കൊല്ലം : കള്ളനോട്ട് കേസിൽ അന്വേഷണം പുതിയ വഴിത്തിരിവിലേക്ക്. കേസിലെ പ്രധാന പ്രതിയായ സിബിയോണിന്റെ ഭാര്യ ബിൻസിയെയും പ്രതിപ്പട്ടികയിൽ ഉൾപ്പെടുത്തി ജില്ലാ ക്രൈംബ്രാഞ്ച് കോടതിയിൽ റിപ്പോർട്ട് സമർപ്പിച്ചു. കള്ളനോട്ട് നിർമ്മാണവുമായി ബന്ധപ്പെട്ട് ബിൻസിക്കും വ്യക്തമായ പങ്കുണ്ടെന്ന അന്വേഷണ സംഘത്തിന്റെ കണ്ടെത്തലാണ് നടപടി നിർണായകമാക്കുന്നത്.

സിബിയോണിന്റെ വീട്ടിൽ നടത്തിയ പരിശോധനയിൽ കള്ളനോട്ടുകളും അവ അച്ചടിക്കാൻ ഉപയോഗിച്ചിരുന്ന പ്രിന്റിങ് മെഷീനുകളും കണ്ടെത്തിയിരുന്നു. ഈ സംഭവവുമായി ബന്ധപ്പെട്ട് നടത്തിയ വിശദമായ അന്വേഷണത്തിലാണ് ബിൻസിയുടെ പങ്കും പുറത്തുവന്നതെന്നാണ് ക്രൈംബ്രാഞ്ചിന്റെ നിലപാട്.

വീട്ടിൽ കള്ളനോട്ടുകൾ സൂക്ഷിച്ചതിലും നോട്ട് നിർമ്മാണത്തിനായി ഉപയോഗിച്ചിരുന്ന ഉപകരണങ്ങളുമായി ബന്ധപ്പെട്ട പ്രവർത്തനങ്ങളിലും ബിൻസിക്ക് പങ്കുണ്ടെന്നാണ് അന്വേഷണ സംഘം കണ്ടെത്തിയിരിക്കുന്നത്. ഇതിന്റെ അടിസ്ഥാനത്തിലാണ് ബിൻസിയെയും കേസിൽ പ്രതിചേർത്ത് കോടതിയിൽ റിപ്പോർട്ട് നൽകിയത്.

കള്ളനോട്ട് നിർമ്മാണത്തിന് പിന്നിലെ കൂടുതൽ ബന്ധങ്ങളും ഇടപെടലുകളും കണ്ടെത്തുന്നതിനുള്ള അന്വേഷണം തുടരുകയാണ്. കേസിൽ പുതിയ പ്രതിയെക്കൂടി ഉൾപ്പെടുത്തിയതോടെ അന്വേഷണത്തിന്റെ അടുത്ത ഘട്ടം കൂടുതൽ നിർണായകമാകുമെന്നാണ് വിലയിരുത്തൽ.

ബിന്‍സിയുടെ കാനറാ ബാങ്ക് അക്കൗണ്ടിലേക്ക് എത്തിയ ഒരു കോടി രൂപയുടെ സ്രോതസ്സിനെക്കുറിച്ചാണ് അന്വേഷണ സംഘം പ്രധാനമായും ചോദിച്ചറിഞ്ഞത്. എന്നാല്‍ തങ്ങള്‍ ചിട്ടി നടത്തിയ പണമാണ് അതെന്ന വിചിത്രമായ വാദമാണ് ബിന്‍സി അന്വേഷണ ഉദ്യോഗസ്ഥര്‍ക്ക് മുന്നില്‍ ഉന്നയിച്ചത്. ഈ മറുപടിയില്‍ തൃപ്തരാകാത്ത പോലീസ് പണത്തിന്റെ യഥാര്‍ത്ഥ ഉറവിടം കണ്ടെത്താനുള്ള തീവ്ര ശ്രമത്തിലാണ്.

