തിരുവല്ല : എൻസിഎസിലെ തങ്ങളുടെ നിക്ഷേപം കഴിഞ്ഞ മൂന്നു വർഷമായി തിരിച്ചു നൽകാത്തതുൾപ്പെടെയുള്ള വൻ സമ്പത്തിക തട്ടിപ്പിനെതിരെയാണ് എൻ സി എ സിന് മുഖ്യ പങ്കാളിത്തമുള്ള പത്തനംതിട്ട തിരുവല്ല ഇരവിപേരൂരിൽ പ്രവർത്തിക്കുന്ന ഓ ഇ എം സ്‌കൂളിലേക്ക് പ്രതിഷേധ മാർച്ചും ധർണ്ണയും നടത്തിയത്. അന്തരിച്ച എൻ സി എസ് ഇരവിപേരൂർ ശാഖാ മാനേജർ ജോൺ തോമസിന് അനുശോചനമർപ്പിച്ച ശേഷമാണ് കാൽനട ജാഥയായി പ്രകടനം ആരംഭിച്ചത്.

തുടർന്ന് നടന്ന ധർണ്ണ കോയിപ്രം ബ്ളോക്ക് പഞ്ചായത്ത് പ്രസിഡൻ്റ് ടി . കെ . രാമചന്ദ്രൻ നായർ ഉദ്ഘാടനം ചെയ്തു. പ്രസന്നകുമാരൻ നായർ അധ്യക്ഷത വഹിച്ചു. ടി.ടി. തോമസ്, മാത്തുക്കുട്ടി കലയത്തിനാൽ, നിക്ഷേപക പ്രതിനിധികൾ തുടങ്ങിയവർ പ്രസംഗിച്ചു.

പ്രശ്‌ന പരിഹാരത്തിന് മാനേജ്മെൻ്റ് മുന്നോട്ട് വന്നില്ലെങ്കിൽ സമര പരിപാടികൾ ശക്തമാക്കുമെന്ന് സമര സമിതി ഭാരവാഹികൾ അറിയിച്ചു.