പത്തനംതിട്ട :
വീടുകൾ തോറും കയറിയിറങ്ങി ആയുർവേദ ഉൽപ്പന്നങ്ങൾ വിൽക്കുന്ന രണ്ട് യുവതികളെ പത്തനംതിട്ട KSRTC ബസ്റ്റാൻഡിന് സമീപത്തു നിന്നും നിർബന്ധിച്ച് പെട്ടി ഓട്ടോറിക്ഷയിൽ കയറ്റിക്കൊണ്ടു പോവുകയും പല സ്ഥലങ്ങളിലും കറങ്ങി നടന്ന് യുവതികളെ പീഢിപ്പിക്കാൻ ശ്രമിക്കുകയും ചെയ്ത കേസിലെ പ്രതിയെ പത്തനംതിട്ട പോലീസ് അറസ്റ്റ് ചെയ്തു.

പുറമറ്റം വില്ലേജിൽ വെണ്ണിക്കുളം എന്ന സ്ഥലത്ത് ചെറുവള്ളിപ്പാറ വീട്ടിൽ പ്രവീൺ ദാമോദരൻ (30) ആണ് പിടിയിലായത്. അടൂരിലെ സ്വകാര്യ സ്ഥാപനത്തിൽ നിന്നും ആയുർവേദ ഉത്പന്നങ്ങൾ വീടുകൾതോറും കയറിയിറങ്ങി വിൽപ്പന നടത്തുന്ന 18 വയസ്സുള്ള വയനാട് സ്വദേശിനിയും 20 വയസ്സുള്ള റാന്നി സ്വദേശിനിയും ആയ രണ്ട് യുവതികളെയാണ് ഇയാൾ നിർബന്ധിച്ച് വാഹനത്തിൽ കയറ്റി കൊണ്ടുപോയതും പലയിടങ്ങളിലായി കറങ്ങി നടന്ന് പീഡിപ്പിക്കാൻ ശ്രമിച്ചതും.

വാഹനം ഓടിക്കുമ്പോൾ ഇടയ്ക്കിടെ ഇയാൾ ഒരു കത്തിയെടുത്ത് പെൺകുട്ടികളെ കാണിക്കുകയും ചെയ്തിരുന്നു. ഇക്കഴിഞ്ഞ ചൊവ്വാഴ്ച ഉച്ചയ്ക്ക് 12 മണിയോടെയാണ് ഇയാൾ യുവതികളെ നിർബന്ധിച്ച് വാഹനത്തിൽ കയറ്റിക്കൊണ്ട് പോയത്. വൈകുന്നേരം 4.45 മണിയോടെ തടിയൂർ എന്ന സ്ഥലത്ത് ഇറക്കിവിട്ടു. രാത്രിയോടെ പത്തനംതിട്ട വനിതാ പോലീസ് സ്റ്റേഷനിൽ എത്തി വിവരം പറഞ്ഞ യുവതികളിൽ ഒരാളുടെ മൊഴി സ്റ്റേഷൻ ഹൗസ് ഓഫീസർ ഷെമിമോൾ രേഖപ്പെടുത്തുകയും പത്തനംതിട്ട പോലീസ് സ്റ്റേഷനിൽ കേസ് രജിസ്റ്റർ ചെയ്യുകയും ആയിരുന്നു.

ഉടൻ തന്നെ അന്വേഷണം ആരംഭിച്ച പത്തനംതിട്ട സ്റ്റേഷനിലെ പോലീസ് സംഘം വളരെ വേഗം പ്രതിയെ കസ്റ്റഡിയിൽ എടുക്കുകയും ബുധനാഴ്ച രാത്രിയോടെ ഇയാളുടെ അറസ്റ്റ് രേഖപ്പെടുത്തുകയും ചെയ്തു.

പ്രതി മുൻപും സമാന രീതിയിലുള്ള കുറ്റകൃത്യം ചെയ്തിട്ടുള്ള ആളാണെന്ന് പത്തനംതിട്ട എസ്.എച്ച്.ഒ അരുൺ G പറഞ്ഞു ഇക്കഴിഞ്ഞ ഏപ്രിൽ മാസം പത്താം തീയതി അടൂർ ബസ്റ്റാൻഡിൽ വച്ച് പരിചയപ്പെട്ട വീടുകൾതോറും സാധനങ്ങൾ വിൽക്കുന്ന വടശ്ശേരിക്കര സ്വദേശിനിയായ 27കാരിയെയും ഇയാൾ ഇതേ രീതിയിൽ ഒരു ബൈക്കിൽ കയറ്റിക്കൊണ്ട് പോവുകയും പന്തളം കുളനട മാന്തുകയ്ക്ക് സമീപം വച്ച് പീഡിപ്പിക്കാൻ ശ്രമിക്കുകയും ഒരു പവനിൽ അധികം വരുന്ന സ്വർണമാല അപഹരിക്കുകയും ചെയ്തിരുന്നു. പ്രതി പ്രവീൺ ഈ കേസിൽ പന്തളം പോലീസിന്റെ പിടിയിൽ ആവുകയും റിമാൻഡിൽ കഴിയുകയും ചെയ്തിരുന്നു.

പത്തനംതിട്ട സർക്കിൾ ഇൻസ്പെക്ടർ അരുൺ G , SI അനീഷ് എബ്രഹാം (SHO), SI ബിനോജ് , SI ഹരി കൃഷ്ണൻ
CPO മാരായ മിഥുൻ,അജയ് മോഹൻ എന്നിവർ അടങ്ങിയ പത്തനംതിട്ട സ്റ്റേഷനിലെ പോലീസ് സംഘമാണ് പ്രതിയെ അറസ്റ്റ് ചെയ്തത്.

പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.