ചിട്ടി നടത്തിയ പണമാണെന്ന് പറഞ്ഞ് ഒഴിഞ്ഞുമാറാന്‍ ശ്രമിച്ചെങ്കിലും പോലീസിന്റെ തുടര്‍ച്ചയായ ചോദ്യങ്ങള്‍ക്ക് മുന്നില്‍ ബിന്‍സി ഉത്തരംമുട്ടി. ഇത്രയും വലിയ തുക അക്കൗണ്ടില്‍ എത്തിയത് എങ്ങനെയെന്നതിന് കൃത്യമായ രേഖകളോ തെളിവുകളോ ഹാജരാക്കാന്‍ ബിന്‍സിക്ക് ഇതുവരെ കഴിഞ്ഞിട്ടില്ല. കള്ളനോട്ടടി കേസിലെ പണം തന്നെയാണ് ഇതെന്നാണ് അന്വേഷണ സംഘം ശക്തമായി സംശയിക്കുന്നത്. ഇതുമായി ബന്ധപ്പെട്ട് കൂടുതല്‍ ചോദ്യങ്ങള്‍ക്ക് ഉത്തരമില്ലാതെ ബിന്‍സി ബുദ്ധിമുട്ടുകയാണ്.

കേസിന്റെ തുടക്കം മുതല്‍ തന്നെ ബിന്‍സിയുടെ പങ്ക് അന്വേഷണ സംഘം ശക്തമായി സംശയിച്ചിരുന്നു. ഇതിന്റെ അടിസ്ഥാനത്തിലാണ് അവരെക്കൂടി പ്രതിയാക്കിക്കൊണ്ട് ക്രൈംബ്രാഞ്ച് കോടതിയില്‍ പുതിയ റിപ്പോര്‍ട്ട് സമര്‍പ്പിച്ചത്. അറസ്റ്റ് ഭയന്ന് ബിന്‍സി ഇതിനോടകം മുന്‍കൂര്‍ ജാമ്യാപേക്ഷ സമര്‍പ്പിച്ചിരുന്നുവെങ്കിലും കോടതി അത് പരിഗണിച്ചിരുന്നില്ല. നിയമപരമായ നടപടികളുമായി മുന്നോട്ട് പോകാനാണ് അന്വേഷണ സംഘത്തിന്റെ തീരുമാനം.

കഴിഞ്ഞ മാസം ഒക്ടോബര്‍ 23-നാണ് കേസിന് ആസ്പദമായ സംഭവം നടക്കുന്നത്. സിബിയോണിന്റെ വാടിയിലെ വീട്ടില്‍ നിന്ന് കള്ളനോട്ട് അച്ചടിക്കുന്ന ആധുനിക പ്രിന്ററുകളും ഉപകരണങ്ങളും പോലീസ് പിടിച്ചെടുത്തിരുന്നു. കൂടാതെ അഞ്ച് നൂറു രൂപയുടെ നോട്ടുകള്‍ അച്ചടിക്കാനായി കൃത്യമായി മുറിച്ചുവെച്ച പേപ്പര്‍ കെട്ടുകളും സംഭവസ്ഥലത്തുനിന്ന് കണ്ടെത്തിയിരുന്നു. വന്‍തോതില്‍ കള്ളനോട്ട് നിര്‍മ്മിച്ച് വിപണിയില്‍ ഇറക്കാന്‍ പ്രതികള്‍ പദ്ധതിയിട്ടിരുന്നു എന്നാണ് ഇത് വ്യക്തമാക്കുന്നത്.

ഈ റെയ്ഡില്‍ കള്ളനോട്ടുകള്‍ക്ക് പുറമേ വലിയ തോതിലുള്ള സ്വത്തുക്കളും അന്വേഷണ സംഘം കണ്ടെടുത്തിരുന്നു. നാല്‍പത്തിയഞ്ച് പവനോളം വരുന്ന സ്വര്‍ണാഭരണങ്ങളും നാല് ലക്ഷത്തിലധികം രൂപയും വിലകൂടിയ ആഡംബര വാച്ചുകളും വീട്ടില്‍ നിന്ന് പിടിച്ചെടുത്തിരുന്നു. തുടര്‍ന്ന് നടത്തിയ വിശദമായ അന്വേഷണത്തിലാണ് പ്രതിയുടെ മറ്റ് രഹസ്യങ്ങളും പുറത്തുവന്നത്.