പത്തനംതിട്ട: ഓമല്ലൂർ സർവീസ് സഹകരണ ബാങ്കിലെ വായ്പാ കുടിശികയും സാമ്പത്തിക പ്രതിസന്ധിയും സിപിഎമ്മിന് പുതിയ തലവേദനയാകുന്നു.
ബാങ്കിൽനിന്ന് വായ്പയെടുത്ത് തിരിച്ചടയ്ക്കാതെ കുടിശിക വരുത്തിയ പാർട്ടി അംഗങ്ങളെ മെമ്പർഷിപ്പിൽനിന്ന് പുറത്താക്കാൻ സിപിഎം നീക്കം. ഇതുസംബന്ധിച്ച് ഓമല്ലൂർ ലോക്കൽ കമ്മിറ്റിക്ക് മേൽഘടകത്തിൽനിന്ന് നിർദേശം ലഭിച്ചതായാണ് വിവരം.
ബാങ്കിലെ സാമ്പത്തിക പ്രതിസന്ധി തദ്ദേശ സ്വയംഭരണ സ്ഥാപനങ്ങളിലേക്കും നിയമസഭയിലേക്കുമുള്ള തെരഞ്ഞെടുപ്പുകളിൽ പാർട്ടിക്ക് തിരിച്ചടിയായെന്ന വിലയിരുത്തലിന്റെ അടിസ്ഥാനത്തിലാണ് നടപടിയെന്നാണ് സൂചന. എന്നാൽ നിർദേശം പൂർണമായി നടപ്പാക്കിയാൽ ലോക്കൽ കമ്മിറ്റി അംഗങ്ങൾ മുതൽ പ്രധാന ചുമതലക്കാർ വരെ പാർട്ടി അംഗത്വവും സ്ഥാനങ്ങളും നഷ്ടപ്പെടുന്ന സാഹചര്യമുണ്ടാകുമെന്നാണ് റിപ്പോർട്ടുകൾ.
സിപിഎം ജില്ലാ സെക്രട്ടേറിയറ്റ് അംഗവും മുൻ ജില്ലാ പഞ്ചായത്ത് പ്രസിഡന്റുമായ അഡ്വ. ഓമല്ലൂർ ശങ്കരൻ പ്രസിഡന്റായിരുന്ന ബാങ്ക് ഇപ്പോഴും ഇടതുപക്ഷ ഭരണസമിതിയുടെ നിയന്ത്രണത്തിലാണ്. നിക്ഷേപകർക്ക് പണം തിരികെ നൽകാനാകാതെയും വായ്പകൾ തിരിച്ചുപിടിക്കാനാകാതെയും ബാങ്ക് വർഷങ്ങളായി പ്രതിസന്ധിയിലാണ്.
ബാങ്കിൽനിന്ന് ഒന്നേകാൽ കോടിയിലധികം രൂപയുടെ സാമ്പത്തിക തട്ടിപ്പ് നടത്തിയതായി ആരോപിക്കപ്പെടുന്ന ഉദ്യോഗസ്ഥരുടെ സ്വത്തുക്കൾ ജപ്തി ചെയ്ത് പണം തിരിച്ചുപിടിക്കാനുള്ള സർക്കാർ നടപടിക്കെതിരെ ഉദ്യോഗസ്ഥർ ഹൈക്കോടതിയെ സമീപിച്ചിരുന്നു. ഈ ഹർജിയിൽ നിക്ഷേപകർക്കും കക്ഷി ചേരാൻ കോടതി അനുമതി നൽകി.
ഓമല്ലൂരിൽ വ്യാപാരസ്ഥാപനം നടത്തുന്ന ഊന്നുകൽ സ്വദേശി സജീവ് ആണ് ഇക്കാര്യം വ്യക്തമാക്കിയത്. ബാങ്കിൽ നിക്ഷേപിച്ച 50 ലക്ഷത്തിലധികം രൂപ തിരിച്ചുകിട്ടാത്തതോടെ കുടുംബത്തിന്റെ സാമ്പത്തിക ഭാവി തന്നെ പ്രതിസന്ധിയിലായെന്ന് അദ്ദേഹം പറഞ്ഞു. മകളുടെ എംബിബിഎസ് പഠനം എന്ന സ്വപ്നം പോലും ഉപേക്ഷിക്കേണ്ടിവന്ന സാഹചര്യമുണ്ടായതായും സജീവ് വെളിപ്പെടുത്തി.
ഉദ്യോഗസ്ഥർ നടത്തിയതായി ആരോപിക്കപ്പെടുന്ന സാമ്പത്തിക ക്രമക്കേടുകൾ കോടതിയെ ബോധ്യപ്പെടുത്താനും കുറ്റക്കാരിൽനിന്ന് പണം തിരിച്ചുപിടിക്കുന്നത് ഉറപ്പാക്കാനുമാണ് സജീവ് ഉൾപ്പെടെയുള്ള നിക്ഷേപകർ കേസിൽ കക്ഷി ചേർന്നത്.
സഹകരണ ബാങ്കുകളിലെ സാമ്പത്തിക ക്രമക്കേടുകളും രാഷ്ട്രീയ ഇടപെടലുകളും മേഖലയുടെ വിശ്വാസ്യതയെ തന്നെ ബാധിക്കുന്നുവെന്ന വിമർശനവും ശക്തമാണ്. ഓമല്ലൂരിൽ പാർട്ടി അംഗങ്ങൾക്കെതിരായ നടപടി വിജയകരമായാൽ സമാനമായ പ്രതിസന്ധി നേരിടുന്ന മറ്റ് സഹകരണ ബാങ്കുകളിലേക്കും നീക്കം വ്യാപിപ്പിക്കാൻ ജില്ലാ നേതൃത്വം ആലോചിക്കുന്നതായാണ് വിവരം.
CENTRAL MEDIA NEWS DESK | 🌐 www.cmediaonline.in
പത്തനംതിട്ട ഓമല്ലൂർ സഹകരണ ബാങ്ക് തട്ടിപ്പ് : കുടിശിക വരുത്തിയ സിപിഎം അംഗങ്ങളെ പുറത്താക്കാൻ നീക്കം ; നടപടി നേതാക്കളിലേക്കും നീളുമോ?
Advertisement
Advertisement
Advertisement