യുവതിക്ക് ഇഷ്ടമുള്ള ജോലി തിരഞ്ഞെടുക്കാനും പ്രണയിതാവുമായി ബന്ധം തുടരാനും മാതാപിതാക്കൾ തടസ്സമുണ്ടാക്കരുതെന്നും കോടതി നിർദ്ദേശിച്ചു. ചീഫ് ജസ്റ്റിസ് സൗമെൻ സെൻ, ജസ്റ്റിസ് ശ്യാം കുമാർ വി എം എന്നിവരടങ്ങിയ ഡിവിഷൻ ബെഞ്ചാണ് ഒക്ടോബർ 13-ന് ഈ ഉത്തരവ് പുറപ്പെടുവിച്ചത്.

യുവതിയെ മാതാപിതാക്കൾ തടഞ്ഞുവെച്ചിരിക്കുകയാണെന്ന് കാണിച്ച് പ്രണയിതാവ് സമർപ്പിച്ച ഹേബിയസ് കോർപ്പസ് ഹർജി പരിഗണിക്കവെയാണ് കോടതിയുടെ ഇടപെടൽ. യുവതിയും പ്രണയിതാവും മാതാപിതാക്കളുമായി കോടതി വെവ്വേറെ സംസാരിച്ചു. കഴിഞ്ഞ രണ്ട് വർഷമായി തങ്ങൾ പ്രണയത്തിലാണെന്നും വിവാഹം കഴിക്കാൻ താൽപ്പര്യമുണ്ടെന്നും യുവതി കോടതിയെ അറിയിച്ചു.

എന്നാൽ, ഈ അന്തർമത വിവാഹത്തെ എതിർക്കുന്ന മാതാപിതാക്കൾക്ക് ഇവരുടെ ബന്ധം അംഗീകരിക്കാൻ താൽപ്പര്യമില്ലെന്ന് കോടതിക്ക് മനസ്സിലായി. യുവതി മാതാപിതാക്കളുടെ കടുത്ത മാനസിക സമ്മർദ്ദത്തിലാണെന്നും പ്രണയിതാവുമായി സംസാരിക്കാനുള്ള അവരുടെ തീരുമാനം സ്വമേധയാ ഉള്ളതല്ലെന്നും കോടതി നിരീക്ഷിച്ചു. മികച്ച യോഗ്യതകളുള്ള ഇരുവരും അടുത്തിടെ വരെ പ്രമുഖ സ്ഥാപനങ്ങളിൽ ജോലി ചെയ്തിരുന്നവരാണ് . നിലവിൽ രണ്ടുപേരും തൊഴിൽ രഹിതരാണ്.

പേരെടുത്ത ഒരു ടെക് കമ്പനിയിൽ യുവതിക്ക് ജോലി ലഭിച്ചിരുന്നെങ്കിലും കുടുംബത്തിന്റെ എതിർപ്പ് കാരണം ചേരാൻ കഴിഞ്ഞിട്ടില്ലെന്നും കോടതി കണ്ടെത്തി. യുവതിയെ അംഗീകരിക്കാൻ താൽപ്പര്യമുണ്ടെന്ന് പ്രണയിതാവിന്റെ കുടുംബം അറിയിച്ചപ്പോൾ, യുവതിയെ വിവാഹം കഴിക്കുന്നതിന് മുൻപ് ഒരു ജോലി നേടുമെന്ന് അദ്ദേഹം കോടതിയെ അറിയിച്ചു. പ്രായപൂർത്തിയായ യുവതിക്ക് ഇഷ്ടമുള്ള വ്യക്തിയുമായി ബന്ധം തുടരാൻ സ്വാതന്ത്ര്യമുണ്ടെന്നും അന്തിമ തീരുമാനമെടുക്കുന്നത് വരെ സ്വതന്ത്രമായി ഇടപെഴകാൻ അവരെ അനുവദിക്കണമെന്നും കോടതി വ്യക്തമാക്കി.

ആവശ്യമെങ്കിൽ ദമ്പതികൾക്ക് പോലീസ് സംരക്ഷണം നൽകാനും കോടതി ഉത്തരവിട്ടു. അക്രമമോ ദുരുപയോഗമോ ഉണ്ടാകാൻ സാധ്യതയുണ്ടെന്ന് സ്റ്റേഷൻ ഹൗസ് ഓഫീസർക്ക് (SHO) പരാതി ലഭിച്ചാൽ ആവശ്യമായ പോലീസ് സംരക്ഷണം നൽകണമെന്നും നിർദ്ദേശിച്ചു. മകൾക്ക് ഇഷ്ടമുള്ള തൊഴിൽ നേടുന്നതിനോ പ്രണയിതാവുമായി ബന്ധം തുടരുന്നതിനോ മാതാപിതാക്കൾ തടസ്സമുണ്ടാക്കരുതെന്നും കോടതി ആവശ്യപ്പെട്ടു.

ഇരുവരും പ്രായപൂർത്തിയായവരും സ്വന്തം ഭാവി തീരുമാനിക്കാൻ സ്വാതന്ത്ര്യമുള്ളവരുമാണെന്ന് ചൂണ്ടിക്കാട്ടി, ബന്ധത്തിന് തടസ്സമുണ്ടാക്കരുതെന്നും ഇരു കുടുംബങ്ങളെയും കോടതി ഓർമ്മിപ്പിച്ചു. മാതാപിതാക്കൾ തടഞ്ഞുവെച്ചിരുന്ന യുവതിയുടെ മൊബൈൽ ഫോൺ കേസ് പരിഗണിച്ച ദിവസം കോടതിയിൽ വെച്ച് തിരികെ നൽകി. യുവതിക്ക് പ്രണയിതാവുമായി സ്വതന്ത്രമായി ആശയവിനിമയം നടത്താൻ എല്ലാ മാർഗ്ഗങ്ങളും തുറന്നിടണമെന്നും ഫോൺ വീണ്ടും തടഞ്ഞുവെക്കരുതെന്നും ബെഞ്ച് കർശനമായി നിർദ്ദേശിച്ചു.