തിരുവല്ല: തിരുവല്ല പബ്ലിക് സ്റ്റേഡിയത്തിന്റെ വികസനത്തിനായി ആദ്യഘട്ടമായി 5 കോടി രൂപ അനുവദിച്ചു. സ്റ്റേഡിയത്തിന്റെ വികസനം തിരുവല്ലയിലെ ജനങ്ങളുടെയും പ്രത്യേകിച്ച് കായികപ്രേമികളുടെയും ദീർഘകാല സ്വപ്നമാണെന്നും പദ്ധതി യാഥാർഥ്യമാക്കുന്നതിനുള്ള നടപടികൾ പുരോഗമിക്കുകയാണെന്നും അഡ്വ. വർഗീസ് മാമ്മൻ എം.എൽ.എ അറിയിച്ചു.

കഴിഞ്ഞ കേരള ബജറ്റിലാണ് സ്റ്റേഡിയത്തിന്റെ വികസനത്തിനായി 5 കോടി രൂപ അനുവദിച്ചത്. ഇതിനു പുറമെ മറ്റ് ഫണ്ടുകൾ കൂടി പ്രയോജനപ്പെടുത്തി നിർമ്മാണ പ്രവർത്തനങ്ങൾ ആരംഭിക്കാനാണ് ലക്ഷ്യമിടുന്നത്.

പദ്ധതിയുമായി ബന്ധപ്പെട്ട് കേരള കായിക വകുപ്പ് മന്ത്രി ഒ. ജെ. ജനീഷ് നവംബർ 4-ാം തീയതി ബുധനാഴ്ച ഉച്ചയ്ക്ക് 2 മണിക്ക് തിരുവല്ല പബ്ലിക് സ്റ്റേഡിയം സന്ദർശിക്കും. തിരുവല്ലയിലെ ജനപ്രതിനിധികളും വിവിധ കായിക സംഘടനകളുടെ ഭാരവാഹികളും ചേർന്ന് മന്ത്രിയെ സ്വീകരിക്കും.

സ്റ്റേഡിയത്തിന്റെ വികസനം യാഥാർഥ്യമാകുന്നതോടെ തിരുവല്ലയുടെ കായിക മേഖലയ്ക്ക് വലിയ മുന്നേറ്റമുണ്ടാകുമെന്നാണ് പ്രതീക്ഷയെന്നും എം.എൽ.എ അറിയിച്ചു.