സുഹൃത്തുക്കളും പ്രിയപ്പെട്ടവരും എപ്പോഴാണ് ഓണ്‍ലൈനില്‍ എത്തുന്നതെന്ന് വളരെ പെട്ടെന്ന് തിരിച്ചറിയാന്‍ സഹായിക്കുന്ന പുതിയ ഓണ്‍ലൈന്‍ ഇന്‍ഡിക്കേറ്റര്‍ ഫീച്ചറാണ് വാട്‌സാപ്പ് പരീക്ഷിക്കുന്നത്.

ഐഒഎസിനായുള്ള വാട്‌സാപ്പ് ബീറ്റാ വേര്‍ഷന്‍ 26.26.10.72-ലാണ് ഈ മാറ്റം ആദ്യമായി ദൃശ്യമായതെന്ന് പ്രമുഖ വാട്‌സാപ്പ് ട്രാക്കറായ 'ഡബ്ല്യുഎബീറ്റാഇന്‍ഫോ' റിപ്പോര്‍ട്ട് ചെയ്യുന്നു. ഇതനുസരിച്ച്, ഒരാള്‍ ഓണ്‍ലൈന്‍ ആകുന്ന സമയത്ത് അവരുടെ പ്രൊഫൈല്‍ പിക്ചറിന് താഴെ വലതുഭാഗത്തായി ഒരു ചെറിയ പച്ച ബോക്സ് അഥവാ 'ഗ്രീന്‍ ഡോട്ട്' തെളിഞ്ഞു വരും. തത്സമയം അപ്‌ഡേറ്റ് ചെയ്യപ്പെടുന്ന ഒന്നാണ് ഈ ഫീച്ചര്‍ എന്നതാണ് ഇതിന്റെ പ്രധാന പ്രത്യേകത. അതായത്, ഒരു കോണ്‍ടാക്റ്റ് ഓണ്‍ലൈനില്‍ നിന്ന് പോകുന്ന നിമിഷം തന്നെ ഈ പച്ച ഡോട്ട് അപ്രത്യക്ഷമാകും. വളരെ ലളിതമായ ഒരു മാറ്റമാണെങ്കില്‍ പോലും, ഒരാള്‍ക്ക് സന്ദേശം അയക്കുന്നതിന് മുന്‍പ് അവര്‍ ഓണ്‍ലൈനിലുണ്ടോ എന്ന് ഊഹിച്ചറിയേണ്ടി വരുന്ന ബുദ്ധിമുട്ട് ഒഴിവാക്കാന്‍ ഇത് സഹായിക്കും.

എന്നാല്‍, നിലവില്‍ ഈ ഫീച്ചറിന് ഒരു ചെറിയ പരിമിതിയുമുണ്ട്. നിലവിലെ ചാറ്റ് ലിസ്റ്റിലോ പ്രധാന ചാറ്റ് ടാബിലോ ഈ പച്ച ഡോട്ട് കാണാന്‍ സാധിക്കില്ല. ഒരു വ്യക്തിയുടെ പ്രൊഫൈല്‍ ഫോട്ടോയില്‍ ക്ലിക്ക് ചെയ്ത് കോണ്‍ടാക്റ്റ് ഇന്‍ഫോ പേജ് തുറക്കുമ്പോള്‍ മാത്രമാണ് ഈ ഇന്‍ഡിക്കേറ്റര്‍ കാണാനാവുക. പ്രധാന ചാറ്റ് ലിസ്റ്റില്‍ തന്നെ ഇത് ലഭ്യമാക്കിയിരുന്നെങ്കില്‍ കൂടുതല്‍ ഉപകാരപ്രദമാകുമായിരുന്നു എന്നാണ് ഉപഭോക്താക്കളുടെ വിലയിരുത്തല്‍. അതേസമയം, ഉപഭോക്താക്കളുടെ സ്വകാര്യതയ്ക്ക് വാട്‌സാപ്പ് നല്‍കുന്ന സുരക്ഷാ മാനദണ്ഡങ്ങള്‍ ഈ പുതിയ ഫീച്ചറിലും പൂര്‍ണ്ണമായി നിലനിര്‍ത്തിയിട്ടുണ്ട്. സ്വന്തം ലാസ്റ്റ് സീന്‍ ഓണ്‍ലൈന്‍ സ്റ്റാറ്റസ് എന്നിവ മറ്റുള്ളവരില്‍ നിന്നും ഹൈഡ് ചെയ്ത ഉപഭോക്താക്കള്‍ക്ക് ഈ ഗ്രീന്‍ ഡോട്ട് ബാധകമായിരിക്കില്ല.

അതായത്, നിലവിലുള്ള സ്വകാര്യതാ നിയമങ്ങള്‍ അനുസരിച്ച് മാത്രമേ ഈ പച്ച ഡോട്ട് മറ്റുള്ളവര്‍ക്ക് ദൃശ്യമാകൂ. വന്‍കിട ഫീച്ചറുകള്‍ വാരിവലിച്ചു നല്‍കുന്നതിന് പകരം, ദൈനംദിന ഉപയോഗം കൂടുതല്‍ സുഗമമാക്കുന്ന ചെറിയ മാറ്റങ്ങള്‍ക്കാണ് വാട്‌സാപ്പ് ഇപ്പോള്‍ മുന്‍ഗണന നല്‍കുന്നത്. അതിന്റെ ഭാഗമായാണ് ഈ ചെറിയ ക്വാളിറ്റി-ഓഫ്-ലൈഫ് അപ്‌ഡേറ്റ്. ദിവസേനയുള്ള ചാറ്റിംഗുകളില്‍ വലിയ മാറ്റങ്ങള്‍ വരുത്താന്‍ ഇത്തരം ചെറിയ പരിഷ്‌കാരങ്ങള്‍ക്ക് സാധിക്കാറുണ്ട്. നിലവില്‍, ഐഒഎസ്, ആന്‍ഡ്രോയിഡ് പ്ലാറ്റ്‌ഫോമുകളിലെ തിരഞ്ഞെടുത്ത ചില ബീറ്റാ ടെസ്റ്റര്‍മാര്‍ക്ക് മാത്രമാണ് ഈ ഗ്രീന്‍ ഓണ്‍ലൈന്‍ ഇന്‍ഡിക്കേറ്റര്‍ ഫീച്ചര്‍ ലഭ്യമായിട്ടുള്ളത്.

എല്ലാ ഉപഭോക്താക്കള്‍ക്കുമായി ഇത് എപ്പോള്‍ ലഭ്യമാക്കുമെന്ന് വാട്‌സാപ്പ് ഔദ്യോഗികമായി വ്യക്തമാക്കിയിട്ടില്ലെങ്കിലും, ഇരു പ്ലാറ്റ്‌ഫോമുകളിലും പരീക്ഷണം നടക്കുന്നതിനാല്‍ വൈകാതെ തന്നെ ആഗോളതലത്തില്‍ ഇത് അവതരിപ്പിക്കുമെന്നാണ് സൂചന.