മരിച്ചുപോയ വ്യക്തിയുടെ സാന്നിധ്യം നേരിട്ട് കണ്ടിട്ടുണ്ടെന്ന വെളിപ്പെടുത്തലുമായി മലയാള സിനിമാതാരം ലെന.

സുഹൃത്തിന്റെ വീട്ടിൽ താമസിക്കുന്നതിനിടെ മാസങ്ങൾക്കുമുമ്പ് മരിച്ചുപോയ ഒരാളെ മുറിയിലൂടെ നടന്നുപോകുന്നതായി കണ്ട അനുഭവമാണ് താരം പങ്കുവെച്ചത്. ജീൻസും ജുബ്ബയും ധരിച്ച് വലിയൊരു സഞ്ചിയുമായി നടന്നുപോകുന്ന ഉയരമുള്ള വ്യക്തിയെയാണ് ഉറക്കമുണർന്നപ്പോൾ കണ്ടതെന്ന് ലെന പറയുന്നു.

സംഭവത്തെക്കുറിച്ച് സുഹൃത്തിനോട് ചോദിച്ചപ്പോഴാണ് കണ്ട വ്യക്തി മാസങ്ങൾക്കുമുമ്പ് മരിച്ചുപോയ ആളാണെന്ന് അറിഞ്ഞത്. ഇയാൾ ഇടയ്ക്കിടെ വീട്ടിൽ പ്രത്യക്ഷപ്പെടാറുണ്ടെന്നും സുഹൃത്ത് പറഞ്ഞതായി ലെന വെളിപ്പെടുത്തി. മുറിയിൽനിന്ന് പുറത്തേക്ക് പോകാൻ വാതിലോ മറ്റൊരു വഴിയോ ഇല്ലാതിരുന്നതും അനുഭവത്തെ കൂടുതൽ അമ്പരപ്പിക്കുന്നതാക്കിയെന്ന് താരം ഓർത്തെടുത്തു.

'ടോക്ക് ടു ദ എൻറ്റിറ്റീസ്' എന്ന പുസ്തകം വായിച്ചതോടെയാണ് ഇത്തരം അനുഭവങ്ങളെക്കുറിച്ച് കൂടുതൽ മനസ്സിലാക്കിയതെന്നും ലെന പറഞ്ഞു. ആത്മാക്കളെ കാണാനും അവരുമായി ആശയവിനിമയം നടത്താനും കഴിയുന്ന സുഹൃത്തുക്കൾ തനിക്കുണ്ടെന്നും താരം വെളിപ്പെടുത്തി. ഒരു കാലത്ത് ഇത്തരം സാന്നിധ്യങ്ങൾ തിരിച്ചറിയാനുള്ള കഴിവ് തനിക്കുമുണ്ടായിരുന്നുവെന്നും പിന്നീട് മനഃപൂർവം അതിൽനിന്ന് പിന്മാറുകയായിരുന്നുവെന്നും ലെന കൂട്ടിച്ചേർത്തു.

'സ്നേഹം' എന്ന ചിത്രത്തിലൂടെ 1998ൽ സിനിമയിലെത്തിയ ലെന, 'ട്രാഫിക്', 'സ്പിരിറ്റ്', 'എന്ന് നിന്റെ മൊയ്തീൻ', 'അതിരൻ' തുടങ്ങി നിരവധി സിനിമകളിലെ ശ്രദ്ധേയമായ കഥാപാത്രങ്ങളിലൂടെ മലയാളികൾക്ക് സുപരിചിതയാണ്. ബിഗ് ക്യു, ദി ഒറിജിനൽസ് എന്നീ യൂട്യൂബ് ചാനലുകൾക്ക് നൽകിയ അഭിമുഖങ്ങളിലാണ് താരം ഈ അനുഭവങ്ങൾ പങ്കുവെച്ചത്.

CENTRAL MEDIA NEWS DESK | www.cmediaonline.in