കുട്ടികളുടെ സ്വകാര്യതയെയും ചാറ്റുകളെയും ബാധിക്കാത്ത രീതിയിലാണ് ഈ പുതിയ നിയന്ത്രണ സംവിധാനങ്ങൾ രൂപകൽപ്പന ചെയ്തിരിക്കുന്നത്.

മക്കൾ ഏതൊക്കെ വാട്സാപ്പ് ഗ്രൂപ്പുകളിൽ അംഗമാകുന്നുവെന്നും എപ്പോഴൊക്കെ ഗ്രൂപ്പുകളിൽ നിന്ന് പുറത്തുപോകുന്നുവെന്നും അറിയാൻ മാതാപിതാക്കൾക്ക് ഇനി സാധിക്കും. ഒരു ഗ്രൂപ്പിലെ അംഗങ്ങളുടെ എണ്ണം വലിയ തോതിൽ വർദ്ധിക്കുമ്പോൾ മാതാപിതാക്കൾക്ക് അലേർട്ട് സന്ദേശങ്ങൾ ലഭിക്കുന്ന പ്രത്യേക ഫീച്ചറും ഇതിൽ ഉൾപ്പെടുത്തിയിട്ടുണ്ട്.

മക്കളുടെ പ്രൊഫൈൽ ചിത്രം ആർക്കൊക്കെ കാണാം, അവരെ ഏതൊക്കെ ഗ്രൂപ്പുകളിൽ ചേർക്കാം തുടങ്ങിയ കാര്യങ്ങളിൽ തീരുമാനം എടുക്കാൻ മാതാപിതാക്കൾക്ക് പൂർണ്ണ അധികാരമുണ്ടായിരിക്കും. കുട്ടികൾ ഈ സെറ്റിംഗ്സുകളിൽ മാറ്റം വരുത്താൻ ശ്രമിച്ചാൽ മാതാപിതാക്കൾ സജ്ജമാക്കിയ പ്രത്യേക പിൻ നമ്പർ ആവശ്യമായി വരും.

വാട്സാപ്പിലെ മെറ്റാ എഐ സംവിധാനത്തിന്റെ ഉപയോഗത്തിലും കടിഞ്ഞാൺ ഇടാൻ സാധിക്കും. സാധാരണ പതിമൂന്ന് വയസ്സിന് മുകളിലുള്ളവർക്കുള്ള സാധാരണ മോഡിന് പുറമെ, കടുത്ത നിയന്ത്രണങ്ങളുള്ള ലിമിറ്റഡ് കണ്ടെന്റ് ഓപ്ഷനും മാതാപിതാക്കൾക്ക് തിരഞ്ഞെടുക്കാവുന്നതാണ്.

സ്റ്റാറ്റസ് അപ്‌ഡേറ്റുകൾ ആർക്കൊക്കെ കാണാം, ഏതൊക്കെ ചാനലുകൾ ഫോളോ ചെയ്യാം എന്നതിലും നിയന്ത്രണങ്ങൾ കൊണ്ടുവരാൻ പുതിയ സംവിധാനം സഹായിക്കും. അപരിചിതരായ ആളുകളിൽ നിന്ന് വരുന്ന മെസ്സേജ് റിക്വസ്റ്റുകൾ പരിശോധിക്കാനും മാതാപിതാക്കൾക്ക് സാധിക്കും.

അതേസമയം കുട്ടികളുടെ വ്യക്തിഗത ചാറ്റുകളോ വോയിസ് കോളുകളോ വായിക്കാനോ കേൾക്കാനോ മാതാപിതാക്കൾക്ക് സാധിക്കില്ലെന്ന് വാട്സാപ്പ് വ്യക്തമാക്കിയിട്ടുണ്ട്. വാട്സാപ്പിന്റെ എൻഡ്-ടു-എൻഡ് എൻക്രിപ്ഷൻ സുരക്ഷാ മാനദണ്ഡങ്ങൾ മാറ്റമില്ലാതെ തുടരും.

മക്കളുടെ സ്വകാര്യത സംരക്ഷിക്കുന്നതോടൊപ്പം ഓൺലൈൻ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് കമ്പനി ഈ മാറ്റങ്ങൾ കൊണ്ടുവന്നിരിക്കുന്നത്. കൗമാരക്കാരായ കുട്ടികൾ ഡിജിറ്റൽ ലോകത്ത് സുരക്ഷിതരാണെന്ന് ഉറപ്പാക്കാൻ ഈ രീതി ഉപകരിക്കും.

രക്ഷിതാക്കൾക്ക് ഏത് സമയത്തും ഈ നിയന്ത്രണങ്ങളിൽ മാറ്റങ്ങൾ വരുത്താനോ അല്ലെങ്കിൽ പൂർണ്ണമായി ഒഴിവാക്കാനോ ഉള്ള സൗകര്യമുണ്ട്. വളരെ ലളിതമായ രീതിയിലാണ് ഇതിന്റെ പ്രവർത്തനം സജ്ജീകരിച്ചിരിക്കുന്നത്.