വൻകിട മെട്രോ നഗരങ്ങളിൽ മാത്രം ഒതുങ്ങിനിൽക്കാതെ രാജ്യത്തെ ടയർ-2, ടയർ-3 ചെറുനഗരങ്ങളിലേക്ക് കൂടി ബിസിനസ്സ് വ്യാപിപ്പിച്ച് വൻ വിൽപ്പന ലക്ഷ്യമിടുകയാണ് കമ്പനി. 2030-ഓടെ ഇന്ത്യയിൽ പ്രതിവർഷം 30,000 ബിഎംഡബ്ല്യു, മിനി കാറുകൾ വിറ്റഴിക്കാനാണ് കമ്പനി ലക്ഷ്യമിടുന്നത്.

2025-ൽ ഇന്ത്യയിൽ 18,001 കാറുകൾ വിറ്റഴിച്ച ബിഎംഡബ്ല്യു, ഈ വർഷം (2026) വിൽപ്പന 20,000 യൂണിറ്റ് കടത്തുമെന്ന ഉറച്ച പ്രതീക്ഷയിലാണ്. വലിയ നഗരങ്ങളിൽ വിൽപ്പന വളർച്ച 14-15 ശതമാനത്തിൽ നിൽക്കുമ്പോൾ ചെറുനഗരങ്ങളിൽ 20 ശതമാനത്തിലധികം വളർച്ചയാണ് കമ്പനി കാണുന്നത്. നിലവിൽ 40 നഗരങ്ങളിൽ സാന്നിധ്യമുള്ള ബിഎംഡബ്ല്യു, ഈ വർഷാവസാനത്തോടെ ഇത് 50 നഗരങ്ങളാക്കി ഉയർത്തും. പോണ്ടിച്ചേരി, മൈസൂരു, ഹുബ്ബള്ളി, നാസിക്, ജലന്ധർ, ജോധ്പൂർ, ഗുവാഹത്തി തുടങ്ങിയ നഗരങ്ങളിലേക്കാണ് നെറ്റ്‌വർക്ക് വ്യാപിപ്പിക്കുന്നത്.

ഇതിനൊപ്പം ഇലക്ട്രിക് വാഹന വിപണിയിലും ശക്തമായ സാന്നിധ്യമറിയിക്കാനാണ് ബിഎംഡബ്ല്യു ലക്ഷ്യമിടുന്നത്. 2030 എത്തുമ്പോഴേക്കും കമ്പനിയുടെ മൊത്തം വിൽപ്പനയുടെ 40 ശതമാനവും ഇലക്ട്രിക് വാഹനങ്ങളായിരിക്കും. 2026-ന്റെ ആദ്യ പകുതിയിൽ മാത്രം ഇലക്ട്രിക് വാഹന വിൽപ്പനയിൽ 78 ശതമാനം വർദ്ധനവാണ് രേഖപ്പെടുത്തിയത്. ഈ വർഷം അവസാനത്തോടെ ആകെ വിൽപ്പനയുടെ 30 ശതമാനവും ഇലക്ട്രിക് മോഡലുകളായി മാറുമെന്നാണ് വിലയിരുത്തൽ.

പിൻസീറ്റിലെ യാത്രക്കാർക്ക് കൂടുതൽ ലെഗ്‌റൂം നൽകുന്ന 'ലോംഗ് വീൽബേസ്' (LWB) മോഡലുകൾക്ക് ഇന്ത്യൻ ഉപഭോക്താക്കൾക്കിടയിലുള്ള ജനപ്രീതിയും ബിഎംഡബ്ല്യു മുതലെടുക്കുന്നുണ്ട്. കഴിഞ്ഞ വർഷങ്ങളിൽ നിർണ്ണായക വളർച്ച കൈവരിച്ച ഈ മോഡലുകൾ ഈ വർഷാവസാനത്തോടെ കമ്പനിയുടെ വിൽപ്പനയുടെ 60 ശതമാനത്തിലധികം കൈയടക്കുമെന്നാണ് കരുതുന്നത്.

അതേസമയം, രൂപയുടെ വിനിമയ നിരക്കിലെ വ്യതിയാനങ്ങളും അസംസ്‌കൃത വസ്തുക്കളുടെ വിലക്കയറ്റവും ഗതാഗതച്ചെലവും കമ്പനിക്ക് വലിയ വെല്ലുവിളി സൃഷ്ടിക്കുന്നുണ്ട്. 2026 ജനുവരി, ഏപ്രിൽ, ജൂലൈ മാസങ്ങളിൽ ഘട്ടങ്ങളായി വില വർദ്ധിപ്പിച്ചിട്ടുണ്ടെങ്കിലും, പുതിയ നഗരങ്ങളിലേക്കുള്ള വ്യാപനവും ഇലക്ട്രിക്-ലോംഗ് വീൽബേസ് കാറുകളുടെ മുൻഗണനയും വഴി ഇന്ത്യയിൽ റെക്കോർഡ് നേട്ടം കൈവരിക്കാൻ സാധിക്കുമെന്ന ആത്മവിശ്വാസത്തിലാണ് ബിഎംഡബ്ല്യു.