പത്തനംതിട്ട : 65-ാമത് സംസ്ഥാന സ്കൂൾ കലോത്സവത്തിന് മുന്നോടിയായി ഈ അധ്യയന വർഷത്തെ കോഴഞ്ചേരി ഉപജില്ലാ സ്കൂൾ കലോത്സവത്തിന് നവംബർ 9ന് ഇലന്തൂരിൽ തുടക്കമാകും.
നവംബർ 9, 10, 11 തീയതികളിലായി ഇലന്തൂർ ഗവ. വൊക്കേഷണൽ ഹയർ സെക്കൻഡറി സ്കൂളിലാണ് കലോത്സവം നടക്കുന്നത്. അറുപതോളം വിദ്യാലയങ്ങളിൽ നിന്നായി എൽ.പി., യു.പി., ഹൈസ്കൂൾ, ഹയർ സെക്കൻഡറി വിഭാഗങ്ങളിലെ 2600 ഓളം കലാപ്രതിഭകൾ മാറ്റുരയ്ക്കും.
ഏഴ് വേദികളിലായാണ് മത്സരങ്ങൾ ക്രമീകരിച്ചിരിക്കുന്നത്. കുമാർജി, മൈത്രി, ചേകോട്ടാശാൻ, കാപ്പൊലി, സബർമതി, ഗാന്ധിമതി, പമ്പ എന്നീ പേരുകളിലുള്ള വേദികൾ ഇലന്തൂരിന്റെ സാംസ്കാരിക പൈതൃകവും സാമൂഹിക സവിശേഷതകളും ഓർമ്മപ്പെടുത്തുന്നതാണ്. വൈവിധ്യമാർന്ന കലാപരിപാടികളോടെ മൂന്ന് ദിവസം നീളുന്ന കലാമാമാങ്കത്തിന് വിപുലമായ ഒരുക്കങ്ങളാണ് സംഘാടക സമിതി പൂർത്തിയാക്കുന്നത്.
കലോത്സവത്തിന്റെ ഉദ്ഘാടനം ആറന്മുള എം.എൽ.എ. അബിൻ വർക്കി കോടിയാട്ട് നിർവഹിക്കും. സ്വാഗതസംഘം ചെയർമാനും ഗ്രാമപഞ്ചായത്ത് പ്രസിഡന്റുമായ കെ.പി. മുകുന്ദൻ അധ്യക്ഷത വഹിക്കും. ഇലന്തൂർ ബ്ലോക്ക് പഞ്ചായത്ത് പ്രസിഡന്റ് ഗീതാ സജീവ് മുഖ്യപ്രഭാഷണം നടത്തും. വിവിധ തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികൾ, ജില്ലാ-ഉപജില്ലാ വിദ്യാഭ്യാസ വകുപ്പ് ഉദ്യോഗസ്ഥർ, രാഷ്ട്രീയ-സാമൂഹിക-സാംസ്കാരിക രംഗത്തെ പ്രമുഖർ എന്നിവർ പങ്കെടുക്കും.
സമാപന സമ്മേളനം 11ന്
നവംബർ 11 ബുധനാഴ്ച വൈകിട്ട് നടക്കുന്ന സമാപന സമ്മേളനം അഡ്വ. പഴകുളം മധു എം.എൽ.എ. ഉദ്ഘാടനം ചെയ്യും. ജില്ലാ പഞ്ചായത്ത് അംഗം സ്റ്റെല്ല തോമസ് അധ്യക്ഷത വഹിക്കും. സിനിമാ സംവിധായകനും സ്കൂളിലെ പൂർവവിദ്യാർത്ഥിയുമായ അനു പുരുഷോത്ത് വിശിഷ്ടാതിഥിയാകും. പ്രോഗ്രാം കമ്മിറ്റി കൺവീനർ പി.കെ. ബിനു ഫലപ്രഖ്യാപനം നടത്തും. ജില്ലാ പഞ്ചായത്ത് അംഗം സവിത അജയകുമാർ സമ്മാനദാനം നിർവഹിക്കും. ജനപ്രതിനിധികളും വിദ്യാഭ്യാസ വകുപ്പ് ഉദ്യോഗസ്ഥരും വിവിധ കമ്മിറ്റി ഭാരവാഹികളും ചടങ്ങിൽ പങ്കെടുക്കും.
കലോത്സവ ലോഗോ ഒരുക്കിയത് ഒൻപതാം ക്ലാസ് വിദ്യാർത്ഥി
ഇലന്തൂരിന്റെ ചരിത്രവും പൈതൃകവും അടയാളപ്പെടുത്തുന്ന രീതിയിലാണ് കലോത്സവത്തിന്റെ ലോഗോ രൂപകൽപ്പന ചെയ്തിരിക്കുന്നത്. ഇലന്തൂർ ജി.വി.എച്ച്.എസ്.എസിലെ ഒൻപതാം ക്ലാസ് വിദ്യാർത്ഥി മാസ്റ്റർ ആദിത്യൻ അനിലാണ് ലോഗോ തയ്യാറാക്കിയത്. ദേശത്തിന്റെ പെരുമ വിളിച്ചോതുന്ന പടയണി കലാരൂപം, ചരിത്രത്തിൽ ഇടംപിടിച്ച ചർക്ക, പാരമ്പര്യത്തിന്റെയും കരവിരുതിന്റെയും പ്രതീകമായ ആറന്മുള കണ്ണാടി, ചുണ്ടൻവള്ളം എന്നിവയെല്ലാം ലോഗോയിൽ ഇടംപിടിച്ചിട്ടുണ്ട്. കലകളുടെ ഉത്സവത്തിന് ഇലന്തൂരിന്റെ തനിമയും പൈതൃകവും വിളിച്ചോതുന്ന ദൃശ്യാവിഷ്കാരമാണ് ലോഗോയുടെ പ്രമേയം.
പ്രസ് ക്ലബ്ബിൽ നടന്ന ചടങ്ങിൽ കോഴഞ്ചേരി ഉപജില്ലാ വിദ്യാഭ്യാസ ഓഫീസർ സന്ധ്യ എസ്. ലോഗോ പ്രകാശനം ചെയ്തു. പഞ്ചായത്ത് പ്രസിഡന്റും സ്വാഗതസംഘം ചെയർമാനുമായ കെ.പി. മുകുന്ദൻ, പബ്ലിസിറ്റി കമ്മിറ്റി ചെയർമാൻ കെ.ജി. റെജി, ജി.വി.എച്ച്.എസ്.എസ്. ഹെഡ്മിസ്ട്രസും സ്വാഗതസംഘം ജോയിന്റ് കൺവീനറുമായ രജില ആർ. രാജം, പബ്ലിസിറ്റി കൺവീനർ സിഞ്ജു എബ്രഹാം, സ്വീകരണ കമ്മിറ്റി കൺവീനർ പി.ആർ. ശ്രീകാന്ത് തുടങ്ങിയവർ പത്രസമ്മേളനത്തിൽ പങ്കെടുത്തു.
