, ഒരു നിശ്ചിത റൂട്ടില്‍ ബേസിക് ബിസിനസ് ടിക്കറ്റിന് 2,689 ഡോളറാണ് വില. എന്നാല്‍ എല്ലാ ആനുകൂല്യങ്ങളുമുള്ള സാധാരണ ഡെല്‍റ്റ വണ്‍ ക്ലാസിക് ടിക്കറ്റിന് ഇതിനേക്കാള്‍ 200 ഡോളര്‍ (ഏകദേശം 7% കൂടുതല്‍) മാത്രമാണ് അധികം വരുന്നത്. പൂര്‍ണ്ണമായും പണം തിരികെ ലഭിക്കുന്ന പ്രീമിയം ടിക്കറ്റിന് 3,389 ഡോളറാണ് വില വരുന്നത്.

ഡെല്‍റ്റ ഫസ്റ്റ് ബേസിക് ടിക്കറ്റുകള്‍ നിലവില്‍ ചില ആഭ്യന്തര റൂട്ടുകളില്‍ ലഭ്യമായിത്തുടങ്ങിയിട്ടുണ്ട്. ബേസിക് പ്രീമിയം സെലക്ട്, ബേസിക് ബിസിനസ് ബുക്കിംഗുകള്‍ സെപ്റ്റംബര്‍ മുതലുള്ള സര്‍വീസുകള്‍ക്കായി ഇപ്പോള്‍ ലഭ്യമാണ്.

ഡെല്‍റ്റ ഈ മാറ്റത്തെ യാത്രക്കാരുടെ പോക്കറ്റിനനുസരിച്ചുള്ള തിരഞ്ഞെടുപ്പ് എന്ന് വിശേഷിപ്പിക്കുമ്പോള്‍, സാമൂഹിക മാധ്യമങ്ങളില്‍ കടുത്ത വിമര്‍ശനമാണ് ഉയരുന്നത്. മുന്‍പ് ടിക്കറ്റ് നിരക്കില്‍ ഉള്‍പ്പെട്ടിരുന്ന ആനുകൂല്യങ്ങള്‍ ഓരോന്നായി ഒഴിവാക്കി, പിന്നീട് അതിനായി പ്രത്യേക പണം ഈടാക്കുന്ന എയര്‍ലൈനുകളുടെ തന്ത്രമാണിതെന്നാണ് വിമര്‍ശകര്‍ പറയുന്നത്.

ഭാവിയില്‍ സാധാരണ ബിസിനസ് ക്ലാസ് ടിക്കറ്റുകളുടെ വില ക്രമാതീതമായി വര്‍ദ്ധിക്കാന്‍ ഇത് കാരണമാകുമെന്നും വ്യോമയാന വിദഗ്ദ്ധര്‍ ചൂണ്ടിക്കാണിക്കുന്നു. യുണൈറ്റഡ് എയര്‍ലൈന്‍സ്, ഖത്തര്‍ എയര്‍വേസ്, കെ.എല്‍.എം തുടങ്ങിയ കമ്പനികളും സമാനമായ ബിസിനസ്-ക്ലാസ്-ലൈറ്റ് നിരക്കുകള്‍ നേരത്തെ തന്നെ അവതരിപ്പിച്ചിട്ടുണ്ട്.