തിരുവനന്തപുരം :
സെക്രട്ടേറിയറ്റിന് മുന്നിലെ എൽ.പി.എസ്.ടി ഉദ്യോഗാർഥികളുടെ സമരപ്പന്തൽ പോലീസ് ബലം പ്രയോഗിച്ച് പൊളിച്ചുനീക്കിയതിന് പിന്നാലെ സമരത്തിൽ പുതിയ വഴിത്തിരിവ്. ആശുപത്രിയിൽ പ്രവേശിപ്പിച്ച നിരാഹാര സമരക്കാരി വളർമതി ചികിത്സയുമായി സഹകരിക്കുന്നില്ല. നിലവിൽ ഐസിയുവിലുള്ള വളർമതി വാർഡിലേക്ക് മാറ്റിയാൽ മാത്രമേ ചികിത്സയോട് സഹകരിക്കൂവെന്നാണ് നിലപാട്.

രാത്രിയോടെയാണ് പോലീസ് സമരപ്പന്തൽ പൊളിച്ചുനീക്കിയത്. തുടർന്ന് നിരാഹാര സമരം നടത്തിയിരുന്ന വളർമതിയെ അറസ്റ്റ് ചെയ്ത് ആശുപത്രിയിലേക്ക് മാറ്റുകയായിരുന്നു. എന്നാൽ പോലീസ് നടപടി സമരത്തെ അവസാനിപ്പിച്ചില്ല. പന്തൽ പൊളിച്ച് ഒരു മണിക്കൂർ തികയുംമുമ്പ് ഡി.വൈ.എഫ്.ഐയുടെ നേതൃത്വത്തിൽ പുതിയ സമരപ്പന്തൽ സ്ഥാപിച്ചു. എൽ.പി.എസ്.ടി ഉദ്യോഗാർഥിയായ ജയകൃഷ്ണൻ വീണ്ടും നിരാഹാര സമരം ആരംഭിക്കുകയും ചെയ്തു.

ബലപ്രയോഗത്തിലൂടെയാണ് സമരക്കാരെ ഒഴിപ്പിക്കാൻ പോലീസ് ശ്രമിച്ചതെന്ന് ഉദ്യോഗാർഥികൾ ആരോപിച്ചു. ആവശ്യങ്ങൾ അംഗീകരിപ്പിച്ച ശേഷമേ സമരത്തിൽനിന്ന് പിന്മാറൂവെന്നും അവർ വ്യക്തമാക്കി. സമരപ്പന്തൽ നീക്കുന്നതിന് പോലീസ് നേരത്തെ നോട്ടീസ് നൽകിയിരുന്നു. വളർമതിക്കെതിരെയും കേസെടുത്തിരുന്നു. പന്തൽ സ്വയം പൊളിച്ചുനീക്കില്ലെന്ന നിലപാടിലായിരുന്നു സമരക്കാർ. പന്തലില്ലെങ്കിലും സമരം തുടരുമെന്നും അവർ പ്രഖ്യാപിച്ചിരുന്നു.

മന്ത്രി ഒ.ജെ. ജനീഷിന്റെ ജാഥയ്ക്കുനേരെ സമരക്കാർ പ്ലക്കാർഡുകൾ ഉയർത്തി പ്രതിഷേധിച്ചതിന് പിന്നാലെയാണ് പോലീസ് നടപടിയുണ്ടായത്. ഹൈക്കോടതിയുടെ നിർദേശപ്രകാരമാണ് സ്ഥിരം സമരപ്പന്തൽ നീക്കിയതെന്നും താൽക്കാലിക പന്തൽ പൊളിച്ചിട്ടില്ലെന്നും പോലീസ് വിശദീകരിച്ചു.

അതേസമയം, പോലീസ് നടപടിക്കെതിരെ ഡി.വൈ.എഫ്.ഐ രംഗത്തെത്തി. നടപടിക്ക് പിന്നാലെ സ്ഥലത്തെത്തിയ പ്രവർത്തകർ മന്ത്രി ജനീഷിന്റെ ജാഥയുമായി ബന്ധപ്പെട്ട ഫ്ലക്സുകൾ തകർത്തു. സി.പി.എം നേതാക്കളായ സി.എസ്. സുജാത, പി.കെ. ബിജു എന്നിവരും സമരസ്ഥലത്തെത്തി. സംഭവത്തിൽ പ്രതികരണവുമായി പ്രതിപക്ഷ നേതാവ് പിണറായി വിജയനും രംഗത്തെത്തിയതോടെ വിഷയം രാഷ്ട്രീയമായും കൂടുതൽ ചർച്ചയാകുകയാണ്.

CENTRAL MEDIA NEWS DESK | 🌐 www.cmediaonline.in